អន្តរជាតិ
នយោបាយអន្តរជាតិ
សំណុំរឿងពុករលួយ៖ សវនាការត្រូវព្យួរ លោកស្រី ប៉ាក ចោទថា ជាការកាច់កុងនយោបាយ អតីតប្រធានាធិបតីកូរ៉េខាងត្បូងលោកស្រី ប៉ាក ហ្គឺនហេ ពេលបញ្ជូនទៅតុលាការកន្លងមក
× សវនាការជំនុំជម្រះក្តីពុករលួយរបស់លោកស្រី ប៉ាក ហ្គឺនហេ ត្រូវបានព្យួរបណ្តោះអាសន្នសិន បន្ទាប់ពីមេធាវីការពារក្តីលោកស្រីសុំដកខ្លួនដើម្បីបង្ហាញការតវ៉ាប្រឆាំងនឹងនីតិវិធីតុលាការ។ មេធាវីការពារក្តីលោកស្រីអតីតប្រធានាធិបតីខាងលើអះអាងថា នីតិវីធីតុលាការលម្អៀងនិងមានស្ថិតក្រោមឥទ្ធិពលនយោបាយ។
ដោយសារអវត្តមានចុងចោទ ហើយមេធាវីការពារក្តីដកខ្លួនផងនោះ តុលាការក្រុងសេអ៊ូលបានសម្រេចពន្យារពេលបើកសវនាការជំនុំជម្រះរឿងពុករលួយរបស់លោកស្រី ប៉ាក ហ្គឺនហេ អតីតប្រធានាធិបតីកូរ៉េខាងត្បូងសិន។ គ្មានការបញ្ជាក់ច្បាស់ទេពីកាលបរិច្ឆេទថ្មីនៃការជំនុំជម្រះនេះ។
បើតាមទីភ្នាក់ងារព័ត៌មាន Reuters លោកស្រីប៉ាក ដែលប្រឈមការចោទប្រកាន់ច្រើនទាំងបទរំលោភអំណាច និងពុករលួយផងនោះ មិនបានបង្ហាញខ្លួននៅក្នុងតុលាការក្រុងសេអ៊ូលឡើយ ដោយលោកស្រីមានបញ្ហាសុខភាព។
ដើមសប្តាហ៍កន្លងទៅ ក្រុមមេធាវីការពារក្តីអតីតប្រធានាធិបតីកូរ៉េខាងត្បូងលោកស្រី ប៉ាក ហ្គឺនហេ បានសម្រេចដកខ្លួនចេញ ដើម្បីសម្តែងការតវ៉ាចំពោះនីតិវិធីតុលាការ ដោយពួកគេអះអាងថា វាមានភាពលម្អៀង។
ការដកខ្លួនរបស់ក្រុមមេធាវីការពារក្តីលោកស្រីប៉ាក នេះធ្វើឡើងបន្ទាប់ពីលោកស្រី ប៉ាក ថ្កោលទោសតុលាការដែលចេញដីកាពន្យារពេលឃុំឃាំលោកស្រី ប្រាំមួយខែទៀត។ លោកស្រីចាត់ទុកការសម្រេចរបស់តុលាការ ជាការសងសឹកផ្នែកនយោបាយប៉ុណ្ណោះ។
តុលាការបានទទូចសុំឲ្យមេធាវីការពារក្តីលោកស្រីពិចារណាឡើញវិញចំពោះការលាលែងនេះ ដើម្បីកុំឲ្យមានបញ្ហាដល់ចុងចោទ។ ប៉ុន្តែវាគ្មានការកែប្រែការសម្រេចចិត្តនេះឡើយ។ ដូច្នេះហើយទើបបានជាសវនាការនេះត្រូវពន្យារពេលបណ្តោះអាសន្នសិន។
ចៅក្រមដែលទទួលបន្ទុកកាត់ក្តីសំណុំរឿងនេះលោក Kim Se-Yun បានបញ្ជាក់ដូច្នេះ៖ «សំណុំរឿងនេះមិនអាចបន្តទៅមុខបានដោយគ្មានមេធាវីការពារក្តីឡើយ ដោយសារបណ្តឹងចោទប្រកាន់លោកស្រី ប៉ាក អាចនឹងធ្វើឲ្យលោកស្រីប្រឈមការកាត់ទោសធ្ងន់ធ្ងរផង»៕
Tag:
ពុករលួយ
កូរ៉េខាងត្បូង
© រក្សាសិទ្ធិដោយ thmeythmey.com