កីឡាអន្តរជាតិ
អន្តរជាតិ
AFC Asian Cup៖ AFC សម្រេចឲ្យកូរ៉េខាងជើង និងម៉ាឡេស៊ី លេងនៅទឹកដីកណ្តាល
× សហព័ន្ធកីឡាបាល់ទាត់ទ្វីបអាស៊ី (AFC) បានសម្រេចថាការប្រកួតជម្រុះជុំផ្តាច់ព្រ័ត្រ AFC Asian Cup រវាងក្រុមបាល់ទាត់ជម្រើសជាតិកូរ៉េខាងជើង និងម៉ាឡេស៊ីត្រូវធ្វើឡើងនៅទឹកដីកណ្តាល ក្នុងខែវិច្ឆិកាខាងមិខនេះ។ នេះបើតាមការចុះផ្សាយរបស់គេហទំព័រផ្លូវការ AFC។
បន្ទាប់ពីបានពន្យាពេលការប្រកួតអស់រយៈពេល៣ដងមកហើយនោះ ឥឡូវនេះ AFC បានកំណត់ការប្រកួតឲ្យកូរ៉េខាងជើង និង ម៉ាឡេស៊ីត្រូវប្រកួតនៅទឹកដីកណ្តាលនៃវគ្គជម្រុះជុំទី៣ ពូលB ពានរង្វាន់ប្រចាំទ្វីបអាស៊ី AFC Asian Cup ឆ្នាំ២០១៩ ដោយជើងទី១នឹងធ្វើឡើងនៅថ្ងៃទី១០ ខែវិច្ឆិកា និងជើងទី២នៅ៣ថ្ងៃបន្ទាប់។
តាមពិតទៅក្រុមទាំងពីរត្រូវប្រកួតគ្នាក្នុងវគ្គជម្រុះនេះតាំងពីថ្ងៃទទី៨ ខែមិថុនា ឆ្នាំ២០១៧ នៅរដ្ឋធានីព្យូងយ៉ាងមកម្លេះមុនពន្យាពេលប្រកួត៣ដងរួចមកនោះ។ ការព្យាពេលកន្លងមក ដោយសារសមាគមកីឡាបាល់ទាត់ម៉ាឡេស៊ី (FAM) ព្រួយបារម្ភអំពីសុន្តិសុខរបស់កីឡាករខ្លួន និងស្នើឲ្យមានការប្រកួតនៅក្នុងទឹកដីកណ្តាលល្អជាជាងធ្វើក្នុងរដ្ឋធានីព្យុងយ៉ាង។
ការព្រួយបារម្ភរបស់ FAM កើតឡើងក្រោយមានភាពតានតឹងខាងនយោបាយនៅឧបទ្វីបកូរ៉េដែលកំពុងតែឡើងកំដៅខ្លាំង។ មួយវិញទៀត ដោយសារកន្លងមកម៉ាឡេស៊ីធ្លាប់មានបញ្ហាការទូតជាមួយកូរ៉េខាងជើងជុំវិញករណីឃាតកម្មលើលោកគីម ជុងណាម បងប្រុសម្តាយទីទៃលោក គីម ជុងអ៊ុន ហើយថែមទាំងមានការដកឯកអគ្គរដ្ឋទូតចេញរៀងៗខ្លួនទៀតផង។
សូមបញ្ជាក់ថា ការប្រកួតវគ្គជម្រុះជុំទី៣នេះ គឺដើម្បីបានកៅអីសម្រាប់ព្រឹត្តិការណ៍ AFC Asian Cup ឆ្នាំ២០១៩ នៅប្រទេសអារ៉ាប់រួមអេមីរ៉េត។ ក្នុងវគ្គជម្រុះនេះចែកចេញជា៦ពូល ក្នុងមួយពូលមាន៤ក្រុម ដោយកូរ៉េខាងជើង និងម៉ាឡេស៊ីស្ថិននៅពូលB រូមជាមួយ លីបង់ និងហុងកុង៕
Tag:
បាល់ទាត់ AFC Asian Cup
AFC
កូរ៉េខាងជើង
ម៉ាឡេស៊ី
© រក្សាសិទ្ធិដោយ thmeythmey.com