ភ្នំពេញ៖ លោក ហ៊ាន វណ្ណហន អគ្គនាយកនៃអគ្គនាយកដ្ឋានកសិកម្មនៃក្រសួងកសិកម្ម រុក្ខាប្រមាញ់ និងនេសាទ បានលើកឡើងពីការទទួលខុសត្រូវរបស់ស្ថាប័នផ្សេងគ្នាចំពោះបញ្ហាសុវត្ថិភាពបន្លែ ក៏ដូចជាចំណីអាហារផ្សេងទៀតលើទីផ្សារកម្ពុជា។
ប្រសាសន៍ លោក ហ៊ាន វណ្ណ ៖
អគ្គនាយកដ្ឋានគយ និងរដ្ឋាករនៃក្រសួងសេដ្ឋកិច្ច និងហិរញ្ញវត្ថុ ទទួលខុសត្រូវលើបន្លែនាំចូលតាមច្រកព្រំដែន ខណៈអង្គភាពកាំកុងត្រូលនៃក្រសួងពាណិជ្ជកម្ម ទទួលខុសត្រូវលើបន្លែដែលដាក់លក់លើទីផ្សារ។ ដោយឡែកក្រសួងកសិកម្ម ទទួលខុសត្រូវលើការផលិតដាំដុះក្នុងស្រុក រហូតដល់ការកែច្នៃបឋម។ នេះបើតាម លោក ហ៊ាន វណ្ណហន ដែលបានថ្លែងនៅក្នុងវេទិកាស្ដីពីដំណាំបន្លែនៅកម្ពុជា នៅថ្ងៃទី២០ខែតុលា។
លោក ហ៊ាន វណ្ណហន មានប្រសាសន៍ថា កម្ពុជាមិនទាន់មានច្បាប់ស្ដីពីសុវត្ថិភាពចំណីអាហារនៅឡើយទេ។ ប៉ុន្តែមានប្រកាសអន្តរក្រសួងមួយ ដែលត្រូវបានបង្កើតឡើងនៅឆ្នាំ២០១០ ដែលបានទម្លាក់ការទទួលខុសត្រូវដល់ក្រសួងចំនួន៦ ឬ៧ ចំពោះបញ្ហាសុវត្ថិភាពចំណីអាហារនៅកម្ពុជា។ ក្រសួងសុខាភិបាល និងក្រសួងទេសចរណ៍ ក៏មានចំណែកទទួលខុសត្រូវលើបញ្ហានេះផងដែរ។ ការទទួលខុសត្រូវលើបញ្ហានេះ គឺត្រូវបានបែងចែកទៅតាមទីតាំងចរាចរ និងផលិតចំណីអាហារ។
ក្រសួងកសិកម្ម ក្នុងអំឡុងពេលថ្មីៗនេះ ត្រូវបានរដ្ឋាភិបាលបដិសេធចំពោះការសុំឈជើងត្រួតពិនិត្យសុវត្ថិភាពចំណីអាហារនៅច្រកព្រំដែន ដោយក្រសួងសេដ្ឋកិច្ច និងហិរញ្ញវត្ថុមិនចង់ឲ្យមានការចំណាយច្រើន។
តម្រូវការបន្លែត្រូវបានផ្គត់ផ្គង់មួយភាគធំដោយការនាំចូលពីក្រៅប្រទេស ពិសេសប្រទេសវៀតណាម។ ការសង្ស័យលើសុវត្ថិភាពបន្លែដែលចរាចរលើទីផ្សាកម្ពុជា ជាបញ្ហាសំខាន់មួយនៅកម្ពុជា។
កាលពីពេលថ្មីៗនេះ សម្ដេចប្រមុខរដ្ឋាភិបាល បានអំពាវឲ្យប្រជាពលរដ្ឋពហិកាទិញបន្លែដែលផ្ទុកសារធាតុប៉ះពាល់សុខភាព។ ការអំពាវនាវនេះបង្កើតឲ្យមានការជជែក ក្នុងចំណោមសាធារណៈជន អំពីការទទួលខុសត្រូវរបស់រដ្ឋាភិបាលចំពោះបញ្ហាទាំងនេះ និងសមត្ថភាព លទ្ធភាពរបស់ពលរដ្ឋក្នុងការជ្រើសរើសបន្លែគ្មានសារធាតុគីមីពុល។
ជុំវិញបញ្ហានេះដែរ រដ្ឋមន្ត្រីក្រសួងកសិកម្ម លោក វេង សាខុន បានថ្លែងនៅក្នុងកម្មវិធីមួយក្នុងសប្ដាហ៍នេះថា ការគាំទ្ររបស់ពលរដ្ឋចំពោះបន្លែសរីរាង្គ និងប្រភេទបន្លែសុវត្ថិភាពផ្សេងទៀត នឹងជំរុញឲ្យមានការផលិតបន្លែប្រភេទនេះកាន់តែច្រើនលើទីផ្សារ។ លោកបន្តថា ការដោះស្រាយបញ្ហានេះចាំបាច់មានការចូលរួមពីប្រជាពលរដ្ឋ។
ពាក់ព័ន្ធនឹងការជ្រើសរើសបន្លែនេះផងដែរ លោក ហ៊ាន វណ្ណហន ថ្លែងថាពលរដ្ឋអាចជ្រើសរើសបន្លែដែលមានការទទួលស្គាល់ត្រឹមត្រូវ ដែលជាបន្លែសរីរាង្គ និងការផលិតបន្លែដែលទទួលវិញ្ញាបនបត្រការអនុវត្តកសិកម្មល្អ (GAP) ៕