អន្តរជាតិ
ឥណ្ឌូណេស៊ី យកទូកនេសាទខុសច្បាប់របស់បរទេសដាក់សារមន្ទីរបង្ហាញប្រជាជនខ្លួន
រដ្ឋមន្ត្រីកិច្ចការដែនសមុទ្រ និងនេសាទឥណ្ឌូណេស៊ីលោកស្រី Susi Pudjiastuti។ រូបថត Kompas
×![]()
រដ្ឋាភិបាលក្រុងហ្សាការតា បានឲ្យដឹងថា ឥណ្ឌូណេស៊ី នឹងដាក់បង្ហាញទូកនេសាទខុសច្បាប់បរទេស នៅសារមន្ទីររបស់ខ្លួន ។ ការតាំងបង្ហាញទូកនេសាទដែលរាប់បញ្ចូលទាំងទូកនេសាទទង់ជាតិប្រទេសអាស៊ានផងដែរនោះ ក្នុងគោលដៅដើម្បីដាស់តឿនពលរដ្ឋខ្លួនឲ្យយល់ពីការបំពានដែនទឹកអធិបតេយ្យរបស់ខ្លួនពីសំណាក់បរទេស ។ 
-
-
រដ្ឋមន្ត្រីកិច្ចការដែនសមុទ្រ និងនេសាទឥណ្ឌូណេស៊ីលោកស្រី Susi Pudjiastuti នៅថ្ងៃ២០ តុលា បានអះអាងថា រដ្ឋាភិបាល នឹងបង្ហាញទូកឬនាវានាសាទបរទេស១០គ្រឿង ដែលអាជ្ញាធរឥណ្ឌូណេស៊ី បានរឹបអូសពីបទបំពានដែនទឹកនេសាទរបស់ឥណ្ឌូណេស៊ី ។ លោកស្រី អះអាងថា នាវានេសាទសញ្ជាតិថៃ ក៏មាននៅក្នុងនោះផងដែរ ។ នេះបើយោងតាមការចុះផ្សាយរបស់សារព័ត៌មាន The Jakatar Post ។
តាមប្រភពព័ត៌មានដដែល លោកស្រីរដ្ឋមន្ត្រី បានពន្យល់ពីការតាំងនេះថា ការតាំងនេះ នឹងក្លាយជាភស្តុតាំងដ៏សំខាន់មួយ ក្នុងករណីដែលមានភាគីពាក់ព័ន្ធណាមួយ ចោទរដ្ឋាភិបាលឥណ្ឌូណេស៊ី ថា បានកុហក ជុំវិញវត្តមាននៃនាវាបរទេសដែលបានប្រព្រឹត្តបទល្មើសនេសាទក្នុងដែនទឹកឥណ្ឌូណេស៊ី ។
លោកស្រី បានបន្ថែមទៀតថា ក្រសួង នឹងតាំងបង្ហាញនាវានេសាទខុសច្បាប់ចំនួន១០ ដែលមកពីប្រទេសខុសៗគ្នា ហើយ ការដាក់បង្ហាញនេះ ក៏នឹងក្លាយជាការក្រើនរម្លឹកដល់ប្រជាជនឥណ្ឌូណេស៊ី ថាប្រសិន បើឥណ្ឌូណេស៊ី កម្ទេច នាវាទាំងនោះចោល នោះ ភស្តុតាងនឹងត្រូវបាត់បង់ ហើយការលើកឡើងរបស់រដ្ឋាភិបាលលើចំណាត់ការប្រឆាំងទូកនេសាទ ក្លាយជាពាក្យកុហក ។
សូមជម្រាបផងដែរថា ឥណ្ឌូនេស៊ីដែលជាប្រទេសមានបណ្តុំកោះធំ និងច្រើនជាងគេរបស់ពិភពលោក បានចាប់ផ្តើមចាត់វិធានការតឹងរ៉ឹង ប្រឆាំងនឹងការនេសាទខុសច្បាប់ ចាប់តាំងពីលោកប្រធានាធិបតី ចូកូ វីដូដូ ឡើងកាន់តំណែងក្នុងឆ្នាំ២០១៤។ វិធានការនេះ ធ្វើឡើងក៏ដោយសារតែការនេសាទខុសច្បាប់ បានធ្វើឲ្យឥណ្ឌូនេស៊ីបាត់បង់ចំណូលជាតិជាច្រើនលានដុល្លារ ។
កន្លងមកអាជ្ញាធរឥណ្ឌូនេស៊ី ក៏បានកម្ទេចទូកនេសាទជាច្រើនរបស់ ហ្វីលីពីន វៀតណាម ម៉ាឡេស៊ី និងមីយ៉ាន់ម៉ាមិនតិចជាង៥០គ្រឿងឡើយ ដោយរដ្ឋាភិបាល បានចោទថាចូលនេសាទដោយខុសច្បាប់ ក្នុងដែនអធិបតេយ្យរបស់ខ្លួន៕
© រក្សាសិទ្ធិដោយ thmeythmey.com
