អន្តរជាតិ
លោក He Lifeng ប្រធានគណៈកម្មការអភិវឌ្ឍ និងកែទម្រង់ ក្នុងសន្និសីទសារព័ត៌មានថ្ងៃទី២១ ខែតុលា (រូបភាព៖ Xinhua)
×![]()
ដោយ: តន ចាន់រិទ្ធារ៉ា
មន្ត្រីជាន់ខ្ពស់ចិនបាននិយាយថា ទំហំផលិតផលក្នុងស្រុកសរុបរបស់ចិននឹងកើនលើស៨០ទ្រីលានយ័ន (ជាង១២ទ្រីលានដុល្លារ) នៅឆ្នាំ២០១៧ នេះ ចំណែកឯអត្រាកំណើនសេដ្ឋកិច្ចប្រចាំឆ្នាំវិញ ទំនងជាកើនខ្ពស់ជាងការប៉ាន់ស្មានដែរ គឺអាចមានអត្រាប្រមាណ៦,៥ភាគរយ។
ប្រធានគណៈកម្មការអភិវឌ្ឍ និងកែទម្រង់ជាតិ លោក He Lifeng នៅថ្ងៃទី២១ ខែតុលា បានប្រាប់អ្នកសារព័ត៌មានថា ទំហំផលិតផលក្នុងស្រុកសរុបរបស់ចិន នឹងបន្តកើនឡើងក្នុងឆ្នាំ២០១៧ ព្រោះរដ្ឋាភិបាលបានអាចរក្សាស្ថិរភាពនៃកំណើនសេដ្ឋកិច្ច ស្ថិរភាពអតិផរណា និងការកាត់បន្ថយទំហំផលិតផលលើសដូចជាដែក និងធ្យូងថ្មជាដើម។ លោក He Lifeng និយាយបែបនេះ ក្នុងសន្និសីទកាសែតក្រៅមហាសន្និបាតបក្សកុម្មុយនីស្តចិនដែលចាប់ផ្ដើមកាលពីថ្ងៃទី១៨ ខែតុលា។
លោក He Lifeng បានបញ្ជាក់ថា៖ «ចិនបានរក្សាកំណើនសេដ្ឋកិច្ចរបស់ខ្លួនក្នុងរយៈពេល៥ឆ្នាំចុងក្រោយនេះ ហើយបរិមាណផលិតផលក្នុងស្រុកសរុបក្នុងឆ្នាំ២០១៧ ត្រូវបានរំពឹងថា នឹងកើនលើស៨០ទ្រីលានយ័ន ដែលស្មើជាង១២ទ្រីលានដុល្លារ»។ បើតាមលោក He ការសម្រេចបានទំហំផលិតផលក្នុងស្រុកធំបែបនេះ មិនមែនជារឿងងាយស្រួលឡើយ ប៉ុន្តែចិនបានដាក់គោលនយោបាយកែទម្រង់ជាច្រើនដើម្បីឈានដល់គោលដៅនេះ។
ក្នុងរបាយការណ៍របស់គណៈកម្មការអភិវឌ្ឍ និងកែទម្រង់ជាតិ ចិនបានអនុវត្តនយោបាយកែទម្រង់លើការផ្គត់ផ្គង់ ដែលសំដៅធ្វើឲ្យមានតុល្យភាពសេដ្ឋកិច្ចឡើងវិញដើម្បីឈានដល់កំណើនដែលមានគុណភាព។ តាមរយៈនេះ ផលិតកម្មលើសនៃដែក និងធ្យូងថ្ម ត្រូវបានកាត់បន្ថយ ហើយរូបធាតុដើមក៏ត្រូវបានយកទៅប្រើប្រាស់ក្នុងឧស្សាហកម្មបច្ចេកវិទ្យាវិញ ខណៈដែលវិស័យផ្សេងទៀតដូចជាបច្ចេកវិទ្យាថ្មីៗ ពាណិជ្ជកម្ម និងឧស្សាហកម្មក៏ជួយជំរុញកំណើនសេដ្ឋកិច្ចចិនដែរ។
គិតត្រឹម៦ខែក្នុងឆ្នាំ២០១៧ ផលិតផលក្នុងស្រុកសរុប (GDP) មានទំហំ ៦,៩ភាគរយ ដែលនេះជាអត្រាខ្ពស់មួយ។ យ៉ាងណា លោក He Lifeng អះអាងថា ផលិតផលក្នុងស្រុកសរុបប្រចាំឆ្នាំ២០១៧ អាចស្ថិតក្នុងរង្វង់៦,៥ភាគរយ។ វិធានការជំរុញកំណើនសេដ្ឋកិច្ចជាច្រើនត្រូវបានដាក់ចេញ ចាប់តាំងពីការកែទម្រង់រចនាសម្ព័ន្ធផ្គត់ផ្គង់ ការលើកទឹកចិត្តក្រុមហ៊ុន រហូតដល់ការធានាពីការប្រកួតប្រជែងដោយយុត្តិធម៌ផងដែរ៕
© រក្សាសិទ្ធិដោយ thmeythmey.com
