រថយន្ត
នយោបាយចិនប្រឆាំងពុករលួយ ទប់ស្កាត់ការយករថយន្តរដ្ឋទៅប្រើខុសគោលដៅ រូបភាព៖ ទស្សនាវដ្តី Forbe
× គោលនយោបាយរដ្ឋាភិបាលក្រុងប៉េកាំងក្នុងបង្ក្រាបអំពើពុករលួយការប្រើប្រាស់រថយន្តរបស់រដ្ឋក្នុងពេលបំពេញភារកិច្ចបានទទួលផ្លែផ្កាច្រើនក្នុងរយៈពេលប្រាំឆ្នាំមកនេះ។ គោលនយោបាយនេះបានធានាឲ្យមានការគ្រប់គ្រងរថយន្តរដ្ឋបានត្រឹមត្រូវ និងការបន្ថយការប្រើប្រាស់រថយន្តរដ្ឋមិនចំគោលដៅ ឬបម្រើប្រយោជន៍ខ្លួន។
គោលនយោបាយ«បង្ក្រាបអំពើពុករលួយលើការប្រើប្រាស់ឡានរដ្ឋ»ដែលសម្តៅដល់ការគ្រប់គ្រងរថយន្តរបស់រដ្ឋរបស់លោកប្រធានាធិបតី ស៊ី ជិនភីង បានជួយកាត់បន្ថយការខ្ជះខ្ជាយ និងជំរុញការប្រើប្រាស់រថយន្តរបស់រដ្ឋចំគោលដៅ។ រថយន្តរដ្ឋ ៣៨៦៨ គ្រឿងនៅតាមស្ថាប័នរដ្ឋាភិបាលទាំង ១៤០ទូទាំងប្រទេសត្រូវដកហូតឈប់ប្រើប្រាស់ប្រាំឆ្នាំមកនេះ។
សារព័ត៌មានរដ្ឋចិន People’s Daily ផ្សាយថា បើតាមរបាយការណ៍ការិយាល័យរដ្ឋបាលជាតិចិន រថយន្តរដ្ឋដែលត្រូវបានដកឈប់ឲ្យប្រើប្រាស់នោះស្មើនឹង ៦០ ភាគរយនៃរថយន្តរដ្ឋមានសរុបកាលពីប្រាំឆ្នាំមុន។
គោលនយោបាយនេះធានាឲ្យមានការផ្លាស់ប្តូរទម្លាប់ចាស់ដោយបញ្ឈប់រាល់ការប្រាស់រថយន្តរដ្ឋក្នុងគោលដៅធ្វើដំណើរធម្មតាឬបេសកកម្មសម្រាប់មន្ត្រីក្រសួង ហើយរក្សាទុកតែរថយន្តខ្លះសម្រាប់ការប្រើប្រាស់ពិសេសប៉ុណ្ណោះ។ ក្រុមពិសេសអាចប្រើប្រាស់រថយន្តរដ្ឋនោះមានដូចជា ក្រុមការងារគាំទ្របច្ចេកទេស មន្ត្រីអនុវត្តច្បាប់ ក្រុមការងារទទួលបន្ទុកកិច្ចការសន្តិសុខបន្ទាន់ជាដើម។
អាជ្ញាធរទទួលបន្ទុកអនុវត្តក៏ បិទស្ទិគ័រ ឬសញ្ញាពិសេស និងបំពាក់ប្រព័ន្ធ GPS លើរថយន្តរបស់រដ្ឋដើម្បីធានាថា រថយន្តទាំងនោះមិនត្រូវបានគេប្រើប្រាស់ដើម្បីបម្រើកិច្ចការផ្ទាល់ខ្លួនឡើយ។
របាយការណ៍ដដែលនោះបានបន្ថែមថា ក្រៅពីអាជ្ញាធរថ្នាក់កណ្តាល រដ្ឋបាលខេត្ត និងតំបន់ស្វយ័តនានាប្រហែល ២៩ ទូទាំងប្រទេសផ្សេងទៀតក៏បានអនុវត្តគោលនយោបាយកែទម្រង់នេះបានជោគជ័យហើយ។ ដូច្នេះហើយ បច្ចុប្បន្នគេចាប់ផ្តើមផ្តោតសំខាន់លើស្ថាប័នសាធារណៈផ្សេងទៀត និងសហគ្រាសរដ្ឋផ្សេងទៀតផងដែរដើម្បីជំរុញការគ្រប់គ្រងរថយន្តរដ្ឋនេះ។
ទោះជាមានការដកហូតរថយន្តនិងទុករថយន្តខ្លះសម្រាប់ការប្រើប្រាស់ពិសេសក៏ពិតមែន រដ្ឋាភិបាលចិនក៏បានសម្រេចផ្តល់ការឧបត្ថម្ភធន់ដល់មន្ត្រីរដ្ឋការសម្រាប់ការជ្រើសរើសមធ្យោបាយធ្វើដំណើរដែលសមស្របពេលបំពេញភារកិច្ចផងដែរ៕
Tag:
ចិន
ស៊ី ជិនភីង
ពុករលួយ
© រក្សាសិទ្ធិដោយ thmeythmey.com