សិល្បៈអន្តរជាតិ
អន្តរជាតិ
មិត្តជិតស្និទ្ធ៖ តារាចម្រៀង Jonghyun សម្លាប់ខ្លួនដោយសារសម្ពាធផ្លូវចិត្ត មរណភាពរបស់តារាចម្រៀង K-Pop Jonghyun បន្សល់នូវភាពសោកសៅពីសំណាក់គ្រួសារ និងមិត្តភក្តិ។ រូបថត AFP
× Jonghyun តារាចម្រៀង K-Pop នៃក្រុម SHINee បានធ្វើអត្តឃាតក្នុងអាគារស្នាក់នៅក្រុងសេអ៊ូល កាលពីថ្ងៃទី១៨ ខែធ្នូ ហើយបានស្លាប់ ក្រោយបញ្ជូនទៅមន្ទីរពេទ្យ។ កាជ្រើសរើសផ្លូវមរណៈក្នុងអាយុត្រឹម២៧ឆ្នាំនេះ ត្រូវបានតារា K-Pop ស្រី Nine9 នៃក្រុម Dear Cloud អះអាងថា បណ្តាលមកពីជំងឺបាក់ទឹកចិត្តធ្ងន់ធ្ងរ។
តារា K-Pop ស្រីដែលមានរហស្សនាមថា Nine9 ដែលជាមិត្តភក្តិដ៏ជិតស្និទ្ធរបស់ Jonghyun បានបង្ហោះសារនៅក្នុង Instagram របស់ខ្លួន ដោយសារនោះនាងទទួលបានពី Jonghyun ដោយផ្ទាល់ពីសប្តាហ៍មុនការធ្វើអត្តឃាត។ នៅក្នុងខ្លឹមសាររួម តារានៃក្រុម SHINee ដែលមានឈ្មោះពេញថា Kim Jong-Hyun បានរៀបរាប់ពីភាពតប់ប្រម៉ល់ស្មារតីរបស់ខ្លួន ដែលជួបនូវវិបត្តិផ្លូវចិត្តដ៏ធ្ងន់ធ្ងរក្នុងនាមជាតារាចម្រៀងដ៏មានប្រជាប្រិយម្នាក់នៅកូរ៉េខាងត្បូង។
តាមខ្លឹមសារប្រែសម្រួលពីភាសាកូរ៉េ Jonghyun ថែមទាំងបានសរសេរថា៖ «ខ្ញុំខ្ទេចខ្ទាំនៅផ្នែកខាងក្នុងអស់ ហើយ។ សម្ពាធផ្លូវចិត្តស៊ីខ្ញុំយឺតៗ ហើយទីបំផុតវាលេបខ្ញុំតែម្តង ខ្ញុំមិនអាចយកឈ្នះវាបាននោះឡើយ»។
ដូចជាសារដែលសរសេរទៅបងស្រីរបស់ខ្លួនយ៉ាងដូច្នោះដែរ Jonghyun បានរៀបរាប់ថា៖ «តើខ្ញុំអាចនិយាយបានអ្វីទៀត? សូមប្រាប់ខ្ញុំមកថា ខ្ញុំធ្វើការច្រើនណាស់។ វាជារឿងល្អសម្រាប់ខ្ញុំក្នុងការធ្វើកិច្ចការដ៏ធ្ងន់ធ្ងរ។ ទោះបីអ្នកមិនអាចញញឹមនៅពេលអ្នកឲ្យខ្ញុំចាកចេញក៏ដោយ ប៉ុន្តែសូមកុំបន្ទោសខ្ញុំអី។ ខ្ញុំធ្វើការខ្លាំងណាស់។ ខ្ញុំពិតជាធ្វើការខ្លាំងណាស់។ ជំរាបលា!»។
នាង Nine9 ក៏បាននិយាយទៅកាន់គ្រួសាររបស់ Jonghyun ផងដែរ ទាក់ទងនឹងសំណេរប្លែកៗបែបនេះ ។ តារាចម្រៀងរូបនេះ ក៏បានលើកឡើងផងដែរថា Jonghyun បានស្នើឲ្យនាងចែករំលែកពាក្យពេចន៍របស់ខ្លួនទៅកាន់ពិភពលោកនៅពេលដែលគេចាកចេញទៅ។ នាងមានអារម្មណ៍ថា Jonghyun ចង់ឲ្យនាងជម្រះមន្ទិលទាក់ទងនឹងករណីស្លាប់នេះ។
នេះមិនមែនជាករណីមួយឡើយដែលតារាល្បីនៅកូរ៉េខាងត្បូងបានសម្លាប់ខ្លួន ដោយសារតែសម្ពាធផ្លូវចិត្ត។ តារាល្បីៗដែលសម្លាប់ខ្លួន ដូចជា Choi Jin-Sil (២០០៨), Park Yong-Ha (២០១០), Kim Sung-Min (២០១៦) សុទ្ធតែបានចងកសម្លាប់ខ្លួន៕
© រក្សាសិទ្ធិដោយ thmeythmey.com