សង្គមជាតិ
ខេត្តកណ្តាលមានបទល្មើសកើតឡើងជាង១០០០ករណីក្នុងឆ្នាំ២០១៧
× រយៈពេលជិតពេញ១ឆ្នាំ២០១៧នេះ បទល្មើសសរុបជាង១០០០ករណី បានកើតឡើងនៅទូទាំងខេត្តកណ្តាល ក្នុងនោះបទល្មើសព្រហ្មទណ្ឌចំនួន៣៥៨ករណី បទល្មើសគ្រឿងញៀន៤៩៤ករណី និងគ្រោះថ្នាក់ចរាចរណ៍កើតឡើងចំនួន២៤៣លើក។
បទល្មើសព្រហ្មទណ្ឌក្នុងខេត្តកណ្តាលនារយៈពេលជិត១ឆ្នាំកន្លងមកនេះ មាន៣៥៨ករណី ដោយកើនឡើង៦២ករណីបើប្រៀបធៀបទៅនឹងរយៈពេលដូចគ្នាក្នុងឆ្នាំ២០១៦។ ក្នុងចំណោមបទល្មើសទាំងនេះ មានបទល្មើសឧក្រិដ្ឋមានចំនួន ៤៧ ករណី និងបទល្មើសមជ្ឈិមមានចំនួន ៣១១ករណី។
តាមរបាយការណ៍ ដែលអានដោយ លោក អ៊ាវ ចំរើន សុ្នងការនគរបាលខេត្តកណ្តាល ក្នុងកិច្ចប្រជុំមួយកាលពីថ្ងៃទី១៨ ខែធ្នូ បទឧក្រិដ្ឋមានចំនួន ៤៧ករណី ក្នុងនោះរួមមាន លួចមានស្ថានទម្ងន់ទោស ១៣ករណី ឃាតកម្ម១០ករណី រំលោភសម្លាប់១ករណី និងរំលោភសេពសន្ថវៈ ២៣ករណី។ បន្ទាប់មក បទល្មើសមជ្ឈិមមានចំនួន ៣១១ករណី ក្នុងនេះដែរ បណ្ដាលឲ្យមនុស្សស្លាប់ចំនួន ១៧នាក់ និងរបួស ១៥៣នាក់។
លោក អ៊ាវ ចំរើន បានអះអាងថា៖ «ដោយមានការអនុវត្តបញ្ជាពីថ្នាក់លើ សមត្ថកិច្ចជំនាញខេត្តកណ្ដាល បានប្រឹងប្រែងអស់កម្លាំងកាយចិត្តអនុវត្តតាម ជាលទ្ធផលបង្ក្រាបបទល្មើសបានចំនួន ៣២៦ករណី និងចាប់ខ្លួនជនសង្ស័យចំនួន ៤០៥នាក់»។
ជាមួយគ្នានេះផងដែរ ស្នងការដ្ឋាននគរបាលខេត្តកណ្តាលបង្ក្រាបបទល្មើសគ្រឿងញៀនបានចំនួន ៤៩៤ករណី ហើយឃាត់ខ្លួនមនុស្ស ៨៣៤នាក់។ គ្រោះថ្នាក់ចរាចរណ៍វិញ ករណីគ្រោះថ្នាក់បានកើតឡើង២៤៣លើកដែលបណ្ដាលឲ្យមនុស្សស្លាប់១៥៤នាក់ និងរបួស៣៥៨នាក់។ «មូលហេតុគ្រោះថ្នាក់ចរាចរណ៍ បណ្ដាលមកពី ការបើកបរមិនយោគយល់គ្នា បើកបរក្នុងស្ថានភាពស្រវឹង ផ្ទុកលើសចំណុះ-ទម្ងន់ និងយានយន្តខុសបច្ចេកទេសជាដើម»។ នេះជាការបញ្ជាក់ពី លោក អ៊ាវ ចំរើន៕
Tag:
ខេត្តកណ្ដាល
អ៊ាវ ចំរើន
ខេត្តកណ្ដាល
© រក្សាសិទ្ធិដោយ thmeythmey.com