សង្គមអន្តរជាតិ
អន្តរជាតិ
ចិនហាមមន្ត្រីអបអរណូអែល ដោយចាត់ទុកថា វាជាអាភៀនលោកខាងលិច សុនខមួយក្បាលនៅប៉េកាំង ត្រូវបានតុបតែងជាសាន់តាណូអែល។ រូបថត AFP
× គណបក្សកុម្មុយនីស្តចិនបានហាមមន្ត្រីរបស់ខ្លួនពីការចូលរួមអបអរពិធីបុណ្យណូអែល ឬ គ្រិស្តម៉ាស ដែលជាប្រពៃណីរបស់បស្ចឹមប្រទេស។ ក្រុមអាជ្ញាធរបារម្ភថា ការអបអរពិធីបុណ្យនេះ ជាការសាយភាយវប្បធម៌បរទេស ដែលអាចឈានដល់ការលុបបំបាត់វប្បធម៌ក្នុងស្រុក។ ប៉ុន្តែសម្រាប់យុវជនចិន ពិធីបុណ្យថ្ងៃទី២៥ ខែធ្នូនេះ ជាឱកាសដើម្បីការសប្បាយរីករាយ និងការដើរផ្សារទិញឥវ៉ាន់។
ពិធីបុណ្យគ្រិស្តម៉ាស ត្រូវបានរៀបចំយ៉ាងទូលំទូលាយនៅតាមទីក្រុងរបស់ចិន ទោះជាចិនជាប្រទេសគ្មានសាសនា និងប្រកាន់លទ្ធិកុម្មុយនីស្តក្ដី។ ផ្សារទំនើបនានា អាគារពាណិជ្ជកម្ម បានដាក់តុបតែងលម្អដោយភ្លើងពណ៌ និងដើមសាប៉ាំង។ ការអបអរដោយគគ្រឹកគគ្រេងនេះកំពុងបង្កការព្រួយបារម្ភខ្លាំងពីសំណាក់អាជ្ញាធរចិន ដោយបានចាត់ទុកពិធីបុណ្យគ្រិស្តម៉ាសជាអាភៀនរបស់លោកខាងលិច ដែលកំពុងពង្វក់ជនជាតិចិនឲ្យភ្លេចវប្បធម៌ខ្លួនឯង។
នៅទីក្រុង Hengyang របស់ខេត្តហ៊ូណាន បក្សកុម្មុយនីស្តចិនបានប្រាប់ឲ្យសមាជិកបក្សទាំងអស់ មិនត្រូវចូលរួមសកម្មភាពសាសនារបស់បស្ចឹមលោកឡើយ។ ក្នុងសេចក្ដីកត់សម្គាល់មួយចុះផ្សាយកាលពីសប្ដាហ៍មុន គណៈកម្មការវិន័យទីក្រុង Hengyang បានស្នើឲ្យថ្នាក់ដឹកនាំ និងសមាជិកបក្សទាំងអស់ជំរុញវប្បធម៌ និងប្រពៃណីចិន ក៏ដូចជាកសាងស្មារតីសម្រាប់ប្រជាជនចិន ព្រោះបុណ្យគ្រិស្តម៉ាសជិតមកដលហើយ។
បើតាមសារព័ត៌មាន South China Morning Post សមាជិកបក្សដែលអបអរពិធីបុណ្យនេះ ត្រូវទទួលខុសត្រូវដោយខ្លួនឯង។ ការហាមប្រាមនេះមិនមែនសម្រាប់តែមន្ត្រីបក្សកុម្មុយនីស្តឡើយ តែសម្រាប់ប្រជាជនទូទៅផងដែរ។ សមាជិកបក្សទាំងអស់ត្រូវបានលើកទឹកចិត្តឲ្យរៀនសូត្រតាមការណែនាំរបស់អគ្គលេខាធិការបក្សកុម្មុយនីស្តចិន ស៊ី ជិនភីង ដែលប្រាប់ឲ្យមានការកសាងទំព័រថ្មីនៃវប្បធម៌ចិន។
ដោយឡែកនៅឯខេត្តអានហ៊ុយវិញ សម្ព័ន្ធយុវជនបក្សកុម្មុយនីស្តចិនដ៏មានឥទ្ធិពល ក៏បានចេញសេចក្ដីណែនាំហាមប្រាមការអបអរពិធីនេះដែរ។ សាខាសម្ព័ន្ធនេះនៅសាកលវិទ្យាល័យឱសថ Shenyang បានរឹតត្បិតសិទ្ធិសេរីភាពរបស់និស្សិតក្នុងសាកលវិទ្យាល័យពីការរៀបចំបុណ្យគ្រិស្តម៉ាស ដោយចាត់ទុកថ្ងៃទី២៥ ខែធ្នូ ជាថ្ងៃអាម៉ាស់របស់ចិន។
ពិធីបុណ្យលោកខាងលិចមួយនេះ មានប្រជាប្រិយភាពខ្លាំងនៅលើទឹកដីចិន ចាប់តាំងពីការបើកចំហសេដ្ឋកិច្ចមក។ ប៉ុន្តែការសាយភាយខ្លាំងរបស់បុណ្យមួយពិតជារឿងគួរឲ្យបារម្ភសម្រាប់បក្សកុម្មុយនីស្តចិន។ រដ្ឋាភិបាលចិនបានរឹតត្បិតសកម្មភាពសាសនាខ្លាំងនាពេលកន្លងមក ខណៈមានសមាគមន៍សាសនាមួយចំនួនតូចប៉ុណ្ណោះដែលទទួលការអនុញ្ញាតឲ្យរៀបចំពិធីសាសនារបស់ខ្លួន៕
© រក្សាសិទ្ធិដោយ thmeythmey.com