ជាតិ
សេដ្ឋកិច្ច
ក្រសួងពាណិជ្ជកម្ម ព្រមានអ្នកលួចនាំចូលទំនិញ ដែលបំពានសិទ្ធិផ្ដាច់មុខរបស់អ្នកដទៃ
× ភ្នំពេញ៖ ក្រសួងពាណិជ្ជកម្ម នៅក្នុងសេចក្ដីជូនដំណឹង ចុះថ្ងៃទី២៧ខែធ្នូ បានព្រមានដល់ក្រុមហ៊ុន ឬអ្នកលួចនាំចូលទំនិញ ដែលបំពានដល់សិទ្ធិនាំចូល និងចែកចាយផ្ដាច់មុខរបស់បុគ្គលដទៃ។
ក្រសួងពាណិជ្ជកម្មបានអំពាវនាវឲ្យបញ្ឈប់រាល់អំពើបំពានសិទ្ធិនាំចូល និងចែកចាយផ្ដាច់មុខ បើមិនដូច្នោះទេក្រុមហ៊ុន ឬអ្នកដែលបំពាន នឹងត្រូវប្រឈមចំណាត់ការតាមផ្លូវច្បាប់។
ក្រសួងបានឲ្យដឹងថា កន្លងមកមានក្រុមហ៊ុន ឬអ្នកនាំចូលមួយចំនួនបានលួចនាំចូល និងចែកចាយទំនិញដែលបំពានលើសិទ្ធិនាំចូល និងចែកចាយផ្ដាច់មុខលើទំនិញពាក់ម៉ាកណាមួយក្នុងប្រទេសកម្ពុជា តាមការប្រគល់សិទ្ធិពីម្ចាស់ម៉ាក ដែលត្រូវបានកត់ត្រា និងតម្កល់នៅក្រសួងពាណិជ្ជកម្មរួចហើយ។
ជាមួយគ្នានេះ ក្រសួងពាណិជ្ជកម្ម បានស្នើឲ្យក្រុមហ៊ុនដែលទទួលបានសិទ្ធិនាំចូល និងចែកចាយផ្ដាច់មុខ ត្រូវសហការជាមួយអាជ្ញាធរមានសមត្ថកិច្ចតាមមាត់ច្រកព្រំដែន និងក្នុងផ្ទៃប្រទេស ដើម្បីទប់ស្កាត់ការនាំចូល និងចែកចាយ ដែលបំពានសិទ្ធិផ្ដាច់មុខរបស់ខ្លួន៕
© រក្សាសិទ្ធិដោយ thmeythmey.com