ជាតិ
នយោបាយជាតិ
សប្តាហ៍ក្រោយ ក្រុមជំនាញ នឹងផ្តើមពិភាក្សា ដើម្បីស្វែងរកចំណុចកែរដ្ឋធម្មនុញ្ញ
× ការជួបជុំគ្នារបស់ក្រុមការងារជំនាញ ដែលទើបត្រូវបានបង្កើតឡើង ដើម្បីស្រាវជ្រាវរដ្ឋធម្មនុញ្ញ ប្រហែលជាចាប់ផ្តើម នៅសប្តាហ៍ក្រោយ។ នេះជាការអះអាងរបស់លោក សក់ សេដ្ឋា រដ្ឋលេខាធិការក្រសួងមហាផ្ទៃ និងជាអនុប្រធាននៃក្រុមការងារ ដែលប្រមូលផ្តុំទៅដោយអ្នកជំនាញផ្នែកច្បាប់មួយនេះ។
លោក សក់ សេដ្ឋា ប្រាប់សារព័ត៌មានថ្មីៗ តាមទូរសព្ទនៅថ្ងៃទី៣ ខែមករា យ៉ាងដូច្នេះថា៖«មកដល់ពេលនេះ យើងមិនទាន់បានពិភាក្សាជាផ្លូវការទេ។ ក្រោយរៀបចំទិវាជ័យជម្នះ៧មករារួច យើងប្រហែលជាចាប់ផ្តើមជួបគ្នាហើយ»។
ដោយសារតែមិនទាន់មានកិច្ចប្រជុំផ្លូវការ ហើយក៏មិនទាន់មានគំនិតរួមឲ្យជាក់លាក់ លោក សក់ សេដ្ឋា មិនអាចបញ្ជាក់ថា ចំណុចឬមាត្រាណាខ្លះ ក្នុងរដ្ឋធម្មនុញ្ញ ដែលនឹងត្រូវកែប្រែនោះទេ។ ប៉ុន្តែ លោក អាចបង្ហើបពីយោបល់ផ្ទាល់ខ្លួនថា ការកែប្រែរដ្ឋធម្មនុញ្ញនេះ គឺដើម្បីរកចំណុចឬគំនិតណាមួយ ដែលអាចតម្កល់ផលប្រយោជន៍ប្រទេសជាតិ ដោយមិនឲ្យបុគ្គលណាមួយ អាចបំផ្លាញបាន។ លោកបន្តថា ចំណុចមួយទៀត ដែលត្រូវកែរដ្ឋធម្មនុញ្ញ គឺដើម្បីបង្រួមក្បាលម៉ាស៊ីនរដ្ឋាភិបាល ឲ្យរួមតូច។
បើតាមលោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី សម្តេចនាយករដ្ឋមន្ត្រី ហ៊ុន សែន ចង់ដកតំណែងរដ្ឋលេខាធិការ ចេញពីសមាជិករដ្ឋាភិបាល។
បំណងនៃការកែប្រែរដ្ឋធម្មនុញ្ញ បានតម្រូវឲ្យរដ្ឋាភិបាល បង្កើតក្រុមការងារខាងលើ ដោយមានលោក អង្គ វង្សវឌ្ឍនា រដ្ឋមន្ត្រីក្រសួងយុត្តិធម៌ ជាប្រធាន រួមទាំងអនុប្រធាន៣រូប និងសមាជិក៨រូប។ ភារកិច្ចរបស់ក្រុមការងារនេះ គឺការស្រាវជ្រាវពីរដ្ឋធម្មនុញ្ញ ហើយផ្តល់យោបល់និងជម្រើសនានាដល់សម្តេច ហ៊ុន សែន ក្នុងការប្រែរដ្ឋធម្មនុញ្ញតាមការចាំបាច់។
លោក សុខ ឥសាន អ្នកនាំពាក្យគណបក្សប្រជាជនកម្ពូជា បានលើកឡើងថា មូលហេតុ ដែលនាំឲ្យមានគំនិតកែប្រែរដ្ឋធម្មនុញ្ញ គឺដើម្បីឆ្លើយតបនឹងបញ្ហាមួយចំនួន ដែលកំពុងលេចចេញនាពេលបច្ចុប្បន្ននេះ។ លោក បញ្ជាក់ដូច្នេះថា៖«ការផ្តើមគំនិតកែសម្រួលនិងធ្វើវិសោធនកម្មរដ្ឋធម្មនុញ្ញរបស់នាយករដ្ឋមន្ត្រី គឺជាការត្រឹមត្រូវតាមខ្លឹមសាររដ្ឋធម្មនុញ្ញ និងស្របតាមសំណូមពរចាំបាច់របស់ប្រទេសជាតិ»។
សូមរម្លឹកថា ចាប់តាំង១៩៩៣មក រហូតដល់ពេលនេះ រដ្ឋធម្មនុញ្ញ ត្រូវបានធ្វើវិសោធនកម្មចំនួន៨លើកហើយ។ ដើម្បីដោះស្រាយការជាប់គាំងនយោបាយ កាលពីឆ្នាំ២០០៤ រដ្ឋសភា បានបង្កើតច្បាប់រដ្ឋធម្មនុញ្ញបន្ថែម ដែលសំដៅដល់ការធានានូវដំណើរការជាប្រក្រតីនៃស្ថាប័នជាតិ៕
Tag:
រដ្ឋធម្មនុញ្ញ
វិសោធនកម្ម
សក់ សេដ្ឋា
© រក្សាសិទ្ធិដោយ thmeythmey.com