អន្តរជាតិ
នយោបាយអន្តរជាតិ
សមាជិកក្រុមប្រឹក្សាសន្តិសុខរិះគន់អាមេរិករឿងកោះប្រជុំបន្ទាន់លើបាតុកម្មនៅអ៊ីរ៉ង់
កិច្ចប្រជុំក្រុមប្រឹក្សាសន្តិសុខអង្គការសហប្រជាជាតិស្ដីពីបាតុកម្មនៅអ៊ីរ៉ង់ (រូបភាព៖ AP)
×![]()
ដោយ: ថ្មីៗ
អាមេរិកបានរងការរិះគន់ខ្លាំងក្នុងកិច្ចប្រជុំបន្ទាន់ក្រុមប្រឹក្សាសន្តិសុខអង្គការសហប្រជាជាតិស្ដីពីបាតុកម្មនៅអ៊ីរ៉ង់នៅថ្ងៃទី៥ ខែមករា។ សមាជិក្រុមប្រឹក្សាសន្តិសុខខ្លះបានបង្ហាញការមិនពេញចិត្តចំពោះអាមេរិក ដែលស្នើឲ្យកិច្ចប្រជុំបន្ទាន់លើបញ្ហាដែលមិនទាក់ទងសន្តិសុខពិភពលោក ឯរុស្ស៊ីវិញបានហៅសំណើរបស់អាមេរិក ជាការបំពានអំណាច។
ក្រុមប្រឹក្សាសន្តិសុខអង្គការសហប្រជាជាតិ បានកោះប្រជុំបន្ទាន់មួយតាមសំណើរបស់អាមេរិកនៅថ្ងៃទី៥ ខែមករា ដើម្បីជជែកលើបាតុកម្មនៅអ៊ីរ៉ង់។ ក្រុងវ៉ាស៊ីនតោនអះអាងថា ប៉ះពាល់សិទ្ធិមនុស្សយ៉ាងខ្លាំង ព្រោះការបង្ក្រាបរបស់កម្លាំងសន្តិសុខអ៊ីរ៉ង់បង្កឲ្យមានអ្នកស្លាប់ និងរបួសជាច្រើន។ ប៉ុន្តែ បារាំង រុស្ស៊ី និងចិន បានរិះគន់សំណើកោះប្រជុំរបស់អាមេរិក ខណៈរបៀបវារៈ គឺជាបញ្ហាក្នុងស្រុករបស់អ៊ីរ៉ង់សុទ្ធសាធ។
បើតាមទីភ្នាក់ងារព័ត៌មាន Reuters តំណាងរបស់បារាំងលោក Francois Delattre និយាយរិះគន់ដោយមិនចំឈ្មោះអាមេរិកថា បាតុកម្មមិនបានបង្កផលប៉ះពាល់សន្តិសុខ និងសន្តិភាពពិភពលោកឡើយ ទោះជាស្ថានការណ៍ពិតជាគួរឲ្យបារម្ភមែនក្ដី។ លោកក៏ស្នើឲ្យមានការប្រុងប្រយ័ត្នចំពោះការប៉ុនប៉ងនាំយកបញ្ហានៅអ៊ីរ៉ង់ដើម្បីប្រើប្រាស់ជាប្រយោជន៍ផ្ទាល់ខ្លួន ដែលផ្ដល់លទ្ធផលដែលគ្រប់គ្នាមិនចង់បាន។
ចំណែកឯអគ្គរដ្ឋទូតរុស្ស៊ី Vassily Nebenzia បានហៅសំណើរបស់អាមេរិកជាការបំពានអំណាច។ លោក Nebenzia អះអាងថា អាមេរិកបានព្យាយាមបំពានវេទិកាក្រុមប្រឹក្សាសន្តិសុខ ហើយការកោះប្រជុំបន្ទាន់នេះ គឺជាប៉ុនប៉ងរបស់អាមេរិកដើម្បីបង្កបញ្ហាដល់កិច្ចព្រមព្រៀងនុយក្លេអ៊ែរឆ្នាំ២០១៥ ដែលអាមេរិកមិនពេញចិត្តខ្លួនឯង។ តំណាងរុស្ស៊ីក៏រិះគន់អាមេរិកដែលចង់ពិភាក្សាបញ្ហាអ៊ីរ៉ង់ និងមិនបំភ្លេចប្រធានសំខាន់ដូចជាវិបត្តិស៊ីរី នុយក្លេអ៊ែកូរ៉េខាងជើង និងជម្លោះនៅយេម៉ែន។
ទន្ទឹមគ្នានោះ តំណាងចិនរបស់លោក Wu Haitao ក៏លើកឡើងដែរថា ការពិភាក្សាស្ថានការណ៍អ៊ីរ៉ង់នៅក្រុមប្រឹក្សាសន្តិសុខ មិនអាចដោះស្រាយបញ្ហាអ៊ីរ៉ង់បានទេ។ លោកស្រី Nikki Haley ប្រេសិតអាមេរិកនិយាយថា បាតុកម្មនៅអ៊ីរ៉ង់ នឹងមិនស្ងប់ស្ងាត់ឡើយ ហើយអាមេរិកក៏បានកត់ឈ្មោះអ៊ីរ៉ង់រួចហើយដែរ។
ដោយឡែក អគ្គរដ្ឋទូតអ៊ីរ៉ង់ប្រចាំអង្គការសហប្រជាជាតិ Gholamali Khoshroo បានប្រាប់សមាជិកក្រុមប្រឹក្សាសន្តិសុខថា អ៊ីរ៉ង់មានភស្តុតាងគ្រប់គ្រាន់រឹងមាំ ដែលបង្ហាញពីការលូកលាន់របស់បរទេសក្នុងបាតុកម្មនេះ។ លោកក៏មិនភ្លេចរិះគន់អាមេរិក ដែលអាងខ្លួនសមាជិកអចិន្ត្រៃយ៍ក្រុមប្រឹក្សាសន្តិសុខ ស្នើកោះប្រជុំបន្ទាន់លើបញ្ហានេះ ទាំងមិនស្ថិតក្នុងអាណត្តិតរបស់ខ្លួនផងនោះ៕
Tag:
អាមេរិក
អ៊ីរ៉ង់
UNSC
© រក្សាសិទ្ធិដោយ thmeythmey.com
