ជាតិ
នយោបាយជាតិ
អាមេរិក ថ្លែងសារអបអរទិវាជ័យជម្នះ ៧ មករា
× ភ្នំពេញ៖ ស្ថានទូតអាមេរិកប្រចាំកម្ពុជា បានចេញសេចក្ដីថ្លែងការណ៍អបអរសាទរទិវាជ័យជម្នះ ៧ មករា លើកទី៣៩ ។
តាមហ្វេសប៊ុកស្ថានទូតអាមេរិក បានរំឭកថា ថ្ងៃទី៧ មករា ឆ្នាំ១៩៧៩ ទីក្រុងភ្នំពេញ ត្រូវបានរំដោះចេញពីរបបខ្មៅងងឹតរបស់ខ្មែរក្រហម ហើយកម្ពុជា ចាប់ផ្ដើមបន្តដំណើរទៅកាន់ពន្លឺត្រចះត្រចង់ និងពោលពេញទៅដោយក្តីសង្ឃឹមក្នុងពេលអនាគត។
អាមេរិក បន្តថា ខួបលើកទី៣៩ នៃថ្ងៃរំដោះជាតិនេះ គឺជាថ្ងៃប្រវត្តិសាស្ត្ររបស់ប្រទេសកម្ពុជា។ អាមេរិក ចងចាំជានិច្ចនៃការស្លាប់របស់ប្រជាជនខ្មែរ២លាននាក់ក្នុងសម័យ ប៉ុល ពត និងភាពឈឺចាប់របស់ប្រជាជនរាប់លាននាក់ផ្សេងទៀត។ អមជាមួយសារខាងលើនេះ ស្ថានទូតអាមេរិក បានសរសេរដូច្នេះថា៖«ពួកយើងក៏សម្ដែងការសាទរផងដែរ ចំពោះភាពប៉ិនប្រសប់ ភាពក្លាហាន និងស្មារតីលះបង់ ជាមួយប្រជាជនកម្ពុជា ដែលត្រូវបានរំដោះចេញពីសម័យកាលខ្មៅងងឹត, ការកសាងប្រទេសពួកគេឡើងវិញ និងការប្រឹងប្រែងបន្តដំណើរការទៅមុខក្នុងការផ្សះផ្សារជាតិ»។
នៅព្រឹកនេះគណបក្សប្រជាជនកម្ពុជា បានជួបជុំថ្នាក់ដឹកនាំ សមាជិក-សមាជិកា ៥ម៉ឺននាក់ ដើម្បីរំឮកខួបថ្ងៃទី ៧ មករា លើកទី៣៩ នៅមជ្ឈមណ្ឌលកម្សាន្តកោះពេជ្រ។ ការជួបជុំគ្នានេះ ក្នុងអត្ថន័យរំឮកឡើងវិញ ពីភាពជូចត់នៃការរំដោះជាតិ ដើម្បីជួយសង្គ្រោះពលរដ្ឋពីការរងទុកវេទនា ក្នុងសម័យ ប៉ុល ពត។ ជាពិសេសការលះបង់របស់ថ្នាក់ដឹកនាំគណបក្សប្រជាជនកម្ពុជា ដែលខិតខំប្រឹងប្រែងចចាររកសន្តិភាព រហូតដល់មានកិច្ចព្រមព្រៀងទីក្រុងប៉ារីស ក្នុងការដោះស្រាយបញ្ហាជាតិ ,បង្រួបបង្រួមជាតិ និងការអភិវឌ្ឍជាតិនាបច្ចុប្បន្ននេះ។ គណបក្សប្រជាជនកម្ពុជា បានឲ្យតម្លៃថ្ងៃ៧មករា ថាជាជីវិតទី២របស់ប្រជាពលរដ្ឋខ្មែរ។
ការជួបជុំគ្នានេះ ក្រោមវត្តមានប្រធានគណបក្សប្រជាជនកម្ពុជា សម្ដេច ហ៊ុន សែន និងសម្ដេច ហេង សំរិន៕
© រក្សាសិទ្ធិដោយ thmeythmey.com