ជាតិ
បទសម្ភាសន៍
នយោបាយអន្តរជាតិ
មេគង្គ-ឡានឆាង៖ អ្នកជំនាញថា ប្រទេសដែលឆ្លាត និងមានសមត្ថភាពនឹងទាញបានប្រយោជន៍ច្រើន
បណ្ឌិត ឈាង វណ្ណារិទ្ធ និងបណ្ឌិត សុក ស៊ីផាន់ណា នៅក្នុងវេទិកាសាធារណៈស្តីពីមេគង្គ-ឡានឆាងរៀបចំឡើងដោយវិទ្យាស្ថានកម្ពុជាសម្រាប់ការសិក្សាយុទ្ធសាស្ត្រ
×![]()
ភ្នំពេញ៖ កិច្ចសហប្រតិបត្តិការពង្រឹងទំនាក់ទំនងពាណិជ្ជកម្ម ការផ្សាភ្ជាប់រវាងប្រជាជន ការអភិវឌ្ឍ និងសន្តិសុខតំបន់មេគង្គ។ ដោយសារកិច្ចសហប្រតិបត្តិការនេះជាគំនិតផ្តួចផ្តើមរបស់ចិន គេឃើញមានការរិះគន់ថា ចិននឹងទាញប្រយោជន៍ច្រើនពីកិច្ចសហប្រតិបត្តិការនេះ ខណៈប្រទេសឯទៀតជាពិសេសប្រជាជនតាមមូលដ្ឋាននឹងមិនមានលទ្ធភាពទាញប្រយោជន៍ច្រើនឡើយ។ ប៉ុន្តែអ្នកជំនាញយល់ថា វាជារឿងធម្មតាក្នុងកិច្ចសហប្រតិបត្តិការដែលមានអ្នកចំណេញតិច ឬច្រើន ហើយគេមិនអាចចោទចិនបានឡើយ។ សំខាន់ ជាសមាជិកមួយ កម្ពុជាត្រូវពង្រឹងសមត្ថភាព ភាពឆ្លាតវៃ ខ្លាំង និងបង្កើនភាពដឹកនាំដើម្បីទាញប្រយោជន៍ឲ្យបានច្រើន។
សូមស្តាប់បទសម្ភាសជាមួយលោក សៅ ផលនិស្ស័យ នៃសារព័ត៌មានថ្មីៗជាមួយលោកបណ្ឌិត ឈាង វណ្ណារិទ្ធ សហស្ថាបនិក វិទ្យាស្ថានកម្ពុជាសម្រាប់ការសិក្សាយុទ្ធសាស្ត្រ (CISS)
កិច្ចសហប្រតិបត្តិការមេគង្គ-ឡានឆាង (Mekong-Lancang Cooperation) មានអាយុកាលពីរឆ្នាំហើយគិតមកត្រឹមពេលនេះ។ នៅថ្ងៃពុធទី ១០ ខែមករាខាងមុខ មេដឹកនាំប្រទេសសមាជិកទាំងប្រាំមួយនឹងជួបពិភាក្សាគ្នានៅក្នុងប្រទេសកម្ពុជាក្នុងកិច្ចប្រជុំកំពូលមេដឹកនាំលើកទីពីរ។
លោកបណ្ឌិត ឈាង វណ្ណារិទ្ធ អ្នកស្រាវជ្រាវនៅវិទ្យាស្ថាន ISEAS ប្រទេសសិង្ហបុរី និងជាសហស្ថាបនិកវិទ្យាស្ថានកម្ពុជាសម្រាប់ការសិក្សាយុទ្ធសាស្ត្រ (CISS) យល់ឃើញថា កិច្ចប្រជុំកំពូលមេគង្គ-ឡានឆាងលើកពីរខាងមុខ មេដឹកនាំនឹងពិនិត្យលទ្ធផលដែលខ្លួនសម្រេចបាននិងកំណត់ផែនការយុទ្ធសាស្ត្រដើម្បីបន្តកិច្ចសហប្រតិបត្តិការទៅមុខទៀតដែរ។
«មេដឹកនាំនឹងវាយតម្លៃតើអ្វីដែលសម្រេចបានក្នុងរយៈពេលពីរឆ្នាំកន្លង និងអ្វីទៅដែលត្រូវតែធ្វើបន្តបន្ទាប់។ អ្វីដែលពិសេសថ្នាក់ដឹកនាំនឹងពិភាក្សា និងអនុម័តផែនការសកម្មភាពប្រាំឆ្នាំក្រោមក្របខណ្ឌកិច្ចសហប្រតិបត្តិការមេគង្គ-ឡានឆាងនេះ»។ លោកបណ្ឌិត ឈាង វណ្ណារិទ្ធ បានបញ្ជាក់ដូច្នេះ។
ឆ្លើយតបនឹងការរិះគន់ និងការវាយតម្លៃថា មានតែចិនដែលទាញបានប្រយោជន៍ ខណៈប្រជាជនសាមញ្ញក្នុងប្រទេសប្រាំផ្សេងទៀតហាក់មិនមានលទ្ធភាពទាញប្រយោជន៍ច្រើនពីកិច្ចសហប្រតិបត្តិការមេគង្គ-ឡានឆាងនោះ លោកបណ្ឌិត ឈាង វណ្ណារិទ្ធ បញ្ជាក់ថា កិច្ចសហប្រតិបត្តិការមានចំណេញតិចឬច្រើនវាអាស្រ័យលើភាពឆ្លាតវៃនិងខ្លាំងរបស់ប្រទេសនីមួយៗ។
«ខ្ញុំគិតថា កិច្ចសហប្រតិបត្តិការវាមានអ្នកទទួលបានច្រើន និងតិច។ វាមិនបានស្មើគ្នាទេ។ វាពឹងលើសមត្ថភាព និងភាពជាអ្នកដឹកនាំរបស់ប្រទេសនីមួយៗ។ បើយើងឆ្លាត ខ្លាំង មានសមត្ថភាព យើងទទួលបានប្រយោជន៍ច្រើន។ ដូច្នេះយើងមិនអាចចោទប្រទេសណាមួយមកគ្របដណ្តប់លើយើង»។
ពេលសាកសួររឿងចិនអាចប្រើប្រាស់វេទិកាមេគង្គដើម្បីពង្រឹងឥទ្ធិពលរបស់ខ្លួននៅអាស៊ាន លោក ឈាង វណ្ណារិទ្ធ ទទួលស្គាល់ថា វាប្រាកដណាស់ព្រោះផលប្រយោជន៍របស់ចិនគឺពង្រឹងឥទ្ធិពលរបស់ខ្លួននៅតំបន់ និងឆាកអន្តរជាតិ។ ប៉ុន្តែអ្នកជំនាញរូបនេះលើកសរសើរពីចំណុចវិជ្ជមានរបស់មហាយក្សចិន។ នោះ គឺចិនទទួលយកគោលការណ៍គោរពគ្នាទៅវិញទៅមក ហើយចិនក៏មិនដាក់គំនិតឲ្យប្រទេសផ្សេងធ្វើតាមដូចប្រទេសមហាអំណាចមួយចំនួនទៀតឡើយ។ ចិនស្តាប់បណ្តាប្រទេសផ្សេង និងរៀនពីគ្នាទៅវិញទៅមក។
បន្ថែមពីនេះ បើតាមអ្នកស្រាវជ្រាវខាងលើ យន្តការកិច្ចសហប្រតិបត្តិការអនុតំបន់នេះនឹងចូលរួមកាត់បន្ថយភាពតានតឹងក្នុងការគ្រប់គ្រង និងប្រើប្រាស់ទឹកទន្លេមេគង្គផងដែរ ដោយសារភាគីបើកចំហដើម្បីពិភាក្សា និងសន្ទនាគ្នាក្រោមក្របខណ្ឌនៃកិច្ចសហប្រតិបត្តិការនេះ។
យ៉ាងណាមិញ លោក ឈាង វណ្ណារិទ្ធ យល់ឃើញថា បរិស្ថាននៅក្នុងតំបន់នៅជាបញ្ហាចោទនៅឡើយ ដោយសារប្រជាជនមិនសូវចូលរួម ហើយការអនុវត្តគោលនយោបាយនៅមិនទាន់មានប្រសិទ្ធភាពឡើយ។ ដូច្នេះហើយ លោកយល់ថា វាជារឿងចាំបាច់ដែលកិច្ចសហប្រតិបត្តិការមេគង្គ-ឡានឆាងនេះត្រូវជំរុញបន្ថែមលើការធានានិរន្តរភាពនៃបរិស្ថានតំបន់នេះ។
សូមបញ្ជាក់ថា កិច្ចសហប្រតិបត្តិការមេគង្គ-ឡានឆាង ត្រូវបានបង្កើតឡើងក្នុងឆ្នាំ ២០១៥ដោយមានសមាជិកសរុបប្រាំមួយមានកម្ពុជា ចិន ឡាវ មីយ៉ាន់ម៉ា ថៃ និងវៀតណាម និងផ្តោតសំខាន់លើសរសរស្តម្ភបី និងមានវិស័យអាទិភាពចំនួនប្រាំ។ សរសរស្តម្ភបីនោះមាននយោបាយ-សន្តិសុខ, សេដ្ឋកិច្ច និងការអភិវឌ្ឍ រួមជាមួយសង្គម និងទំនាក់ទំនងប្រជាជនទៅប្រជាជន។ ចំណែកវិស័យអាទិភាពចំនួនប្រាំមានដូចជាការផ្សាភ្ជាប់, កិច្ចសហប្រតិបត្តិការជំរុញសមត្ថភាពផលិត, កិច្ចសហប្រតិបត្តិសេដ្ឋកិច្ចឆ្លងដែន, កិច្ចសហប្រតិបត្តិការនៃការគ្រប់គ្រងទឹក និងកសិកម្ម និងកិច្ចសហប្រតិបត្តិការក្នុងការកាត់បន្ថយភាពក្រីក្រ ៕
Tag:
មេគង្គ-ឡានឆាង
© រក្សាសិទ្ធិដោយ thmeythmey.com
