បទយកការណ៍ / បទសម្ភាសន៍
×![]()
ភ្នំពេញ៖ បណ្ដាញសង្គមហ្វេសប៊ុក កំពុងក្លាយជាទីកន្លែងបង្ហោះរូបភាពយ៉ាងពេញនិយម សម្រាប់អ្នកប្រើប្រាស់នៅក្នុងប្រទេសកម្ពុជា។ ហើយប្រជាពលរដ្ឋមួយចំនួន ដែលនិយមប្រើប្រាស់បណ្ដាញសង្គមនេះ កំពុងក្លាយទៅជាមនុស្សអសីលធម៌ដោយមិនដឹងខ្លួន តាមរយៈការបង្ហោះរូបភាពសាកសព ឬរូបមិនគួរគប្បីទាំងនេះ។
លោក វិទូរ្យ គឺជាអ្នកនិយមប្រើប្រាស់បណ្ដាញសង្គមហ្វេសប៊ុកម្នាក់ ក្នុងចំណោមពលរដ្ឋខ្មែរជាច្រើនលាននាក់។ រូបភាពបង្ហាញពីទេសភាព គ្រោះថ្នាក់ចរាចរណ៍មានអ្នករបួសធ្ងន់ធ្ងរ (ពិការដៃ-ជើង,ស្លាប់) អ្នកជំងឺស្ថិតក្នុងស្ថានភាពសង្គ្រោះបន្ទាន់ និងរូបភាពពីជីវិតផ្ទាល់ខ្លួន សុទ្ធតែជាដំណឹងដែលយុវជន វិទូរ្យ ធ្លាប់បង្ហោះ និងចែករំលែក (Share) នៅលើគណនីហ្វេសប៊ុករបស់ខ្លួន។ មិនត្រឹមតែប៉ណ្ណេះឡើយយុវជន វិទូរ្យ ក៏ធ្លាប់បង្ហោះរូបសាកសពជីតា របស់លោកនៅក្នុងទំព័រហ្វេសប៊ុកផងដែរ។ ការបង្ហោះសាកសពជីតាខ្លួននេះ ដោយសារតែ វិទូរ្យ ចង់បង្ហាញពីភាពអាឡោះអាល័យ និងចង់ផ្សាយដំណឹង ដល់សាច់ញាតិ មិត្តភក្តិដទៃទៀតឲ្យបានដឹងពីដំណឹងទុក្ខក្រៀមក្រំនេះ។
បុរសមាឌតូចសម្បុរស្រអែម វ័យជាង២០ឆ្នាំរូបនេះ បានរៀបរាប់ថា ៖«សាកសពជីតា ដែលលោកបង្ហោះ មិនមែនមានរូបភាពឃោឃៅ ដូចជាការបាញ់សម្លាប់ គ្រោះថ្នាក់ចរាចរណ៍ ដែលមានឈាម ឬអ្វីផ្សេងៗឡើយ។ ប៉ុន្តែវាជាការកាន់ទុក្ខរបស់ក្រុមគ្រួសារខ្ញុំ ជាការរំលឹកគុណរបស់គាត់ ជាសិទ្ធិរបស់ខ្ញុំ» ។
នៅពេលសួរថា តើលោកដឹងថា វាជារឿងអសីលធម៌ និងបំពានលើកិត្តិយសជីតាលោកទេ? វិទូរ្យ ឆ្លើយតបទាំងដឹងច្បាស់ថា វាពិតរំលោភដល់សិទ្ធិសពជីតារបស់លោកដែរ តែគ្រាន់តែខ្លួនគិតថា វាជារឿងធម្មតាទៅហើយ សម្រាប់ការបង្ហោះរូបភាពបែបនេះនៅលើបណ្ដាញសង្គមហ្វេសប៊ុក ។
មិនមែនតែ វិទូរ្យ ទេ ដែលគិតបែបនេះ។ អ្នកប្រើប្រាស់បណ្ដាញហ្វេសប៊ុកមួយចំនួនធំ ក៏ទំនងគិតដូច វិទូរ្យ ដែរ។ បើដូច្នោះមែន ពួកគេប្រហែលជាមិនបានគិតទេថា ការបង្ហោះរូបភាពសាកសព គ្រោះថ្នាក់ចរាចរណ៍ស្ថិតនៅក្នុងស្ថានភាពអាក្រក់ និងរឿងអសីលធម៌ផ្សេងៗ កំពុងបង្កឲ្យមានផលប៉ះពាល់ធ្ងន់ធ្ងរដល់ផ្លូវចិត្តអ្នកប្រើប្រាស់ហ្វេសប៊ុកដទៃនោះទេ។
ជាអ្នកនិយមប្រើប្រាស់ហ្វេសប៊ុកម្នាក់ដែរ កញ្ញា គឹម ឈិន មិនពេញចំពោះការបង្ហោះរូបភាពសោកនាដកម្ម និងរូបមិនគប្បីលើបណ្ដាញសង្គមឡើយ។ គឹម ឈិន យល់ថា រូបភាពសាកសព ឬរូបភាពមិនសមរម្យផ្សេងទៀត គឺជាការប្រមាថមើលងាយដល់ពួកគាត់ ព្រោះវាជារឿងឯកជនសុទ្ធសាធ ហើយអ្នកស្លាប់ក៏មានកិត្តិយស និងកេរ្តិ៍ខ្មាសដែរ បើទោះជាគាត់បានស្លាប់ក៏ដោយចុះ។ សម្រាប់ គឹម ឈិន រូបភាពទាំងនោះមិនគួរយកទៅបង្ហោះឲ្យអ្នកដទៃបានឃើញនោះទេ។
កញ្ញា គឹម ឈិន ដែលមិនគាំទ្រទង្វើបែបនេះ បានបង្ហាញអារម្មណ៍ខ្លួនយ៉ាងដូច្នេះថា៖«វាអពមង្គលខ្លាំងណាស់ដែលព្រឹកឡើងឃើញមុខសាកសពក្នុងបណ្ដាញសង្គម។ ព្រឹកនេះខ្ញុំបើកហ្វេសប៊ុកភ្លាមឃើញសាកសពភ្លាម វាមិនល្អសោះ បង្ហោះរូបបែបនេះបើចំមនុស្សខ្លះ ដែលគេមានដំណមមិនឲ្យឃើញសាកសព ក៏ប៉ះពាល់ផ្លូវចិត្តគេដែរ»។
សម្រាប់អ្នកស្រី ឆាយ គុយ តែងតែកើតមានបញ្ហាតឹងណែនអារម្មណ៍ នៅពេលដែលឃើញរូបភាពសាកសព ឬរូបភាពអ្នកជំងឺនៅលើហ្វេសប៊ុក។ ពេលខ្លះអ្នកស្រី ឆាយ គុយ អង្គុយមើលហ្វេសប៊ុកទាំងសម្រក់ទឹកភ្នែកទៀតផង នៅពេលឃើញការបង្ហោះរូបភាពសាកសពដោយសារគ្រោះថ្នាក់ចរាចរណ៍នៅលើហ្វេសប៊ុក ព្រោះវាបានធ្វើឲ្យអ្នកស្រី រំឮកដល់ម្ដាយដែលបានបាត់បង់ជីវិតដោយសារគ្រោះថ្នាក់ចរាចរណ៍នេះ។ រូបភាពបែបនេះ បានធ្វើឲ្យអ្នកស្រី ឆាយ គុយ ស្លុតអារម្មណ៍ ហើយលែងចង់ប្រើប្រាស់បណ្ដាញសង្គមហ្វេសប៊ុកទៀតផង។
អ្នកស្រី អត្ថាធិប្បាយដូច្នេះថា ៖«មិនគួរបង្ហោះរូបភាពគ្រោះថ្នាក់ចរាចរណ៍ដែលបង្ហាញរូបរាង និងមុខមាត់របស់សាកសពពេកនោះទេ ព្រោះវាអាចប៉ះពាល់ដល់អារម្មណ៍របស់គ្រួសារ សាច់ញាតិ របស់សាកសព។ខ្ញុំតែងតែស្លុតនៅពេលឃើញរូបភាពសាកសព ដែលជួបគ្រោះថ្នាក់ចរាចណ៍ផ្សេងៗ។ ដូច្នេះមិនគួរបង្ហោះ ឬ ផ្សាយច្រើនពីរូបភាពទាំងនោះឡើយ»។
ពិតណាស់ការបង្ហោះរូបភាពសាកសពគ្រប់ទម្រង់ គឺជារំលោភលើសិទ្ធិឯកជនរបស់សាកសព ហើយជាទង្វើដែលខ្វះសីលធម៌ និងសុជីវធម៌លើសាកសព និងជនរងគ្រោះ។ បើតាមវេជ្ជបណ្ឌិតចិត្តសាស្ត្រលោក ឈឹម សុធារ៉ា នាយកប្រតិបត្តិនៃអង្គការចិត្តសង្គមអន្តរវប្បធម៌ ការបង្ហោះរូបភាពបែបនេះ មិនត្រឹមតែធ្វើឲ្យដិតជាប់អារម្មណ៍អ្នកដែលបានឃើញទេ ប៉ុន្តែវាក៏អាចបណ្ដាលឲ្យកើតជំងឺថប់អារម្មណ៍ និងប៉ះពាល់ផ្លូវចិត្តផងដែរ។ «លើសពីនេះទៅទៀតបើសិនក្មេងជាអ្នកមើលរូបភាពទាំងនោះ នៅថ្ងៃអនាគតគេអាចនឹងក្លាយជាមនុស្សបង្កហិង្សាច្រើនក្នុងសង្គម និងអាចធ្វើអោយគេមិនចេះគោរពគ្នា ឬជួយគ្នាជាដើម»។ នេះជាការពន្យល់របស់លោក ឈឹម សុធារ៉ា ទាក់ទងបញ្ហាផ្លូវចិត្ត។
តាមពិតការបង្ហោះរូបភាពមិនគួរគប្បីទាំងនោះ ក៏មានចែងក្នុងច្បាប់ស្តីពីសិទ្ធិបុគ្គលផងដែរ។ បើតាមក្រមរដ្ឋប្បវេណីផ្នែកទី២ ស្ដីពីសិទ្ធិបុគ្គល មាត្រា១០ ស្ដីពីអត្ថន័យនៃសិទ្ធិបុគ្គល បានចែងថា «សិទ្ធិបុគ្គល សំដៅទៅលើសិទ្ធិដែលមានអត្ថន័យពាក់ព័ន្ធនឹងជីវិត រូបកាយ សុខភាព សេរីភាព នាមកិត្តិយស ភាពឯកជន ឬសិទ្ធិផ្សេងទៀតដែលជាផលប្រយោជន៍ទាក់ទងនឹងលក្ខណបុគ្គល»។
ចំណែកមាត្រា១៣ នៃក្រមរដ្ឋមវេណី ស្ដីពីសិទ្ធិទាមទារសំណងការខូតខាត បានចែងថា « បញ្ញត្តិនៃមាត្រា១១ (សិទ្ធិទាមទារឲ្យបញ្ឈប់) និងមាត្រា១២ (សិទ្ធិទាមទារឲ្យដកនូវលទ្ធផលនៃសកម្មភាពរំលោភ) នៃក្រមនេះមិនរារាំងការទាមទារសំណងការខូចខាត ដោយអ្នកដែលទទួលរងនូវការរំលោភផលប្រយោជន៍ទាក់ទង នឹងលក្ខណបុគ្គលនោះ ដោយយោងទៅតាមបញ្ញត្តិស្ដីពីអំពើរអនិត្សានុកូលបានឡើយ»៕
Tag:
សាកសព
រដ្ឋបវេណី
ជំងឺថប់អារម្មណ៍
បណ្ដាញសង្គម
FB
© រក្សាសិទ្ធិដោយ thmeythmey.com
