កីឡាជាតិ
ជាតិ
រដូវកាលបាល់ទាត់ឆ្នាំ២០១៨៖ ពានសម្តេច ហ៊ុន សែន នៅខែកុម្ភៈ លីគផ្តើមនៅខែមីនា ពានក្របខណ្ឌលីគឆ្នាំ២០១៧
× រដូវកាលឆ្នាំ២០១៧ចប់មិនបានប៉ុន្មានថ្ងៃផងសហព័ន្ធកីឡាបាល់ទាត់កម្ពុជាបានបង្ហាញកាលបរិច្ឆេទប្រកួតសម្រាប់រដូវកាលថ្មីឆ្នាំ២០១៨។ ក្នុងនោះពានរង្វាន់ក្របខណ្ឌមិត្តហ្វូនខេមបូឌានលីគនឹងបើករដូវកាលថ្មីរបស់ខ្លួននាដើមខែមីនា ខណៈពានរង្វាន់សម្តេច ហ៊ុន សែន បើកនៅសប្តាហ៍ទី១នៃខែកុម្ភៈ។
ការប្រកួតបាល់ទាត់ដណ្តើមពានរង្វាន់ក្របខណ្ឌមិត្តហ្វូនខេមបូឌានលីកប្រចាំឆ្នាំ២០១៨ នឹងបើករដូវកាលថ្មីរបស់់ខ្លួននៅថ្ងៃទី៣ ខែមីនា ឆ្នាំ២០១៨ ហើយគ្រោងបញ្ចប់នៅថ្ងៃ៣០ ខែកញ្ញា ឆ្នាំ២០១៨។ ទន្ទឹមនឹងនេះពានរង្វាន់សម្តេច ហ៊ុន សែន ប្រចាំឆ្នាំ២០១៨ នឹងបើករដូវកាលថ្មីនៅថ្ងៃទី៧ ខែកុម្ភៈ ឆ្នាំ២០១៨ ដោយគ្រោងបញ្ចប់នៅថ្ងៃទី៦ ខែតុលា ឆ្នាំ២០១៨។ នេះបើយោងតាមសេចក្តីប្រកាសព័ត៌មានរបស់សហព័ន្ធកីឡាបាល់ទាត់កម្ពុជាដែលចុះហត្ថលេខាដោយលោក ឌី វិជ្ជា ប្រធានគណៈកម្មការនាយកទទួលបន្ទុករៀបចំព្រឹត្តិការណ៍ទាំងនេះ។
សម្រាប់ការប្រកួតក្របខណ្ឌលីគកំពូលកម្ពុជារដូវកាលឆ្នាំ២០១៧ ដែលទើបបញ្ចប់កាលពីថ្ងៃទី៣០ ខែធ្នូ ឆ្នាំ២០១៧ បឹងកេតបន្តរក្សាតំណែងជើងឯកក្រោយឈ្នះក្រសួងការពារជាតិដោយបាល់ប៉េណាល់ទី ១០-៩ បន្ទាប់ពីប្រកួត១២០នាទីក្រុមទាំងពីររក្សាលទ្ធផលស្មើ ១-១។ ចំណែកក្រុមព្រះខ័នរាជស្វាយរៀងបញ្ចប់ក្នុងចំណាត់លេខ៣ក្រោយចាញ់ក្រសួងការពារជាតិ ៣-១ នៅវគ្គពាក់កណ្តាលផ្តាច់ព្រ័ត្រ ខណៈណាហ្គាវើលទទួលបានលេខ៤ក្រោយចាញ់ទ័ពដោយបាល់ប៉េណាល់ទី ៤-៣ នៅវគ្គ Play off។
ក្រុមជើងបឹងកេតទទួលបានថវិកាលើកទឹកចិត្តចំនួន៦០លានរៀល និងបានកៅអីវគ្គ Group Stage នៃពានរង្វាន់ AFC Cup ប្រចាំឆ្នាំ២០១៨ដោយស្វ័យប្រវត្តិ។ បឹងកេតស្ថិតក្នុងពូល F ជាមួយក្រុមសិង្ហបុរី Home United រួមទាំងក្រុមដែលតំណាងឲ្យលីគកំពូលហ្វីលីពីន និងមីយ៉ាន់ម៉ា។ ចំណែកក្រុមលេខ២ក្រសួងការពារជាតិទទួលបាន៤៦លានរៀល រីឯព្រះខ័នរាជស្វាយរៀងបាន៣៦លានរៀល និងណាហ្គាវើល៣០លានរៀល។
ក្រុមព្រះខ័នរាជស្វាយរៀងគ្រងជើងឯកពានរង្វាន់សម្តេច ហ៊ុន សែន ប្រចាំឆ្នាំ២០១៧ ក្រោយយកឈ្នះណាហ្គាវើល ៣-០ នាការប្រកួតវគ្គផ្តាច់ព្រ័ត្រកាលពីថ្ងៃទី២៧ ខែធ្នូ ឆ្នាំ២០១៧ នៅពហុកីឡដ្ឋានជាតិ។ ចំណែកក្រុមអគ្គិសនីកម្ពុជាឈរចំណាត់ថ្នាក់លេខ៣ក្រោយយកឈ្នះបឹងកេតដោយបាល់កាត់សេចក្តីក្នុងលទ្ធផល ៥-៤ ក្រោយក្រុមទាំងពីររក្សាលទ្ធផលស្មើ ១-១។
ក្រៅពីពាន និងមេដាយមាស ក្រុមម្ចាស់ជើងឯកព្រះខ័នរាជស្វាយរៀងទទួលបានថវិកាលើកទឹកចិត្ត៨០លានរៀល រីឯជើងឯករងណាហ្គាវើលបាន៤០លានរៀល និងក្រុមអគ្គិសនីកម្ពុជាបាន២០លានរៀល។ ជាមួយគ្នានេះសម្តេច ហ៊ុន សែន នាយករដ្ឋមន្ត្រីនៃប្រទេសកម្ពុជាបានឧបត្ថម្ភថវិកាចំនួន១០ម៉ឺនដុល្លារដល់គណៈកម្មការប្រកួតបាល់ទាត់ជាតិកម្ពុជា៕
Tag:
Cambodian League 2018
Hun Sen Cup 2018
© រក្សាសិទ្ធិដោយ thmeythmey.com