កីឡាជាតិ
ជាតិ
ចំណាត់ថ្នាក់អុកចត្រង្គជម្រើសជាតិ៖ វីរ៉ា លេខ១ សៅឌី លេខ២ លីមហេង លេខ៣ ឆយ វីរ៉ា ឡើងទទួលរង្វាន់ពីគណៈកម្មការរៀបចំការប្រកួត
× កីឡាករ ឆយ វីរ៉ា គ្រងជើងឯកការប្រកួតកីឡាអុកចត្រង្គជ្រើសរើសចំណាត់ថ្នាក់កីឡាករជម្រើសជាតិដើម្បីអបអរទិវាជ័យជម្នះ៧មករា ក្រោយ១៧ប្រកួតឈ្នះ១០ ស្មើ៥ និងចាញ់២។ ចំណែកស្តេចអុកចត្រង្គប្រចាំព្រឹត្តិការណ៍អង្គរសង្ក្រាន្តឆ្នាំ២០១៧ កីឡាករ ហេង សៅឌី បានត្រឹមជើងឯករងក្រោយឈ្នះ៩ ស្មើ៧ ចាញ់១។
ក្រោយឆ្លងកាត់ការប្រកួតយ៉ាងស្វិតស្វាញរយៈពេលពីរថ្ងៃកីឡាករ ឆយ វីរ៉ា បានក្លាយជាម្ចាស់ជើងឯកប្រចាំការប្រកួតជម្រើសចំណាត់ថ្នាក់កីឡាករជម្រើសជាតិកីឡាអុកចត្រង្គ។ ក្នុងចំណោម១៧ប្រកួតម្ចាស់ចំណាត់ថ្នាក់លេខ៣ព្រឹត្តិការណ៍អង្គរសង្ក្រាន្តឆ្នាំ២០១៧ទទួលបាន៣៥ពិន្ទុ ក្រោយយកឈ្នះគូប្រកួត១០លើក ស្មើ៥ និងចាញ់២លើក។
ជាមួយគ្នានេះស្តេចអុកចត្រង្គព្រឹត្តិការណ៍អង្គរសង្ក្រាន្តឆ្នាំ២០១៧ កីឡាករ ហេង សៅឌី ទទួលបានចំណាត់ថ្នាក់លេខ២ជាមួយពិន្ទុសរុប៣៤ពិន្ទុក្រោយឈ្នះគូប្រកួត៩ ស្មើ៧ និងចាញ់១។ ចំណែកចំណាត់ថ្នាក់លេខ៣បានទៅកីឡាករ សុខ លីមហេង ដែលមាន៣២ពិន្ទុក្រោយឈ្នះ៨ ស្មើ៨ និងចាញ់១ ខណៈលេខ៤ និងលេខ៥បានទៅកីឡាករ ប៊ិន គាសេង និងកីឡាករ រស់ រិទ្ធីយ៉ា ដោយទទួលបាន២៧ និង២៦ពិន្ទុជាបន្តបន្ទាប់។
ម្ចាស់ជើងឯក ឆយ វីរ៉ា ទទួលបានប្រាក់រង្វាន់លើកទឹកចិត្តចំនួន១លានរៀល រីឯស្តេចអុកចត្រង្គឆ្នាំ២០១៧ ហេង សៅឌី បាន៦០ម៉ឺនរៀលដុល្លារ ខណៈកីឡាករលេខ៣ សុខ លីមហេង បាន៣០ម៉ឺនរៀល។ ចំណែកកីឡាករលេខ៤ ប៊ិន គាសេង និងកីឡាករលេខ៥ រស់ រិទ្ធីយ៉ា ទទួលបាន២០ម៉ឺនរៀល និង១៥ម៉ឺនរៀលជាបន្តបន្ទាប់។ ក្រៅពីប្រាក់រង្វាន់សម្រាប់ម្ចាស់ជ័យលាភីក៏មានប្រាក់លើកទឹកចិត្តសម្រាប់អ្នកមិនទទួលបានជ័យលាភីផងដែរ។
ការប្រកួតកីឡាអុកចត្រង្គជ្រើសរើសចំណាត់ថ្នាក់កីឡាករជម្រើសជាតិ និងដើម្បីអបអរទិវាជ័យជម្នះ៧ ដែលប្រព្រឹត្តទៅចាប់ពីថ្ងៃទី៧ ដល់ថ្ងៃទី៨ ខែមករា ឆ្នាំ២០១៨ នៅទីស្នាក់ការ NOCC មានកីឡាករ១៨រូបចូលរួម។ ការប្រកួតធ្វើឡើងតាមរូបមន្តវិលជុំដោយកីឡាករម្នាក់ៗត្រូវប្រកួតចំនួន១៧ប្រកួត៕
Tag:
អុកចត្រង្គ
ឆយ វីរ៉ា
ហេង សៅឌី
© រក្សាសិទ្ធិដោយ thmeythmey.com