ជាតិ
នយោបាយជាតិ
តុលាការកំពូល ឲ្យលោក គឹម សុខ ជាប់ពន្ធនាគារមួយឆ្នាំកន្លះដដែល
× ភ្នំពេញ៖ ក្រោយបញ្ចប់សវនាការនៅព្រឹកថ្ងៃទី១0 ខែមករា ឆ្នាំ២0១៨នេះ តុលាការកំពូល ក៏ប្រកាសសាលដីកាភ្លាមៗ ដោយសម្រេចឲ្យលោក គឹម សុខ អ្នកវិភាគនយោបាយ ជាប់ពន្ធនាគារមួយឆ្នាំកន្លះដដែល។ លោក គឹម សុខ ជាប់ទោសទណ្ឌ ដោយសារតែចោទគណបក្សប្រជាជនកម្ពុជា ថានៅពីក្រោយខ្នងនៃអំពើឃាតកម្មលើលោក កែម ឡី។
ដោយសារតែអវត្តមានក្នុងសវនាការ លោក ជូង ជូងី មេធាវីរបស់លោក គឹម សុខ មិនប្រតិកម្មឬបកស្រាយអ្វីឡើយ ទៅនឹងការសម្រេចរបស់តុលាការកំពូល។ លោក ប្រាប់សារព័ត៌មានថ្មីៗយ៉ាងខ្លីថា លោក នឹងជួបពិភាក្សាជាមួយលោក គឹម សុខ ដើម្បីសម្រេចថាត្រូវធ្វើអ្វីបន្តទៀត។
មកដល់ពេលនេះ លោកមេធាវី ជូង ជូងី និងលោក គឹម សុខ បានដាក់បណ្តឹងសុំតវ៉ានៅគ្រប់តុលាការអស់ហើយ ចាប់តាំងពីសាលាដំបូងរាជធានីភ្នំពេញ សាលាឧទ្ធរណ៍ និងតុលាការកំពូល។ ប៉ុន្តែការតវ៉ាទាំងនេះ ទទួលបរាជ័យរហូត ដោយតុលាការទាំងបីថ្នាក់ យល់ឃើញដូចគ្នា ថាការសម្រេចឲ្យលោក គឹម សុខ ជាប់ពន្ធនាគាររយៈពេលមួយឆ្នាំកន្លះ គឺសមហេតុផល និងត្រឹមត្រូវតាមនីតិវិធី។
លោក គឹម សុខ រងបទចោទ «បរិហារកេរ្តិ៍ជាសាធារណៈ និង ញុះញង់ឲ្យប្រព្រឹត្តបទឧក្រិដ្ឋជាអាទិ៍» ហើយត្រូវបានតុលាការ ចាត់ទោសឲ្យជាប់ពន្ធគារមួយឆ្នាំកន្លះ កាលពីអំឡុងខែ សីហា ឆ្នាំ២0១៧។ លើសពីនេះ តុលាការ ក៏បង្គាប់ឲ្យលោក គឹម សុខ បង់ប្រាក់ ៨00លានរៀល ឲ្យទៅសម្តេច ហ៊ុន សែន ដែលជាដើមបណ្តឹងផងដែរ៕
Tag:
តុលាការ
គឹម សុខ
មេធាវី
© រក្សាសិទ្ធិដោយ thmeythmey.com