ជាតិ
សិល្បះ
សម្ដេចព្រះរាម បុប្ផាទេវី ដឹកនាំការសម្តែងរបាំក្បាច់បុរាណខ្មែរ ៣សម័យកាលរួមគ្នា រូបភាពពីហ្វេសប៊ុក Ballet Royal du Cambodge - របាំព្រះរាជទ្រព្យ
× ភ្នំពេញ៖ សម្ដេចព្រះរាម នរោត្ដម បុប្ផាទេវី ទ្រង់កំពុងដឹកនាំ និងរៀបចំយ៉ាងមមាញឹក នូវការសម្តែងរបាំក្បាច់បុរាណខ្មែរ ៣ សម័យកាលចូលគ្នា គឺសម័យកាលព្រះបាទសម្ដេចព្រះស៊ីសុវត្ថិ សម័យព្រះមហាក្សត្រិយ៍ ស៊ី សុវត្ថិ កុសមៈនារីរត្នសេរីវឌ្ឍនា និងសម័យបច្ចុប្បន្ន។ ការសម្តែងនេះ នឹងប្រព្រឹត្តទៅ នៅថ្ងៃទី១២ និងទី១៣ ខែមករានេះ នៅសាលសន្និសីទចតុមុខ។
ការរៀបចំឲ្យមានការសម្តែងរបាំក្បាច់បុរាណខ្មែឬ៣សម័យកាលរួមគ្នា គឺដើម្បីបង្ហាញកូនខ្មែរឱ្យដឹងពីការវិវឌ្ឍរបាំក្បាច់បុរាណខ្មែរ និងយល់ដឹងពីក្បាច់របាំពី១០០ឆ្នាំមុន ព្រះព្រះទ័យយកចិត្តទុកដាក់ និងប្រឹងប្រែងដោយផ្ទាល់ពីសម្ដេចព្រះរាម បុប្ផាទេវី។
បើតាមគ្រូបង្ហាត់របាំក្នុងស្នាដៃរបាំ១០០ឆ្នាំនេះ អ្នកស្រី វ័ន សាវ៉ាយ ការរៀបចំកម្មវិធីសម្ដែងនេះ គឺក្នុងបំណងបង្ហាញពីទម្រង់សិល្បៈតាំងពីបុរាណរបស់ខ្មែរ ឲ្យកូនខ្មែរបានឱ្យដឹងពីភាពខុសប្លែកគ្នារវាងរបាំបុរាណ និងល្ខោនខោល នៅពេលសម្ដែងរឿងរាមកេរ្ដិ៍ដូចគ្នា។ អ្នកស្រី វ័ន សាវ៉ាយ បានបន្តទៀតថា ការសម្តែងនេះ ក៏បង្ហាញពីការវិវឌ្ឍនៃរបាំ តាំងពីបុរាណរហូតមកដល់បច្ចុប្បន្ន ដោយស្ថិតក្នុងច្បាប់ដើមដដែល ហើយអ្វីដែលសំខាន់នោះ គឺដើម្បីឱ្យកូនខ្មែរឈប់យល់ច្រឡំថា ខ្មែរចម្លងក្បាច់របាំពីប្រទេសថៃទៀត។ អ្នកស្រី វ័ន សាវ៉ៃ បន្ថែមថា៖«ពេលដែលយើងលើកយករបាំក្បាច់បុរាណតាំងពី១០០ឆ្នាំមុនមករាំ បែរជាកូនខ្មែរយល់ថាយើងចម្លងពីថៃទៅវិញ។ តាមពិតរបាំយើង កើតមានតាំងពីយូរ ហើយប្រទេសថៃទើបតែកើតក្រោយយើងទេ។ យើងសម្ដែងនេះ ដើម្បីឱ្យពួកគាត់ឈប់យល់ច្រឡំទៀត ម្យ៉ាងឱ្យគាត់បានស្វែងយល់កាន់តែច្បាស់ពីក្បាច់របាំខ្មែរយើង»។
សម័យកាលទាំង៣ គឺមានសម័យព្រះបាទសម្ដេចព្រះស៊ីសុវត្ថិ ដែលនឹងរាំរបាំបួងសួង សម័យព្រះមហាក្សត្រិយ៍ ស៊ី សុវត្ថិ កុសមៈនារីរត្នសេរីវឌ្ឍនា សម្ដែងរឿងរាមកេរ្តិ៍ ដែលមានទាំងរបាំបុរាណ និងល្ខោនខោល។ ចំណែកសម័យបច្ចុប្បន្ន សម្ដែងរបាំអប្សរា និងរបាំទេពមនោរម្យ។
តម្លៃសំបុត្រក្នុងការសម្ដែងនេះមានតម្លៃ ៥០ដុល្លារ ៤០ដុល្លារ ២៥ដុល្លារ និង៦ដុល្លារ។ សម្ដែងថ្ងៃទី១២ ម៉ោង៦និង៣០នាទីដល់ម៉ោង៨យប់ ថ្ងៃទី១៣មានពីរពេល នៅម៉ោង ៣និង៣០នាទី ដល់ម៉ោង៥ល្ងាច និងម៉ោង៦និង៣០នាទីដល់ម៉ោង៨យប់៕
Tag:
របាំបុរាណ
សម្តេចព្រះរាមបុប្ផាទេវី
របាំអប្សរា
របាំបួងសួង
© រក្សាសិទ្ធិដោយ thmeythmey.com