ភ្នំពេញ៖ ថ្លែងបើកកិច្ចប្រជុំកំពូលមេដឹកនាំកិច្ចសហប្រតិបត្តិការមេគង្គ-ឡានឆាងលើកទីពីរ សម្តេច ហ៊ុន សែន នាយករដ្ឋមន្ត្រីកម្ពុជា និងជាសហប្រធាននៃកិច្ចប្រជុំបានលើកឡើងពីតួនាទីសំខាន់យន្តការកិច្ចសហប្រតិបត្តិការអនុតំបន់នេះក្នុងការធានាបាននូវសន្តិភាព និងស្ថិរភាពតំបន់មេគង្គ។ បើតាមសម្តេច កិច្ចសហប្រតិបត្តិការនេះអនុវត្តតាមគោលការណ៍មិនជ្រៀតជ្រែកកិច្ចការផ្ទៃក្នុង និងគោរពផលប្រយោជន៍គ្នាទៅវិញទៅមក។
នាយករដ្ឋមន្ត្រីកម្ពុជាសម្តេច ហ៊ុន សែន បានថ្លែងថាយន្តការសហប្រតិបត្តិការអនុតំបន់មេគង្គ-ឡានឆាង នឹងធានាបាននូវសន្តិភាព និងស្ថិរភាពតំបន់ដោយសារឈរយន្តការនេះឈរលើគោលការណ៍គ្រឹះសំខាន់ៗជាពិសេសការគោរពគ្នាទៅវិញទៅមក និងមិនជ្រៀតជ្រែកកិច្ចការផ្ទៃក្នុងប្រទេសជាមិត្ត។
សម្តេចបានរម្លឹកផងដែរថា វាជារឿងមោទនភាព និងកិត្តិយសសម្រាប់កម្ពុជាដែលបានរៀបចំកិច្ចប្រជុំកំពូលលើកទីពីរនៃថ្នាក់ដឹកនាំតំបន់មេគង្គនេះ។ ចំណែកការជ្រើសរើសយកមូលបទពាក់ព័ន្ធសន្តិភាពនេះបង្ហាញឲ្យឃើញពីការផ្តល់តម្លៃរបស់កម្ពុជាលើសន្តិភាព ស្របពេលដែលភាពមិនច្បាស់លាស់នៃភូមិសាស្ត្រនយោបាយ និងសេដ្ឋកិច្ចបន្តកើនឡើងនោះ។
សម្តេចបានថ្លែងថា៖«សម្រាប់កម្ពុជា កិច្ចប្រជុំនេះមានន័យជ្រាលជ្រៅណាស់ ហើយវាមិនមែនជារឿងចៃដន្យឡើយដែលកម្ពុជាជ្រើសរើសយកប្រធានបទ ទន្លេរបស់យើងដើម្បីសន្តិភាព និងការអភិវឌ្ឍប្រកបដោយចីរភាព»។
«សន្តិភាពប្រកបដោយនិរន្តរភាព និងការអភិវឌ្ឍយូរអង្វែងត្រូវតែជារឿងអាទិភាព និងដើរទៅមុខទន្ទឹមគ្នា។ យើងមិនអាចមើលរំលងចំណុចទាំងពីរនេះបានឡើយ។ ស្របពេលដែលភាពមិនច្បាស់ក្នុងតំបន់ និងក្នុងពិភពលោកផ្លាស់ប្តូរយ៉ាងឆាប់រហ័សទាំងនយោបាយ និងសេដ្ឋកិច្ច តំបន់មេគង្គរបស់យើងនឹងក្លាយជាកន្លែងដែលត្រូវឆ្លងកាត់សាកល្បងជាថ្មីទៀត»។ សម្តេច ហ៊ុន សែនបានបន្តដូច្នេះ។
ក្នុងសុន្ទរកថានេះដែរ សម្តេចបានឆ្លៀតរម្លឹកឡើងវិញពីប្រវត្តិសាស្ត្រជូរចត់ដែលកើតឡើងនៅកម្ពុជា ក៏ដូចជានៅក្នុងតំបន់កន្លងមកផងដែរ ដែលវាកើតឡើងដោយសារការសាកល្បងការប្រកួតប្រជែងអំណាច ជ្រៀតជ្រែកកិច្ចការផ្ទៃក្នុងប្រទេសតូចៗពីសំណាក់ប្រទេសមហាអំណាច ក៏ដូចជាសង្គ្រាមមនោគមន៍វិជ្ជានោះ។
សម្តេច ហ៊ុន សែន បានគូសបញ្ជាក់ដូច្នេះថា៖ «តាមប្រវត្តិសាស្ត្រ តំបន់របស់យើងត្រូវបានបំផ្លិចបំផ្លាញខ្ទេចខ្ទាំដោយសារសង្គ្រាម និងការប្រកួតប្រជែងមនោគមន៍វិជ្ជា។ សម្រាប់កម្ពុជា ខ្ញុំផ្ទាល់នៅចង់ចាំដ៏ជូរចត់នូវការ ជ្រៀតជ្រែកពីខាងក្រៅ ដែលធ្វើឲ្យមានចលាចល និងភាពរឹកវរ ដែលបានបំផ្លិចបំផ្លាញសន្តិភាព និងស្ថិរភាពរបស់យើង ហើយបានរារាំងការអភិវឌ្ឍអស់ជាច្រើនទសវត្សរ៍»។
ចំពោះមុខមេដឹកនាំប្រទេសមេគង្គប្រាំផ្សេងទៀត សម្តេច ហ៊ុន សែន បានសង្កត់ធ្ងន់ថា បទពិសោធន៍ជូរចត់នេះបង្ហាញថា សន្តិភាពនៅក្នុងតំបន់អាចសម្រេចបានតាមរយៈការគោរពអធិបតេយ្យ និងបូរណភាពដែនដីគ្នា និងមិនជ្រៀតជ្រែកកិច្ចការផ្ទៃក្នុងគ្នា ហើយវាស្របទៅនឹងគោលការណ៍រួមរបស់កិច្ចសហប្រតិបត្តិការមេគង្គ-ឡានឆាងផងដែរ។
«ចំណុចនេះ វាស្របនឹងតម្លៃកិច្ចការសហប្រតិបត្តិការមេគង្គ-ឡានឆាង ដែលផ្តោតលើការរក្សាសន្តិភាពពេញលេញ ផ្អែកលើគោលការណ៍ គោរពគ្នាទៅវិញទៅមក មិនជ្រៀតជ្រែកកិច្ចការផ្ទៃក្នុង គោរពមតិឯកច្ឆន្ទ ពិគ្រោះយោបល់ គោរពធម្មនុញ្ញអង្គការសហប្រជាជាតិ»៕