ភ្នំពេញ៖ នាយករដ្ឋមន្ត្រីចិន និងជាសហប្រធាននៃកិច្ចសហប្រតិបត្តិការមេគង្គ-ឡានឆាង លោក លី ខឹឈាំង បាននិយាយថា ភាគីទាំង៦នៃអនុតំបន់នេះ នឹងទទួលផលប្រយោជន៍ទៅវិញទៅមក តាមរយៈគោលការណ៍កុងសង់ស៊ីស និងសមភាព ។ ប៉ុន្តែអ្វីដែលលោក លី ខឹឈាំង មើលឃើញគោលដៅសម្រេចបានផលប្រយោជន៍នោះ គឺការអនុវត្តដោយភាពត្រឹមត្រូវ ពោលមិនមែនប្រើតែបបូរមាត់នោះទេ។
ឯកសារចំនួនពីរត្រូវបានអនុម័ត នៅក្នុងកិច្ចប្រជុំកំពូលមេដឹកនាំយន្តការកិច្ចសហប្រតិបត្តិការមេគង្គ-ឡានឆាង (MLC) លើកទី២ ដែលកម្ពុជាធ្វើជាម្ចាស់ផ្ទះ កាលពីថ្ងៃទី១០ មករា។ ឯកសារនោះ មានសេចក្តីថ្លែងការណ៍ទីក្រុងភ្នំពេញ ដែលលើកពីសមិទ្ធផលនៃកិច្ចសហប្រតិបត្តិរវាងប្រទេសក្នុងតំបន់មេគង្គ-ឡានឆាង ក្នុងរយៈពេល២ឆ្នាំកន្លងមក និងផែនការសកម្មភាពរយៈពេល៥ឆ្នាំ (២០១៨-២០២២) ក្នុងទិសដៅបម្រើផលប្រយោជន៍រួមគ្នា ដល់ប្រទេសនៃតំបន់មេគង្គ-ឡានឆាង។
ក្នុងនាមជាសហប្រធានអចិន្ត្រៃយនៃអនុតំបន់នេះ នាយករដ្ឋមន្ត្រីចិន លោក លី ខឹឈាំង បានប្រកាសត្រៀមខ្លួនជាស្រេចក្នុងការសហការជាមួយប្រទេសទាំង៥ក្នុងតំបន់ទន្លេមេគង្គ ដើម្បីសម្រេចបាននូវកិច្ចសហប្រតិបត្តិការឈ្នះ-ឈ្នះ ក្នុងទិសដៅធានាបាននូវសន្តិភាព និងស្ថិរភាពតំបន់មេគង្គ-ឡានឆាង។ តាមរយៈការប្រកាសជំហនេះ លោក លី ខឹឈាំង ក៏មិនភ្លេចលើកពីភារកិច្ចរបស់ចិន ដែលត្រូវគោរពតាមសន្យាដោះស្រាយបញ្ហាតំបន់មេគង្គផងដែរ។
ថ្លែងក្នុងសន្និសីទកាសែត ក្រោយបញ្ចប់កិច្ចប្រជុំ នាយករដ្ឋមន្ត្រីចិន បាននិយាយជាភាសាចិន ដោយមានការបកសប្រែជាភាសាខ្មែរដូច្នេះថា៖«ទី១ចិនមានភារកិច្ចទទួលខុសត្រូវគោរពតាមការសន្យារបស់ខ្លួន ទី២ព្រោះប្រទេសចិន និងបណ្ដាប្រទេសតាមដងទន្លេមេគង្គទាំង៥ យើងបរិភោគទឹកចេញពីប្រភពតែមួយ គឺទន្លេឡានឆាង និងមេគង្គ។ ហើយបញ្ហាអ្នកនៅខាងលើ និងប្រទេសក្រោមទន្លេដែលតែងតែមានញ្ហាជាមួយគ្នា ហើយយើងនឹងដោះស្រាយបញ្ហានេះ ដោយសម្របសម្រួលរវាងប្រទេសនៅតាមតំបន់ទន្លេ។ ចិនត្រៀមខ្លួនជាស្រេចក្នុងការសហការជាមួយប្រទេសទាំង៥ ដើម្បីសម្រេចបាននូវកិច្ចសហប្រតិបត្តិការឈ្នះ-ឈ្នះ …»។
ប៉ុន្តែបើការចូលរួមអនុវត្ត មិនគោរពតាមគោលការកុងសង់ស៊ី និងសមភាពទេនោះ ការទទួលបានផលប្រយោជន៏ពីកិច្ចសហប្រតិបត្តិការមេគង្គ-ឡានឆាង នេះក៏មិនអាចកើតមានដែរ។ ក្នុងន័យនេះលោក លី ខឹឈាំង ជំរុញឲ្យប្រទេសតំបន់មេគង្គទាំងអស់អនុវត្តភារកិច្ចដោយភាពត្រឹមត្រូវ ពោលមិនមែនប្រើតែបបូរមាត់នោះទេ ។ «កិច្ចសហប្រតិបត្តិការមេគង្គ-ឡានឆាង មិនមែនជាកន្លែង ដែលនិយាយចេញតែពីបបូរមាត់ទេ គឺយើងនិយាយពីគោលការណ៍សំខាន់នៃកិច្ចប្រជុំនេះ នៃការគោរពគ្នាទៅវិញទៅមក ដោយស្មើភាព ដើម្បីការអភិវឌ្ឍរួម។ ចំណុចសំខាន់នោះ យើងត្រូវមានសកម្មភាពជាក់ស្ដែង ដើម្បីជំរុញក្របខណ្ឌ MLC ដើម្បីធានាធា យើងទទួលបានលទ្ធផលពិតប្រាកដ។ យើងមានកុងសង់ស៊ី និងស្មារតីរួម ប៉ុន្តែអ្វីដែលសំខាន់នោះ គឺសកម្មភាពជាក់ស្ដែង»។ នេះបើតាមលោកលោក លី ខឹឈាំង ។
ចំពោះមុខមេដឹកនាំប្រទេសមេគង្គប្រាំផ្សេងទៀត សម្តេច ហ៊ុន សែន បានសង្កត់ធ្ងន់ថា កត្ដាសន្តិភាពនៅក្នុងតំបន់អាចសម្រេចបានតាមរយៈការគោរពអធិបតេយ្យ និងបូរណភាពដែនដីគ្នា និងមិនជ្រៀតជ្រែកកិច្ចការផ្ទៃក្នុងគ្នា ហើយវាស្របទៅនឹងគោលការណ៍រួមរបស់កិច្ចសហប្រតិបត្តិការមេគង្គ-ឡានឆាងផងដែរ។ ប្រមុខរដ្ឋាភិបាល បានថ្លែងដូច្នេះថា៖«ចំណុចនេះ វាស្របនឹងតម្លៃកិច្ចការសហប្រតិបត្តិការមេគង្គ-ឡានឆាង ដែលផ្តោតលើការរក្សាសន្តិភាពពេញលេញ ផ្អែកលើគោលការណ៍នៃការ គោរពគ្នាទៅវិញទៅមក មិនជ្រៀតជ្រែកកិច្ចការផ្ទៃក្នុង គោរពមតិឯកច្ឆន្ទ ពិគ្រោះយោបល់ គោរពធម្មនុញ្ញអង្គការសហប្រជាជាតិ»។
សូមបញ្ជាក់ថា កិច្ចប្រជុំកំពូលថ្នាក់ដឹកនាំមេគង្គ-ឡានឆាងលើកទីពីរនេះមានមូលបទ «ទន្លេរបស់យើងដើម្បីសន្តិភាព និងការអភិវឌ្ឍប្រកបដោយចីរភាព» ហើយមេដឹកនាំប្រទេសទាំង៦ បានពិភាក្សាលើបញ្ហាសំខាន់ៗដើម្បីអភិវឌ្ឍតំបន់អនុមេគង្គ។ ការពង្រីកទំនាក់ទំនង និងកំណត់កិច្ចសហប្រតិបត្តិការថ្មី ធ្វើឡើងក្រោមក្របខណ្ឌកិច្ចសហប្រតិបត្តិការបីបូកប្រាំ។ ក្របខណ្ឌកិច្ចសហប្រតិបត្តិការបីបូកប្រាំនេះសំដៅសរសរស្តម្ភបីបូករួមជាមួយវិស័យអាទិភាពចំនួនប្រាំដែលត្រូវបានកំណត់ដោយកិច្ចប្រជុំមេដឹកនាំកិច្ចសហប្រតិបត្តិការមេគង្គ-ឡានឆាងលើកទី ១។
សរសរស្តម្ភទាំងបីនោះមាននយោបាយ-សន្តិសុខ, សេដ្ឋកិច្ច និងការអភិវឌ្ឍ រួមជាមួយសង្គម និងទំនាក់ទំនងប្រជាជនទៅប្រជាជន។ ចំណែកវិស័យអាទិភាពចំនួនប្រាំមានដូចជាការផ្សាភ្ជាប់, កិច្ចសហប្រតិបត្តិការជំរុញសមត្ថភាពផលិត, កិច្ចសហប្រតិបត្តិសេដ្ឋកិច្ចឆ្លងដែន, កិច្ចសហប្រតិបត្តិការនៃការគ្រប់គ្រងទឹក និងកសិកម្ម និងកិច្ចសហប្រតិបត្តិការក្នុងការកាត់បន្ថយភាពក្រីក្រ៕