លីកបារាំងផ្អាកប្រើបច្ចេកវិទ្យា Goal-line ដោយសារឃើញកំហុសបច្ចេកទេស

កីឡាអន្តរជាតិ

អន្តរជាតិ

លីកបារាំងផ្អាកប្រើបច្ចេកវិទ្យា Goal-line ដោយសារឃើញកំហុសបច្ចេកទេស

13, Jan 2018 , 9:19 pm

រូបភាព

ដោយ: ទេព ពិទូរ្យ

សហព័ន្ធកីឡាបាល់ទាត់បារាំង (LFP) បានសម្រេចផ្អាកប្រើប្រាស់បច្ចេកវិទ្យា Goal-line Technology ដែលជាឧបករណ៍ជំនួយអាជ្ញាកណ្ដាលដើម្បីដឹងថាបាល់ចូល ឬមិនចូល បន្ទាប់ពីមានកំហុសបច្ចេកទេសពីរលើកក្នុងការប្រកួតវគ្គពាក់កណ្តាលផ្តាច់ព្រ័ត្រ League Cup នៅសប្តាហ៍នេះ។

ទីភ្នាក់ងារសារព័ត៌មាន AFP បានផ្សាយថា បច្ចេកវិទ្យា GoalControl មិនបានផ្តល់សញ្ញាដល់លោកអាជ្ញាកណ្តាលសម្រាប់គ្រាប់បាល់ចូលទីទី២ របស់ Paris St-Germain ដែលធ្វើបានដោយ Adrien Rabiot នាការប្រកួតជាមួយ Amiens ក្នុងពានរង្វាន់ League Cup នោះទេ ទាល់តែអាជ្ញាកណ្តាលទៅពិនិត្យជាមួយវីដេអូជំនួយការអាជ្ញាកណ្តាល (video assistant referee) ទើបដឹងថាបាល់ចូលទី។

កំហុសដូចគ្នានេះដែរ ក៏បានកើតឡើងអំឡុងការប្រកួតរវាង Angers និង Montpellier ដោយនាឡិការមិនបានញ័របញ្ជាក់ថាបាល់បានចូលទីឡើយ ហើយអាជ្ញាកណ្តាលបានសម្រេចមិនប្រើបច្ចេកវិទ្យានេះនៅតង់ទី២តែម្តង។

Goalline Technology ដែលត្រូវបានប្រើប្រាស់នៅក្នុងលីកបាល់ទាត់បារាំងចាប់តាំងពីឆ្នាំ ២០១៥ ត្រូវបានគេព្រមានរួចទៅហើយកាលពីខែមុន ក្រោយពីមានកំហុសបច្ចេកទេសនៅដើមរដូវកាល ហើយ LFP បានបញ្ជាក់ពីការផ្អាកឧបករណ៍នេះកាលពីថ្ងៃព្រហស្បតិ៍ ទី១១ ខែមករា ដោយបញ្ជាក់ថា ក្រុមប្រឹក្សាភិបាលរបស់ខ្លួននឹងជួបប្រជុំនៅសប្តាហ៍ក្រោយដើម្បីពិភាក្សាអំពីបញ្ហានេះបន្តទៀត៕