អន្តរជាតិ
ជាង២០ប្រទេសជួបគ្នានៅកាណាដា រកផ្លូវដាក់ទណ្ឌកម្មលើកូរ៉េខាងជើង តែចិន និងរុស្ស៊ីអវត្តមាន រដ្ឋមន្រ្តីការបរទេសអាមេរិក និងកាណាដា នឹងធ្វើជាសហប្រធានកិច្ចប្រជុំស្ដីពីកូរ៉េខាងជើង (រូបភាព៖ National Observer)
× រដ្ឋមន្ត្រីការបរទេសមកពីជាង២០ប្រទេស នឹងជួបជុំគ្នានៅទីក្រុង Vancouver ប្រទេសកាណាដា ដើម្បីពិភាក្សារកមធ្យោបាយ ទប់ស្កាត់មហិច្ឆតានុយក្លេអ៊ែរកូរ៉េខាងជើង តាមរយៈទណ្ឌកម្មសេដ្ឋកិច្ច និងការទូត។ ប៉ុន្តែប្រមុខការទូតចិន និងរុស្ស៊ី ដែលជាសម្ព័ន្ធមិត្តរបស់កូរ៉េខាងជើង មិនមានឈ្មោះក្នុងកិច្ចប្រជុំអន្តរជាតិនេះឡើយ។ អវត្តមានមហាអំណាចទាំងពីរ នឹងបង្ករាំងស្ទះដល់ការអនុវត្តសេចក្ដីសម្រេចណាមួយរបស់ជំនួបនេះ។
កាណាដា និងអាមេរិក នឹងធ្វើជាសហប្រធានកិច្ចប្រជុំ Vancouver ស្ដីពីបញ្ហាកូរ៉េខាងជើងនៅថ្ងៃទី១៦ ខែមករា ដោយមានរដ្ឋមន្ត្រីការបរទេសមកពីប្រទេសជិត២០ចូលរួម តែអវត្តមានចិន និងរុស្ស៊ី។ កិច្ចប្រជុំអន្តរជាតិនេះ ធ្វើឡើងស្របពេលដែលស្ថានការណ៍នៅឧបទ្វីបកូរ៉េ បានធូរស្រាលគួរឲ្យកត់សម្គាល់ ក្រោយការជួបចរចាគ្នាថ្នាក់មន្ត្រីជាន់ខ្ពស់ នៃកូរ៉េទាំងពីរ កាលពីសប្ដាហ៍មុន និងនៅដើមសប្ដាហ៍នេះដែរ។
ការស្វែងរកមធ្យោបាយដាក់សម្ពាធសេដ្ឋកិច្ច និងការទូតលើកូរ៉េខាងជើង គឺជារបៀបវារៈសំខាន់នៃជំនួបនេះ ព្រោះទណ្ឌកម្មជាច្រើនកន្លងមក ហាក់មិនទាន់មានប្រសិទ្ធភាពខ្លាំងក្លា នៅឡើយ ហើយកូរ៉េខាងជើង នៅបន្តធ្វើសកម្មភាពផ្គើនអន្តរជាតិដដែល។ អាមេរិក និងសម្ព័ន្ធមិត្តរបស់ខ្លួន កំពុងស្វះស្វែងរកច្រកចេញថ្មីៗទៀត ដើម្បីបង្ខំឲ្យកូរ៉េខាងជើង បោះបង់មហិច្ឆតារបស់ខ្លួន ជាពិសេសការទប់ស្កាត់សកម្មភាពនៅសមុទ្រ និងការរឹតត្បិត ប្រាក់ចំណូលរបស់រដ្ឋកុម្មុយនីស្តមួយនេះ។
បើតាមទីភ្នាក់ងារព័ត៌មាន Reuters ប្រទេសដែលចូលរួមភាគច្រើន សុទ្ធតែធ្លាប់បញ្ជូនកងទ័ពរបស់ខ្លួន ទៅប្រយុទ្ធក្នុងសង្គ្រាមកូរ៉េឆ្នាំ១៩៥០ ដល់ឆ្នាំ១៩៥៣ ដែលបញ្ចប់ទៅដោយការបែងចែកកូរ៉េជាពីរ។ យ៉ាងណាមិញ កូរ៉េខាងជើង នឹងមិនបោះបង់កម្មវិធីនុយក្លេអ៊ែររបស់ខ្លួន ដោយងាយឡើយ និងចាត់ទុកជាអាយុជីវិតទៅទៀត។ ម្ដងហើយម្ដងទៀត កូរ៉េខាងជើងក៏ប្រកាសក្ដែងៗថា នុយក្លេអ៊ែរនេះ មិនមែនសម្រាប់ចរចាទេ ហើយគោលដៅរបស់អាវុធនេះ គឺអាមេរិក។
បញ្ហាមួយទៀតសម្រាប់កិច្ចប្រជុំនេះ គឺអវត្តមានចិន និងរុស្ស៊ីតែម្ដង ដែលមានតួនាទីសំខាន់ក្នុងសំណុំរឿងនុយក្លេអ៊ែររបស់កូរ៉េខាងជើង។ ចិន ជាសម្ព័ន្ធមិត្តជិតស្និទ្ធជាងគេ និងជាដៃគូពាណិជ្ជកម្មធំជាងគេ របស់កូរ៉េខាងជើង។ ចិនមិនសូវសប្បាយចិត្តឡើយ នឹងកិច្ចប្រជុំនេះ។ អ្នកនាំពាក្យក្រសួងការបរទេសចិន ធ្លាប់និយាយថា កិច្ចប្រជុំដែលមិនអញ្ជើញភាគីសំខាន់ចូលរួម នឹងមិនអាចស្វែងរកដំណោះស្រាយ ឲ្យបានលឿនបានឡើយ។
ទោះជាមិនបានអញ្ជើញចិនក្ដី លោក Brian Hook ប្រធានរៀបចំផែនការគោលនយោបាយរបស់ ក្រសួងការបរទេសអាមេរិកនិយាយថា ចិននឹងត្រូវបានផ្ដល់ព័ត៌មានពិស្ដារ ពេលកិច្ចប្រជុំត្រូវបានបញ្ចប់។ ប៉ុន្តែសម្រាប់ចិន យន្តការដើម្បីដោះស្រាយសំណុំរឿងនុយក្លេអ៊ែររបស់កូរ៉េខាងជើង គឺកិច្ចចរចា៦ភាគី ដែលជាប់គាំងជាច្រើឆ្នាំ និងនៅឯក្រុមប្រឹក្សាសន្តិសុខអង្គការសហប្រជាជាតិ៕
Tag:
ចិន
រុស្ស៊ី
អាមេរិក
កូរ៉េខាងជើង
© រក្សាសិទ្ធិដោយ thmeythmey.com