អគារព្យាបាលជំងឺមហារីកនៅមន្ទីរពេទ្យកាល់ម៉ែត ត្រូវបានសង់ក្នុងទំហំទឹកប្រាក់ជាង២៣លានដុល្លារ

ជាតិ

អគារព្យាបាលជំងឺមហារីកនៅមន្ទីរពេទ្យកាល់ម៉ែត ត្រូវបានសង់ក្នុងទំហំទឹកប្រាក់ជាង២៣លានដុល្លារ

15, Jan 2018 , 11:59 am

រូបភាព

ដោយ: ថ្មីៗ

ភ្នំពេញ៖ រដ្ឋាភិបាល ដាក់ឲ្យដំណើការអគារព្យាបាលជំងឺមហារីក និងសម្ភពថ្មីមួយជាផ្លូវការ នៅបរិវេណមន្ទីរពេទ្យកាល់ម៉ែត នៅថ្ងៃទី១៥ មករានេះ ។ អគារព្យាបាលជំងឺមហារីកនេះ ត្រូវបានសាងសង់ឡើង នៅក្នុងទំហំទឹកប្រាក់ជាង២៣លានដុល្លារអាមេរិក។

មជ្ឍមណ្ឌលជាតិជំងឺមហារីក និងសម្ភពនេះ សាងសង់ឡើងអំពីបេតុងមានទទឹង ៤០,៥០ម៉ែត្រ បណ្តោយ ៤៨,៦០ម៉ែត្រ មានកម្ពស់ ៩ជាន់។ អគារព្យាបាលជំងឺមហារីក ត្រូវបានសាងសង់អស់ទឹកប្រាក់ ២៣,០៤៨,៤៥២ ដុល្លារអាមេរិក និងមានការបំពាក់គ្រឿងបរិក្ខាទំនើបៗ សម្រាប់ការព្យាបាលជំងឺមហារីកផងដែរ។ នេះបើតាមរដ្ឋមន្ត្រីក្រសួងសុខាភិបាល លោក ម៉ម ប៊ុនហេង ដែលអានរបាយការណ៍ចំពោះមុខនាយករដ្ឋមន្ត្រី ហ៊ុន សែន។

លោក ម៉ម ប៊ុនហេង បានបន្ថែមថា ឧបករណ៍សម្ភារមួយចំនួនជាថវិកាស្វយ័ត សន្សំរំលស់របស់មន្ទីរពេទ្យកាល់ម៉ែត មានទឹកប្រាក់ ១៧,៣៨៨,៣០២ ដុល្លារ និងសម្ភារជាអំណោយរបស់មន្ទីរពេទ្យប្រទេសបារាំង គិតតម្លៃជាទឹកប្រាក់ ៣,២១៥,៧៦៤ ដុល្លារ។ ក្រៅពីនេះ មានជំនួយជាសម្ភារ បរិក្ខាវេជ្ជសាស្ត្រ និងបណ្តុះបណ្តាលគ្រូពេទ្យជំនាញ ពីទីភ្នាក់ងារថាមពលនុយក្លេអ៊ែរអន្តរជាតិ (IAEA) មានទឹកប្រាក់ចំនួន ២,៤៤៤,៣៨៥ ដុល្លារ ។

តាមការប៉ាន់ស្មាន ម៉ាស៊ីនបាញ់កាំរស្មីអាចបម្រើសេវា សម្រាប់អ្នកជំងឺមហារីក បានប្រមាណពី៧០០ ទៅ ១,០០០នាក់ ក្នុង១ឆ្នាំ។ បច្ចុប្បន្ន អគារមជ្ឍមណ្ឌលជាតិជំងឺមហារីក មាន ៥៣គ្រែ និងសម្ភពថ្មីមាន ៨៥គ្រែ ព្រមទាំងបន្ទប់សម្រាលកូនទំនើប។ នេះបើតាម លោក ម៉ម ប៊ុនហេង។

មន្ទីរពេទ្យកាល់ម៉ែត ត្រូវបានសាងសង់ក្នុងអំឡុងឆ្នាំ១៩៥៨-១៩៦០ ដោយមានឈ្មោះថា «មូលនិធិកាល់ម៉ែត»។ ប៉ុន្តែ«មូលនិធិកាល់ម៉ែត» ត្រូវបានប្ដូរឈ្មោះមកជាមន្ទីរពេទ្យកាល់ម៉ែតវិញ បន្ទាប់កម្ពុជារួចផុតពីសង្គ្រាម ៕