អន្តរជាតិ
នាយករដ្ឋមន្ត្រីអ៊ីស្រាអែល ខកចិត្តដែលឥណ្ឌាមិនទទួលស្គាល់ហ្ស៊េរុយសាឡិមជារដ្ឋធានីរបស់ខ្លួន
× នាយករដ្ឋមន្ត្រីអ៊ីស្រាអែល បេនចាមិន ណេតាន់យ៉ាហ៊ូ បានបង្ហាញការខកចិត្តចំពោះឥណ្ឌាដែលមិនព្រមទទួលស្គាល់ក្រុងហ្ស៊េរុយសាឡិមជារដ្ឋធានីរបស់អ៊ីស្រាអែល។ ប៉ុន្តែប្រមុខរដ្ឋាភិបាលរូបនេះបានបញ្ជាក់ថា លោកមិនបណ្តោយឲ្យបញ្ហានេះធ្វើឲ្យប៉ះពាល់ដល់ទំនាក់ទំនងទ្វេភាគី និងទស្សនកិច្ចប្រវត្តិសាស្ត្រកន្លងមក។
រដ្ឋាភិបាលអ៊ីស្រាអែលមិនពេញចិត្តទាល់តែសោះចំពោះជំហរអព្យាក្រឹត្យរបស់រដ្ឋាភិបាលឥណ្ឌាដែលមិនព្រមទទួលស្គាល់ក្រុងហ្ស៊េរុយសាឡិមជារដ្ឋធានីរបស់អ៊ីស្រាអែល និងថ្កោលទោសអាមេរិកដែលទទួលស្គាល់ទីក្រុងពិសិដ្ឋនេះជាផ្នែកមួយរបស់អ៊ីស្រាអែលកាលពីដើមខែធ្នូឆ្នាំមុន។
យោងតាមទីភ្នាក់ងារព័ត៌មាន AFP នាយករដ្ឋមន្ត្រីអ៊ីស្រាអែលលោក បេនចាមិ ណេតាន់យ៉ាហ៊ូ បានបង្ហាញការខកចិត្តចំពោះជំហររបស់មហាយក្សអាស៊ីខាងត្បូងឥណ្ឌាដែលមិនគាំទ្រការទទួលស្គាល់ក្រុងហ្ស៊េរុយសាឡិម ក្នុងពេលដែលលោកបំពេញទស្សនកិច្ចនៅអ៊ីស្រាអែលរយៈពេលប្រាំមួយថ្ងៃ។
លោក ណេតាន់យ៉ាហ៊ូ បានបញ្ជាក់ដូច្នេះ៖« ជាធម្មតាខ្ញុំខកចិត្ត ប៉ុន្តែខ្ញុំគិតថា ទស្សនកិច្ចរបស់ខ្ញុំ ជាភស្តុតាងសម្រាប់បង្ហាញឲ្យឃើញថា ទំនាក់ទំនងរបស់យើងគឺកំពុងដើរទៅមុខច្រើនវិស័យផង»។
តាមពិតទៅ ឥណ្ឌាបានចូលរួមជាមួយបណ្តាប្រទេសជាង ១២០ ជាសមាជិកមហាសន្និបាតអង្គការសហប្រជាជាតិដើម្បីថ្កោលទោសសហរដ្ឋអាមេរិកដែលទទួលស្គាល់ក្រុងហ្ស៊េរុយសាឡិមជារដ្ឋធានីអ៊ីស្រាអែលជាផ្លូវការនោះ។
ប្រមុខរដ្ឋាភិបាលអ៊ីស្រាអែលខាងលើបានអធិប្បាយផងដែរថា លោកមានសម្ព័ន្ធភាពពិសេសជាមួយសមភាគីឥណ្ឌាលោក នារិន្ទ្រា ម៉ូឌី ដែលវាជាសញ្ញាវិជ្ជមានសម្រាប់ភាគីទាំងពីរក្នុងការពង្រឹងចំណងមិត្តភាព។ ក្នុងដំណើរទស្សនកិច្ចនេះដែរ គេរំពឹងថា ភាគីទាំងពីរនឹងចុះកិច្ចព្រមព្រៀងថ្មីជាច្រើនពាក់ព័ន្ធថាមពល អាកាសចរណ៍ និងភាពយន្តផងដែរ។
តាមពិតទៅលោក ណេតាន់យ៉ាហ៊ូ ចាប់ផ្តើមទស្សនកិច្ចរបស់ខ្លួននៅឥណ្ឌាក្នុងរយៈពេល ៦ ថ្ងៃនៅចុងសប្តាហ៍កន្លងទៅដោយគោលដៅសំខាន់នៃដំណើរទស្សនកិច្ចនោះគឺ ពង្រឹងទំនាក់ទំនងទ្វេភាគី។
យ៉ាងណាក៏ដោយ មុនដំណើរទស្សនកិច្ចរបស់នាយករដ្ឋមន្ត្រីអ៊ីស្រាអែលប៉ុន្មានសប្តាហ៍ ភាគីឥណ្ឌាបានសម្រេចលុបចោលកិច្ចព្រមព្រៀងទិញអាវុធបាញ់រថក្រោះដែលមានតម្លៃ ៥០០លានដុល្លារពីឥណ្ឌា។ អ៊ីស្រាអែលនាំចេញសព្វាវុធក្នុងទំហំទឹកប្រាក់ មួយពាន់លានដុល្លាររៀងរាល់ឆ្នាំទៅកាន់ប្រទេសឥណ្ឌា ប៉ុន្តែកន្លងមកលោក នាយករដ្ឋមន្ត្រីឥណ្ឌា ម៉ូឌី បានព្យាយាមពង្រឹងសមត្ថភាពផលិតសព្វាវុធក្នុងស្រុកនិងបញ្ឈប់ការនាំចូលវិញ៕
Tag:
ហ្ស៊េរុយសាឡិម
បេនចាមិន ណេតាន់យ៉ាហ៊ូ
ឥណ្ឌា
នារិន្ទ្រា ម៉ូឌី
© រក្សាសិទ្ធិដោយ thmeythmey.com