សម្ដេច ហ៊ុន សែន ហួសចិត្តចំពោះនិស្សិតពេទ្យ ដែលស្នើសុំបន្ធូរវិញ្ញាសាប្រឡង

ជាតិ

សម្ដេច ហ៊ុន សែន ហួសចិត្តចំពោះនិស្សិតពេទ្យ ដែលស្នើសុំបន្ធូរវិញ្ញាសាប្រឡង

16, Jan 2018 , 9:19 am

រូបភាព

ដោយ: រំដួល ចិត្រា (Romdoul Chetra)

ភ្នំពេញ៖ រដ្ឋាភិបាល បានព្យាយាមកែសម្រួលគោលនយោបាយមួយចំនួន ដោយអនុញ្ញាតឲ្យសិស្សជាប់និទ្ទេស D និងE អាចប្រឡងចូលសិក្សាជំនាញពេទ្យ ដូចសិស្សជាប់និទ្ទេស Cដល់A ផងដែរ។ រដ្ឋាភិបាល ចង់ផ្ដល់ឱកាសឲ្យនិស្សិតទាំងនោះ អាចសិក្សាជំនាញដែលខ្លួនស្រលាញ់។ បន្ថែមពីនេះប្រមុខរដ្ឋាភិបាល តែងតែមានទស្សនៈថា អ្នកជាប់និទ្ទេស A មិនប្រាកដរៀនជំនាញពេទ្យ ពូកែជាងអ្នកជាប់និទ្ទេស Eឡើយ ហើយអ្នកជាប់និទ្ទេសE រៀនខ្សោយជាងអ្នកជាប់និទ្ទេស A រហូតនោះដែរ។ ទាំងនេះជាការលើកទឹកចិត្តដល់សិស្ស ដែលស្រលាញ់មុខវិជ្ជាពេទ្យនេះ។

ប៉ុន្តែរឿងមួយដែលនាយករដ្ឋមន្ត្រី ហ៊ុន សែន មិនអាចជួយដោះស្រាយបញ្ហានិស្សិតពេទ្យបាននោះ គឺការបន្ធូរបន្ថយវិញ្ញាសាប្រឡងសម្រាប់ពួកគេ។ និយាយត្រង់ចំណុចនេះ សម្ដេច ហ៊ុន សែន ហួសចិត្តចំពោះនិស្សិតពេទ្យម្នាក់ ដែលបានចូលសរសេរ(Comment)ក្នុងហ្វេសប៊ុកសម្ដេច ដោយសុំឲ្យសម្ដេចអន្តរាគមន៍លើការចេញវិញ្ញាសាប្រឡងនេះ។

ថ្លែងក្នុងពិធីសម្ពោធដាក់ឲ្យប្រើប្រាស់អគារព្យាបាលជំងឺមហារីក និងសម្ភពថ្មីនៅក្នុងបរិវេណមន្ទីរពេទ្យកាលម៉ែត នៅព្រឹកថ្ងៃទី១៥ មករានេះ ប្រមុខរដ្ឋាភិបាល បានឆ្លើយតបដូច្នេះថា«ខ្ញុំអស់ឆ្ងល់ហើយ ចំណុចហ្នឹង! សូមឆ្លើយតបថា ខ្ញុំធ្វើអត់បានទេចំណុចនេះ វិញ្ញាសាប្រឡង គឺជាវិញ្ញាសាដែលមានការរៀបចំត្រឹមត្រូវ សម្រាប់ជ្រើសរើសអ្នកដែលពូកែពិតប្រាកដ មិនអាចបន្ធូរបន្ថយវិញ្ញាសាសម្រាប់អ្នកប្រឡងបានទេ…»។

សូមស្ដាប់ប្រសាសន៍សម្ដេច ហ៊ុន សែន ៖

បន្ថែមពីនេះសម្ដេច ហ៊ុន សែន បានបង្គាប់ឲ្យរដ្ឋមន្ត្រីក្រសួងសុខាភិបាល លោក ម៉ម ប៊ុនហេង ពិនិត្យនិងវាយតម្លៃឲ្យបានច្បាស់ មុននឹងផ្ដល់អាជ្ញាប័ណ្ណអនុញ្ញាតឲ្យបង្កើតគ្លីនិក ឬក៏កន្លែងលក់ឱសថ ដើម្បីបញ្ចៀសផលប៉ះពាល់ណាមួយដល់ពលរដ្ឋ៕