លោក ឃុន ចាន់ថា សាទរយ៉ាងខ្លាំង ចំពោះការរឹតបន្តឹងច្បាប់ចរាចរណ៍របស់អាជ្ញាធរ

ជាតិ

រថយន្ត

15, Jan 2018 , 6:59 pm

រូបភាព

ភ្នំពេញ៖ លោក ឃុន ចាន់ថា នាយកគ្រប់គ្រងផ្នែកលក់ និងទីផ្សារនៃក្រុមហ៊ុន StarAuto ដែលជាក្រុមហ៊ុនទទួលសិទ្ធិនាំចូល និងចែកចាយផ្តាច់មុខរថយន្ត MercedesBenz ប្រចាំប្រទេសកម្ពុជា បានថ្លែងសាទរយ៉ាងខ្លាំង ចំពោះចំណាត់របស់នគរបាលចរាចរណ៍ផ្លូវគោក ចំពោះការរឹតបន្តឹងការអនុវត្តច្បាប់ចរាចរណ៍កាលពីពេលថ្មីៗនេះ។

នាយកគ្រប់គ្រងផ្នែកលក់ និងទីផ្សារនៃក្រុមហ៊ុន StarAutoរូបនេះថ្លែងថាចំណាត់ការរបស់នគរបាលចរាចរណ៍នាពេលនេះ នឹងជួយឲ្យសណ្តាប់ធ្នាប់នៅលើដងផ្លូវមានភាពប្រសើរជាងមុន និងលើកកម្ពស់ការគោរពច្បាប់ចរាចរណ៍ផងដែរ ព្រមទាំងធ្វើឲ្យប្រជាពលរដ្ឋបានដឹងពីច្បាប់ចរាចរណ៍ឡើងវិញ។ លោក ឃុន ចាន់ថា បញ្ជាក់ដូច្នេះ៖ «កាលណាប៉ូលិសចាប់ផ្តើមអនុវត្តន៍អ៊ីចឹង ឃើញថាម្នាក់ៗចាប់ផ្តើមគោរពច្បាប់។ បញ្ច្រាសក៏លែងជិះ អ្នកដែលធ្លាប់ជិះអត់មានមួក ក៏មានមួក អ្នកជិះបន្ទាប់ពីអ្នកបើកបរក៏មានមួក អ្នកដែលធ្លាប់បើកបរអត់ខ្សែក្រវាត់ ក៏ពាក់ខ្សែក្រវាត់វិញ។ នេះជារូបភាពល្អ»។

អ្វីដែលពិសេសជាងនេះទៅទៀតនោះ គឺនឹងកាត់បន្ថយបានជាអតិបរមានគ្រោះថ្នាក់ចរាចរណ៍តាមដងផ្លូវខណៈដែលលោក ឃុន ចាន់ថា បានកត់សម្គាល់ថាតួលេខនៃគ្រោះថ្នាក់ចរាចរណ៍កាលពីឆ្នាំ២០១៧កន្លងទៅបានថយចុះ ប៉ុន្តែចំនួនអ្នកស្លាប់ និងរបួសដោយសារគ្រោះថ្នាក់ចរាចរណ៍នេះ បានកើនឡើងទៅវិញ។

អត្ថបទទាក់ទង

សមត្ថកិច្ច បានឃាត់ទុកយានយន្តជាង៤០០គ្រឿង ក្នុងយុទ្ធនាការរឹតបន្តឹងច្បាប់ចរាចរណ៍

២០១៧៖ គ្រោះថ្នាក់ចរាចរណ៍សម្លាប់មនុស្សជិត១៨០០នាក់នៅកម្ពុជា

d

បន្ថែមពីនេះ នាយកគ្រប់គ្រងផ្នែកលក់ និងទីផ្សារនៃក្រុមហ៊ុន StarAuto ក៏ស្នើឲ្យរាជរដ្ឋាភិបាល បង្កើនការអប់រំប្រជាពលរដ្ឋទាក់ទងនឹងច្បាប់ចរាចរណ៍ជាបន្តទៀត ខណៈនៅតាមក្រុមហ៊ុនឯកជន ក៏ដូចជាស្ថាប័នរដ្ឋ ក៏ត្រូវចាប់ផ្តើមអប់រំបុគ្គលិក និងមន្ត្រីរបស់ខ្លួនជាប្រចាំអំពីច្បាប់ចរាចរណ៍នេះដែរ ដើម្បីចូលរួមកាត់បន្ថយសោកនាដកម្ម ដែលបង្កឡើងដោយគ្រោះថ្នាក់ចរាចរណ៍។

សូមបញ្ជាក់ថា នគរបាលចរាចរណ៍ បានបើកយុទ្ធនាការរឹតបន្ដឹងច្បាប់ចរាចរណ៍ បន្ទាប់ពីសម្តេច នាយករដ្ឋមន្ត្រី ហ៊ុន សែន បន្ទោសអាជ្ញាធរមូលដ្ឋាន និងព្រមានដកអភិបាលខណ្ឌដូនពេញ ទាក់ទងនឹងចរាចរណ៍គ្មានសណ្តាប់ធ្នាប់ក្នុងរាជធានី កងកម្លាំងនគរបាលទាំងផ្នែកចរាចរណ៍ និងសណ្តាប់ធ្នាប់ ចាប់បើកប្រតិបត្តិការឃាត់យានយន្ត ជាពិសេសម៉ូតូ និងម្ចាស់យានយន្ត៕