អន្តរជាតិ
ស៊ី ប្រាប់ ត្រាំ ឲ្យជួយរក្សាស្ថានភាពសព្វថ្ងៃនៅឧបទ្វីបកូរ៉េ លោក ដូណាល់ ត្រាំ ជជែកជាមួយលោក ស៊ី ជិនភីង នាពេលកន្លងមក (រូបភាព៖ Xinhua)
× នៅថ្ងៃទី១៦ ខែមករា ប្រធានាធិបតីចិន ស៊ី ជិនភីង បានជជែកតាមទូរសព្ទជាមួយសមភាគីអាមេរិក ដូណាល់ ត្រាំ ។ លោក ស៊ី បានប្រាប់លោក ត្រាំ ពីសារសំខាន់នៃស្ថានភាពប្រសើរនៅឧបទ្វីបកូរ៉េក្នុងពេលបច្ចុប្បន្ន និងបានស្នើឲ្យលោក ត្រាំ ជួយរក្សាការវិវឌ្ឍជាវិជ្ជមាននេះ។ ក្នុងការសន្ទនានេះ មេដឹកនាំទាំងពីរក៏បានប្ដេជ្ញាសហការគ្នាដើម្បីស្វែងរកដំណោះស្រាយត្រឹមត្រូវសម្រាប់វិបត្តិនុយក្លេអ៊ែរនៅឧបទ្វីបកូរ៉េ។
ចាប់តាំងពីមានការចរចានៅថ្ងៃទី៩ ខែមករារវាងមន្ត្រីជាន់ខ្ពស់នៃកូរ៉េទាំងពីរ ស្ថានភាពនៅឧបទ្វីបកូរ៉េបានវិវឌ្ឍយ៉ាងវិជ្ជមាន។ សហគមន៍អន្តរជាតិបានស្វាគមន៍ជំហានទៅមុខនេះ ព្រោះជាក្ដីសង្ឃឹមថ្មី និងកម្រ។ ចិន និងអាមេរិក ក៏សាទរដំណើរជាវិជ្ជមាននេះដែរ តែអាមេរិកហាក់មិនទាន់ជឿជាក់លើកូរ៉េខាងជើងនៅឡើយ និងបានស្នើឲ្យមានការប្រុងប្រយ័ត្នបន្តទៀត។ ស្ថានភាពនៅឧបទ្វីបកូរ៉េ គឺជាប្រធានបទមួយក្នុងការសន្ទនារវាងមេដឹកនាំចិន ស៊ី ជិនភីង និងលោក ដូណាល់ ត្រាំ នៅថ្ងៃទី១៦ ខែមករា។
យោងតាមទីភ្នាក់ងារព័ត៌មាន Xinhua ប្រធានាធិបតីចិន ស៊ី ជិនភីង ចាត់ទុកការជួបចរចាជាបន្តរបស់មន្ត្រីកូរ៉េទាំងពីរ គឺជាការផ្លាស់ប្ដូរវិជ្ជមាននៅឧបទ្វីបកូរ៉េ ដែលគ្រប់គ្នាត្រូវតែរក្សាឲ្យបាន។ លោក ស៊ី បានប្រាប់លោក ត្រាំ ថា ភាគីពាក់ព័ន្ធទាំងអស់ត្រូវធ្វើការរួមគ្នាដើម្បីរក្សាស្ថានភាពដែលរកបានដោយពិបាកនេះ សំដៅបន្ថយកម្ដៅនៅឧបទ្វីបកូរ៉េ និងបង្កើតលក្ខខណ្ឌដើម្បីឈានទៅចាប់ផ្ដើមការចរចាឡើងវិញ។
ជាមួយគ្នានោះ មេដឹកនាំចិនរូបនេះក៏បានស្នើឲ្យសហគមន៍រក្សាការរួបរួមគ្នាលើបញ្ហាឧបទ្វីបកូរ៉េ ព្រោះការរំសាយអាវុធនុយក្លេអ៊ែរពីឧបទ្វីបកូរ៉េ និងរក្សាស្ថិរភាព សន្តិភាពតំបន់ គឺជាប្រយោជន៍របស់ភាគីទាំងអស់។ លោក ស៊ី ក៏បានប្រកាសជំហរចិន ដែលត្រៀមរួចស្រេចក្នុងការចាប់ដៃជាមួយអាមេរិក និងរដ្ឋដទៃទៀតដើម្បីសម្រេចឲ្យបានគោលដៅរួម គឺការដោះស្រាយសំណុំរឿងនុយក្លេអ៊ែរដោយសន្តិវិធីតែម្ដង។
តាមពិតទៅ ការដែលលោក ស៊ី ស្នើឲ្យមានការរួបរួមគ្នានេះ ក៏ព្រោះលោកដឹងថា សហគមន៍អន្តរជាតិនៅតែខ្វែងគំនិតគ្នាលើសំណុំរឿងមួយនេះ។ អាមេរិក និងសម្ព័ន្ធមិត្តរបស់ខ្លួននៅតែចង់ប្រើធម៌ក្ដៅដើម្បីបង្ខំឲ្យកូរ៉េខាងជើងត្រឡប់ចូលតុចរចាវិញ ខណៈដែលចិន និងរុស្ស៊ីប្រកាន់ជំហរត្រជាក់។ ចិន និងរុស្ស៊ីបានស្នើឲ្យអាមេរិកផ្អាកសមយុទ្ធយោធានៅឧបទ្វីបកូរ៉េ និងស្នើកូរ៉េខាងជើងឲ្យផ្អាកកម្មវិធីនុយក្លេអ៊ែរវិញ។
យ៉ាងណាមិញ សំណើខាងលើមិនត្រូវបានអាមេរិកខ្វាយខ្វល់ឡើយ។ ក្នុងការជជែកតាមទូរសព្ទនេះដែរ លោក ត្រាំ បានទទួលស្គាល់តួនាទីសំខាន់របស់ចិនក្នុងការស្វែងរកដំណោះស្រាយសម្រាប់វិបត្តិនេះ និងសន្យាបន្តទំនាក់ទំនងជាមួយចិនឲ្យកាន់តែជិតស្និទ្ធថែមទៀត។ ជាការពិត លោក ត្រាំ ក៏តែងទទូចឲ្យចិនប្រើឥទ្ធិពលរបស់ខ្លួនដើម្បីដាក់សម្ពាធលើកូរ៉េខាងជើង ព្រោះចិនជាអ្នកជិតខាង និងជាដៃគូពាណិជ្ជកម្មធំជាងគេរបស់កូរ៉េខាងជើង៕
Tag:
ចិន
អាមេរិក
ឧបទ្វីបកូរ៉េ
ស៊ី ជិនភីង
ដូណាល់ ត្រាំ
© រក្សាសិទ្ធិដោយ thmeythmey.com