ជាតិ
កម្ពុជា-វៀតណាម សាងសង់ផ្សារគំរូព្រំដែនជាលើកដំបូង ក្នុងទំហំទឹកប្រាក់២លានដុល្លារ រូបពីហ្វេសប៊ុកក្រសួង៖ លោក ប៉ាន់ សូរស័ក្តិ រដ្ឋមន្រ្តីក្រសួងពាណិជ្ជកម្ម (ខាងឆ្វេង) ឯកអគ្គរដ្ឋទូតវៀតណាមប្រចាំកម្ពុជាលោក វ៉ូ ហ្គុងមិញ (ខាងស្ដាំ) នៅក្នុងពិធីសម្ពោធការដ្ឋានសាងសង់ផ្សារគរូព្រំដែនកម្ពុជា-វៀតណាម
× ភ្នំពេញ៖ កម្ពុជា-វៀតណាម សាងសង់ផ្សារគំរូព្រំដែនជាលើកដំបូង ដែលមានឈ្មោះថា«ផ្សារដា» ក្នុងទំហំទឹកប្រាក់២លានដុល្លារ។ ផ្សារគំរូព្រំដែននៃប្រទេសទាំងពីរនេះ រៀបចំសាងសង់នៅក្នុងខេត្តត្បូងឃ្មុំ -ខេត្តតៃនិញ។
រដ្ឋមន្ត្រីក្រសួងពាណិជ្ជកម្មលោក ប៉ាន សូរស័ក្តិ បាននិយាយថា ផ្សារគំរូព្រំដែនកម្ពុជា- វៀតណាមនេះ នឹងជួយសម្រួលដល់ការចរាចរណ៍ទំនិញ ក្នុងទិសដៅបង្កើនទំហំពាណិជ្ជកម្មនៅតាមព្រំដែន ជាពិសេសលើកកម្ពស់ជីវភាពប្រជាជនទាំងពីរផងដែរ។
បើតាមហ្វេសប៊ុកក្រសួងពាណិជ្ជកម្ម ដែលបានស្រង់សម្ដីលោក ប៉ាន់ សូរស័ក្តិ នៅក្នុងពិធីបើកការដ្ឋានសាងសង់ផ្សារគំរូព្រំដែន នៅថ្ងៃទី១៦ មករា យ៉ាងដូច្នេះ៖«ការបង្កើតផ្សារគំរូនេះ គឺជាការចាប់ផ្តើមទំព័រសករាជថ្មីមួយទៀត នៃការពង្រឹងកិច្ចសហការ និងសម្រួលពាណិជ្ជកម្មនៅតាមព្រំដែននៃប្រទេសទាំងពីរ ឲ្យកាន់តែមានភាពងាយស្រួល និងជិតប្រជាពលរដ្ឋ ជាពិសេសឈានទៅសម្រេចឲ្យបាននូវទំហំពាណិជ្ជកម្មចំនួន ៥,០០០លានដុល្លារ តាមផែនការមេដែលបានគ្រោងទុកក្នុងពេលអនាគត។ខ្ញុំសង្ឃឹមថាផ្សារនេះ នឹងបម្រើអត្ថប្រយោជន៍ប្រជាពលរដ្ឋកម្ពុជា និងសម្រាប់ដាក់លក់ទំនិញរបស់ប្រជាជននៃប្រទេសទាំងពីរ ជាពិសេសរួមចំណែកដោះស្រាយបញ្ហាប្រឈម និងរបាំងពាណិជ្ជកម្មនានា ដែលតែតែងរាំងស្ទះដល់ធ្វើចរាចរណ៍ទំនិញ និងផលិតផលនៅតាមព្រំដែនកម្ពុជា និងវៀតណាម» ។
ឯកអគ្គរដ្ឋទូតវៀតណាមប្រចាំកម្ពុជា លោក វ៉ូ ហ្គុងមិញ បាននិយាយថា ផ្សារគំរូព្រំដែននេះ ជាការពង្រឹងមិត្តភាពប្រពៃណី និងកិច្ចសហប្រតិបត្តិការគ្រប់វិស័យនៃប្រទេសទាំងពីរថែមទៀត។«ខ្ញុំសង្ឃឹមថាការសាង់សង់ផ្សារដានេះ នឹងនាំមកនូវក្តីសង្ឃឹមថ្មីសម្រាប់ប្រជាជនកម្ពុជា និងវៀតណាម ហើយនឹងក្លាយជាគំរូនៃការអភិវឌ្ឍ និងការពង្រីកកិច្ចសហការសេដ្ឋកិច្ច និងពាណិជ្ជកម្មនៅតាមព្រំដែននៃប្រទេសទាំងពីរនៅថ្ងៃអនាគត ប្រកបដោយជោគជ័យ»។ នេះជាការបញ្ជាក់របស់ឯកអគ្គរដ្ឋទូតវៀតណាម។
រយៈពេល៥ឆ្នាំចុងក្រោយនេះ លំហូរវិនិយោគផ្ទាល់ពីបរទេស (FDI) មកកម្ពុជា មានតម្លៃចន្លោះពី ១,៧ពាន់លានដុល្លារ ទៅ ២ពាន់លានដុល្លារអាមេរិក។ ដោយឡែកទំហំពាណិជ្ជកម្មទ្វេភាគីរវាងកម្ពុជា-វៀតណាម មានការកើនឡើងគួរឲ្យកត់សម្គាល់។ គិតត្រឹមរយ:ពេល១១ខែ នៃឆ្នាំ២០១៧ ប្រទេសទាំងពីរសម្រេចបានទំហំពាណិជ្ជកម្ម ៣,៤៣៨លានដុល្លារ ពោលគឺបានកើនឡើង ៣១,៥% បើធៀបនឹងឆ្នាំ២០១៦ ដែលមានចំនួនត្រឹមតែ ២,៩២៦លានដុល្លារ ប៉ុណ្ណោះ។
គួរបញ្ជាក់ថា គម្រោងសាងសង់ផ្សារគំរូព្រំដែនកម្ពុជា-វៀតណាមនេះ ត្រូវបានអនុម័តកាលពីឆ្នាំ២០១៣ ហើយត្រូវបានភាគីទាំងពីរ បន្តអនុវត្តឡើងវិញនៅឆ្នាំ២០១៦ នៅលើផ្ទែដីទំហំ ១៩,៦២៨ម៉ែត្រការ៉េ ស្ថិតក្នុងតំបន់សេដ្ឋកិច្ចពិសេសថារីត្បូងឃ្មុំ ជាមួយទុនវិនិយោគសរុបចំនួន ៤៤,៧៦១,៤១១,០០០វៀតណាមដុង (ប្រមាណជិត ២ លានដុល្លារអាមេរិក) ដែលជាជំនួយរបស់រដ្ឋាភិបាលវៀតណាម។ នេះបើតាមក្រសួងពាណិជ្ជកម្ម៕
Tag:
កម្ពុជា
វៀតណាម
ផ្សារគំរូ
© រក្សាសិទ្ធិដោយ thmeythmey.com