ស្ថាប័នរដ្ឋមួយទៀត ព្រមានពីការជួញដូររូបិយបណ្ណឌីជីថល

ជាតិ

សេដ្ឋកិច្ច

ស្ថាប័នរដ្ឋមួយទៀត ព្រមានពីការជួញដូររូបិយបណ្ណឌីជីថល

17, Jan 2018 , 7:19 pm

រូបភាព

ដោយ:

ភ្នំពេញ៖ គណៈកម្មការមូលបត្រកម្ពុជា (SECC) បានព្រមានពីហានិភ័យខ្ពស់ ចំពោះការជួញដូររូបិយបណ្ណឌីជីថល។ SECC អះអាងថា ខ្លួនមិនទាន់បានផ្ដល់ការអនុញ្ញាតដល់ក្រុមហ៊ុនណាមួយ ឲ្យធ្វើប្រតិបត្តិការបោះផ្សាយ ឬជួញដូររូបិយបណ្ណឌីជីថលនោះទេ។

មួយខែបន្ទាប់ពីមានការព្រមានរបស់ធនាគារជាតិ គណៈកម្មការមូលបត្រកម្ពុជា (SECC) នៅថ្ងៃទី១៦ខែមករា បានចេញសេចក្ដីជូនដំណឹងមួយ ដើម្បីបង្ការហានិភ័យ ជុំវិញការជួញដូររូបិយបណ្ណឌីជីថល របស់សាធារណជន។ SECC បានឲ្យដឹងថា រូបិយបណ្ណឌីជីថល ជាឧបករណ៍ហិរញ្ញវត្ថុថ្មី មិនទាន់មានការសិក្សាច្បាស់លាស់ ដែលការជួញដូរ ឬជាប់ពាក់ព័ន្ធអាចមានហានិភ័យខ្ពស់ និងបង្កឲ្យខាតបង់ប្រាក់ច្រើនជាយថាហេតុ។

SECC បានអំពាវនាវយ៉ាងដូច្នេះថា៖«សូមសាធារណជន មានការប្រុងប្រយ័ត្នខ្ពស់ ចំពោះការជាប់ពាក់ព័ន្ធ ឬប្រឡូក ក្នុងការជួញដូររូបិយបណ្ណឌីជីថលទាំងនេះ ដែលនាំដល់ការទទួលខុសត្រូវ និងរ៉ាប់រងដោយខ្លួនឯងលើហានិភ័យ និងការខាតបង់ជាយថាហេតុ»។

SECC អះអាងថា ខ្លួនមិនទាន់បានផ្ដល់ការអនុញ្ញាតដល់ក្រុមហ៊ុនណាមួយ ឲ្យធ្វើប្រតិបត្តិការបោះផ្សាយ ឬជួញដូររូបិយបណ្ណឌីជីថលនោះទេ។

អត្ថបទទាក់ទង

ធនាគារជាតិ៖ ប្រយ័ត្នការឆបោកបែបថ្មីមួយទៀត «លុយអេឡិចត្រូនិក»

ជុំវិញរូបិបណ្ណឌីជីថលនេះដែរ SECC ក្នុងពេលថ្មីៗនេះ បានចុះអនុស្សារណៈនៃការយោគយល់គ្នាជាមួយក្រុមហ៊ុន Camnext Global Ltd ដើម្បីសិក្សាលើយន្តការ ប្រភេទឧបករណ៍ហិរញ្ញវត្ថុឌីជីថល និងឧបករណ៍ផ្សេងទៀត ដែលប្រើប្រាស់ជាមធ្យោបាយប្រមូលសាច់ប្រាក់ពីសាធារណជន ឬជាមធ្យោបាក្នុងការជួញដូរ។ សេចក្ដីជូនដំណឹងខាងលើនេះ លើកឡើងទៀតថា SECC ត្រូវការសិក្សាហានិភ័យពាក់ព័ន្ធឲ្យបានច្បាស់ជាមុនសិន មុនឈានដល់ការរៀបចំបទបញ្ញត្តិគ្រប់គ្រងឧបករណ៍ហិរញ្ញវត្ថុឌីជីថលថ្មីៗទាំងនោះក្នុងវិស័យមូលបត្រ ឲ្យមានប្រសិទ្ធភាព ដើម្បីជាប្រយោជន៍ និងទំនុកចិត្តសម្រាប់អ្នកចូលរួមក្នុងទីផ្សារ៕