សេដ្ឋកិច្ចអន្តរជាតិ
អន្តរជាតិ
កាណាដា៖ «សៀវភៅទំព័រលឿង» ខាតបង់បន្តបន្ទាប់ ដោយសារមនុស្សមើលតាមអនឡាញ
× បុគ្គលិកប្រមាណ៥០០នាក់ដែលបម្រើនៅក្រុមហ៊ុន «សៀវភៅទំព័រលឿង» (Pages Jaunes ឬ Yellow Pages) របស់កាណាដា ប្រឈមបាត់បង់ការងាររបស់ខ្លួនដោយសារតែការចំណាយ និងចំណូលក្នុងក្រុមហ៊ុនមិនមានតុល្យភាពគ្នា។ នេះបើតាមការបញ្ជាក់របស់លោក David Eckert នាយកក្រុមហ៊ុន ដែលត្រូវបានដកស្រង់សំដីដោយសារព័ត៌មាន La Presse Canadienne។
ចាប់តាំងពីឆ្នាំ២០១២មក ការចំណាយលើផលិតផល «សៀវភៅទំព័រលឿង» (Page Jaunes) របស់ក្រុមហ៊ុនកាណាដា រក្សាស្ថិរភាព ប៉ុន្តែចំណូលបានធ្លាក់ចុះប្រមាណពាក់កណ្តាល។ «នេះជាពេលដែលយើងត្រូវគិតគូដើម្បីឲ្យមានតុល្យភាពគ្នា»។ លោក Eckert បានថ្លែងយ៉ាងដូច្នេះ បន្ទាប់ពីប្រកាសការខាតបង់បន្ថែមនាត្រីមាសទី៤ កាលពីឆ្នាំកន្លងមក។
នាយកក្រុមហ៊ុន Page Jaunes កាណាដា រូបនេះ បានត្អូញត្អែថា ការវិវត្តបច្ចេកវិទ្យាអនឡាញ បានធ្វើឲ្យការបោះពុម្ពផ្សាយធ្លាក់ចុះជាលំដាប់ ពោលគឺចាប់តាំងពីឆ្នាំ២០០៨មកម្ល៉េះ។ លោកបានបញ្ជាក់ថា ក្រុមហ៊ុនក៏រកបានចំណូលពីអភិវឌ្ឍន៍បច្ចេកវិទ្យាអនឡាញរបស់ខ្លួនផងដែរ ប៉ុន្តែវាមិនអាចទប់ទល់នឹងការចំណាយលើផ្នែកបោះពុម្ពផ្សាយបាននោះឡើយ។
បន្ថែមពីលើនេះ ទៀត ក្រុមហ៊ុន Pages Jaunes របស់កាណាដា ត្រូវប្រឈមជាមួយដៃគូប្រកួតប្រជែងជាច្រើនទៀតរួមមានដូចជា RedFlagDeals.com, Canada411.ca, 411.ca, Bookenda.com, DuProprio.com និង ComFree.com ជាដើម។
បើតាមការផ្សាយរបស់កាសែតបារាំង France Inter ក្រុមហ៊ុន Pages Jaunes ឬ Yellow Pages របស់បារាំង និងនៅលើពិភពលោក ក៏សុទ្ធតែរងផលប៉ះពាល់ផងដែរ ដោយសារមនុស្សភាគច្រើន ចូលប្រើប្រាស់ទូរសព្ទឆែកមើលទីតាំង និងអាស័យដ្ឋានអាជីវកម្មផ្សេងៗ ជំនួសការបើកសៀវភៅ៕
© រក្សាសិទ្ធិដោយ thmeythmey.com