ជាតិ
នយោបាយជាតិ
×![]()
ភ្នំពេញ៖ សម្ដេចនាយករដ្ឋមន្ត្រី ហ៊ុន សែន ប្រកាសថា សម្ដេចនៅតែបើកផ្លូវចរចាជាមួយអ្នកនយោបាយប៉ុន្តែមិនមែនផ្ដល់ឱកាសសម្រាប់អ្នកនយោបាយជាប់ទោសទេ។ ការលើកឡើងរបស់សម្ដេច ហ៊ុន សែន បែបនេះ គឺឆ្លើយតបទៅនឹងអតីតគណបក្សសង្គ្រោះជាតិ ដែលប្រកាសថា គណបក្សខ្លួននៅតែរង់ចាំការសន្ទនាពីរដ្ឋាភិបាលកម្ពុជា ដើម្បីដោះស្រាយបញ្ហាប្រទេសជាតិ កុំឲ្យរងសម្ពាធពីបរទេស។
ថ្លែងក្នុងពិធីជួបសំណេះសំណាលជាមួយក្រុមសមាគមគ្រូពេទ្យស្ម័គ្រចិត្តយុវជន សម្ដេច ហ៊ុន សែន បាននិយាយថា «ឥឡូវខ្ញុំធ្វើអ្វីច្រើនទេ គឺខ្ញុំធ្វើតាមអ្នកឯង (សម រង្ស៊ី) ។ នយោបាយអ្នកឯងបានកែហើយឬនៅ មានស៊ី អត់សែន មានសែនអត់ស៊ី តើកែហើយឬនៅ។ បើមិនទាន់កែ ខ្ញុំនឹងកំដរអ្នកឯងលេងដល់ទីបញ្ចប់។ ខ្មោចរបស់ខ្ញុំងាប់ កប់នៅកម្ពុជា ខ្មោចអ្នកឯងងាប់កប់នៅប្រទេសក្រៅ។ ខ្ញុំបើកទ្វារចំហ ទៅលើកិច្ចការសន្ទនាខាងនយោបាយជាមួយអ្នកណាក៏ដោយ ក៏ប៉ុន្តែត្រូវញែកគ្នាឲ្យច្បាស់ ខ្ញុំមិនអាចសន្ទនាជាមួយអ្នកណាជាប់បញ្ហាផ្លូវច្បាប់បានទេ…»។
សូមស្ដាប់សំឡេងនាយករដ្ឋមន្ត្រី ហ៊ុន សែន៖
កាលពីថ្ងៃទី២៧ កុម្ភៈ កន្លងមក អតីតគណបក្សសង្គ្រោះជាតិ ដែលមានសកម្មភាពនៅក្រៅប្រទេស បានបង្ហាញគាំទ្រសេចក្តីសម្រេចរបស់ក្រុមប្រឹក្សាសហភាពអឺរ៉ុប ជុំវិញបញ្ហាកម្ពុជា ដោយភ្ជាប់នឹងការរំលឹកពីតួនាទីរបស់ប្រទេសហត្ថលេខីនៃកិច្ចព្រមព្រៀងសន្តិភាពទីក្រុងប៉ារីស ដែលតម្រូវឲ្យរដ្ឋាភិបាលកម្ពុជា អនុវត្តតាមនិងគោរពគោលការណ៍លទ្ធិប្រជាធិបតេយ្យជាដើម។ អតីតគណបក្សសង្គ្រោះជាតិ បានអះអាងថា ពួកគេត្រៀមបើកកិច្ចសន្ទនាថ្នាក់ជាតិមួយ ជាមួយសម្ដេច ហ៊ុន សែន បើសិនជាប្រធានគណបក្សប្រជាជនយល់ព្រមដោះស្រាយបញ្ហាជាតិជាមួយគ្នា។ នេះបើតាមការចុះផ្សាយរបស់វិទ្យុអាស៊ីសេរី៕
Tag:
ហ៊ុន សែន
© រក្សាសិទ្ធិដោយ thmeythmey.com
