ភ្នំពេញ៖ គណបក្ស«កែម ឡី» ដែលគ្រោងបង្កើតឡើងដោយលោក កែម រិទ្ធិសិត ទំនងផ្ទុយពីច្បាប់ស្តីពីគណបក្សនយោបាយ ដែលហាមដាក់រូបភាព និងឈ្មោះបុគ្គល សម្គាល់គណបក្ស។
បើទោះជាគណបក្ស កែម ឡី មិនទាន់លេចចេញជារូបរាងក្តី ប៉ុន្តែព័ត៌មាននេះ ត្រូវបានផ្សព្វផ្សាយយ៉ាងទូលំទូលាយ ពីបណ្ដាសារព័ត៌មានក្នុងប្រទេសកម្ពុជា តាមរយៈសេចក្តីប្រកាសព័ត៌មានរបស់លោក កែម រិទ្ធិសិត ប្អូនប្រុសលោក កែម ឡី កាលពីចុងខែកុម្ភៈ កន្លងមក។ លោក កែម រិទ្ធិសិត បាននិយាយថា ការបង្កើត គណបក្ស កែម ឡី គឺមានគោលបំណងយកទស្សនទានល្អៗ របស់លោកបណ្ឌិត កែម ឡី ទៅបន្តចូលរួមចំណែកក្នុងការអភិវឌ្ឍប្រទេសជាតិ។
ការបង្កើតគណបក្សនេះ គឺស្របទៅតាមរដ្ឋធម្មនុញ្ញនៃព្រះរាជាណាចក្រកម្ពុជា ត្រង់មាត្រា៤២ ដែលចែងថា«ប្រជាពលរដ្ឋខ្មែរ មានសិទ្ធិបង្កើតសមាគម និងគណបក្សនយោបាយ។ សិទ្ធិនេះត្រូវកំណត់ក្នុងច្បាប់។ ប្រជាពលរដ្ឋខ្មែរទាំងឡាយអាចចូលរួមក្នុងអង្គការមហាជន ជួយគ្នាទៅវិញទៅមក ការពារសមិទ្ធផលជាតិ និងសណ្ដាប់ធ្នាប់សង្គម»។
ប៉ុន្តែគម្រោងបង្កើតគណបក្ស កែម ឡី នេះ ទំនងមិនអាចទៅរួច ដោយសារវាផ្ទុយពីច្បាប់ស្តីពីគណបក្សនយោបាយ ដែលចែងហាមប្រើរូបភាព និងឈ្មោះបុគ្គល សម្គាល់គណបក្ស។ យោងតាមមាត្រា១១ថ្មី នៃច្បាប់ស្តីពីគណបក្សនយោបាយ បានចែងថា ១៖ ឈ្មោះជាអក្សរពេញ ជាអក្សរកាត់ និងសញ្ញាសម្គាល់របស់គណបក្សនយោបាយត្រូវតែខុសគ្នាពីឈ្មោះជាអក្សរពេញ ឬអក្សរកាត់ និងសញ្ញាសម្គាល់របស់គណបក្សនយោបាយនានា។ ២៖ ឈ្មោះគណបក្សនយោបាយមិនត្រូវធ្វើឡើង ដោយគ្រាន់តែកែសម្រួលបន្តិចបន្តួចនៅលើឈ្មោះគណបក្សនយោបាយនានា ឬយកឈ្មោះរូបវ័ន្តបុគ្គលមកដាក់ឡើយ។ ៣៖ សញ្ញាសម្គាល់របស់គណបក្សនយោបាយ មិនត្រូវចម្លង ឬយកតាមសញ្ញាជាតិ រូបភាពតំណាងឲ្យសាសនា ប្រាសាទអង្គរវត្ត ឬព្រះឆាយាល័ក្ខណ៍ ឬរូបសំណាករបស់ព្រះមហាក្សត្រខ្មែរគ្រប់អង្គ ឬរូបភាពរបស់រូបវ័ន្តបុគ្គលឡើយ។
ជាក់ស្តែងគណបក្សពីរ ធ្លាប់បានផ្លាស់ប្តូររូប និងឈ្មោះរូបវ័ន្តបុគ្គលមកហើយ គឺគណបក្ស សម រង្ស៊ី បានប្ដូរឈ្មោះទៅជាគណបក្ស ភ្លើងទៀន ។ ចំណែកគណបក្សហ្វ៊ុនស៊ិនប៉ិច បានដករូបសម្ដេចនរោត្តម រណឫទ្ធិ ចេញពីស្លាកសម្គាល់គណបក្ស។
មកដល់ពេលនេះ លោក កែម រិទ្ធិសិត ប្អូនប្រុសលោក កែម ឡី បានដាក់ពាក្យជាផ្លូវការស្នើទៅក្រសួងមហាផ្ទៃ ដើម្បីបង្កើតគណបក្ស កែម ឡី ហើយ ប៉ុន្តែលោកសុំមិនបញ្ជាក់លម្អិតទេ។ ថ្លែងប្រាប់សារព័ត៌មានថ្មីៗ លោក កែម រិទ្ធិសិត បានបញ្ជាក់ថា ៖«យើងនៅសល់ពេល១ខែទៀត ទើបយើងអាចបញ្ជាក់បាន»។
អ្នកនាំពាក្យក្រសួងមហាផ្ទៃ លោក ខៀវ សុភ័គ បាននិយាយថា ក្រសួងមហាផ្ទៃ ស្វាគមន៍និងទទួលយកពាក្យចុះឈ្មោះគណបក្សនយោបាយ ពីប្រជាពលរដ្ឋគ្រប់រូប ដែលចង់ចូលរួមសកម្មភាពនយោបាយ។ និយាយត្រង់ចំណុចនេះ លោក ខៀវ សុភ័គ ក៏បានរំលឹកទៅលោក កែម រិទ្ធិសិត ដែលចង់បង្កើតគណបក្សនយោបាយ ប្រើឈ្មោះលោក កែម ឡី នោះ ឲ្យអនុវត្តតាមច្បាប់ស្តីពីគណបក្សនយោបាយសិន មុននឹងសម្រេចយកពាក្យមកដាក់នៅក្រសួងមហាផ្ទៃ។
ថ្លែងប្រាប់សារព័ត៌មានថ្មីៗ អ្នកនាំពាក្យក្រសួងមហាផ្ទៃ បានបញ្ជាក់ដូច្នេះថា៖«យើងមិនជំទាស់ការបង្កើតគណបក្សរបស់គាត់(កែម រិទ្ធិសិត)ទេ ប៉ុន្តែបើគាត់ចង់បង្កើតគណបក្សយកឈ្មោះ កែម ឡី មកប្រើ យើងសុំឲ្យអនុវត្តច្បាប់គណបក្សនយោបាយ ត្រង់មាត្រា១១ សិន ។ ព្រោះមាត្រា១១ បែងចែងយ៉ាងច្បាស់ពីការហាមប្រើឈ្មោះបុគ្គល និងរូបបុគ្គលសម្គាល់បក្សនយោបាយ»៕