អន្តរជាតិ
នយោបាយអន្តរជាតិ
មន្ត្រីជាន់ខ្ពស់សិង្ហបុរី ៖ អំពើពុករលួយនៅសិង្ហបុរី ភាគច្រើនកើតក្នុងវិស័យឯកជន រូបភាព៖ Reuters
× រដ្ឋាភិបាលសិង្ហបុរី បានទទួលស្គាល់ថា អំពើពុករលួយ ពិតជាមានមែននៅប្រទេសដែលមានការអភិវឌ្ឍខ្ពស់មួយនេះ ក៏ប៉ុន្តែ វាស្ថិតនៅក្នុងកម្រិតតិចតួចបំផុត។ ខុសពីបណ្តាប្រទេសភាគច្រើននៅពិភពលោក អំពើពុករលួយនៅសិង្ហបុរី ភាគច្រើនកើតឡើងនៅក្នុងវិស័យឯកជនប៉ុណ្ណោះ ។
រដ្ឋមន្ត្រីការិយាល័យនាយករដ្ឋមន្ត្រីសិង្ហបុរី លោក Chan Chun Sing នៅថ្ងៃទី១ មីនា បានថ្លែងនៅចំពោះមុខសភាសិង្ហបុរី ថា អំពើពុករលួយនៅសិង្ហបុរី ជាបទល្មើស ដែលអាចគ្រប់គ្រងបាន ។ លោក អះអាងថា អំពើពុករលួយទាំងនោះ ភាគច្រើនកើតនៅក្នុងវិស័យឯកជន ។ នេះបើយោងតាមការចុះផ្សាយរបស់សារព័ត៌មានសិង្ហបុរី Channel News Asia ។
តាមប្រភពព័ត៌មានដដែលនោះ រដ្ឋមន្ត្រីខាងលើ ក៏បានលើកឡើងពីរបាយការណ៍ចុងក្រោយរបស់អង្គការតម្លាភាពអន្តរជាតិដែលកត់សម្គាល់ថា សិង្ហបុរី ស្ថិតនៅក្នុងចំណាត់លេខ៦ ក្នុងចំណោមប្រទេស ១៨០ ដែលមានន័យថា សិង្ហបុរី ជាប្រទេស ដែលមានអំពើពុករលួយតិចតួចប៉ុណ្ណោះ។
រដ្ឋមន្ត្រីរូបនេះ បានបន្ថែមថា បទល្មើសតិច មិនមែនមានន័យថា គ្មានបទល្មើសឡើយ ។ តែអ្វីដែលគួរឲ្យកត់សម្គាល់នោះ តាមរយៈរបាយការណ៍របស់ការិយាល័យស៊ើបអង្កេតអំពើពុករលួយរបស់សិង្ហបុរី បទល្មើសអំពើពុករលួយនៅសិង្ហបុរី កើតមានភាគច្រើនតែក្នុងវិស័យឯកជន ដែលបញ្ហានេះហើយ លោករដ្ឋមន្ត្រី ចង់មានការបញ្ជ្រាបពីវិធានការប្រឆាំងអំពើពុកនៅក្នុងវិស័យឯកជន និងធុរកិច្ចសិង្ហបុរីកាន់តែច្រើន ។
លោក បានដាស់តឿនឲ្យក្រុមហ៊ុនពាណិជ្ជកម្មនានាសហការល្អជាមួយនឹងអង្គភាពស៊ើបអង្កេត ដើម្បីពង្រឹងបែបផែនក្នុងការប្រឆាំងអំពើពុករលួយនៅក្នុងក្រុមហ៊ុន ហើយក្រុមហ៊ុនទាំងនោះក៏ត្រូវទទួលស្គាល់ថា ពួកគេជាមានតួនាទីយ៉ាងសំខាន់នៅក្នុងកិច្ចប្រឹងប្រែងប្រយុទ្ធប្រឆាំងអំពើពុករលួយរបស់ជាតិ តាមរយៈការទប់ស្កាត់ ការតាមដាន និងការរាយការណ៍ពីទង្វើទាំងនោះដូចគ្នា៕
Tag:
សិង្ហបុរី
អាស៊ាន
ពុករលួយ
© រក្សាសិទ្ធិដោយ thmeythmey.com