ជាតិ
នយោបាយជាតិ
សម្តេច ហ៊ុន សែន បង្ហើបថា មានអតីតអ្នកប្រឆាំង ស្នើសុំសិទ្ធិធ្វើនយោយបាយឡើងវិញ សម្តេច ហ៊ុន សែន ថ្លែងក្នុងពិធីសម្ពោធសមិទ្ធផល ក្នុងវត្តឈូកវ៉ា នាព្រឹកថ្ងៃទី៥ ខែមីនា ឆ្នាំ២0១៨
× ភ្នំពេញ៖ សម្តេច ហ៊ុន សែន នាយករដ្ឋមន្ត្រី និងជាប្រធានគណបក្សប្រជាជនកម្ពុជា បានទម្លាយថា ក្នុងចំណោមអតីតមន្ត្រីជាន់ខ្ពស់ទាំង១១៨នាក់នៃគណបក្សសង្គ្រោះជាតិ ដែលត្រូវបានតុលាការកំពូល កាត់សិទ្ធិនយោបាយ មានមួយចំនួន បានផ្ញើលិខិតទៅកាន់សម្តេច ដើម្បីសុំឲ្យផ្តល់សិទ្ធិនយោបាយដល់ពួកគេឡើងវិញ។ នាយករដ្ឋមន្ត្រីរូបនេះ បន្តថា អតីតអ្នកនយោបាយទាំងនោះ ក៏បានផ្ញើលិខិតពីរផ្សេងទៀត ទៅកាន់សម្តេច សាយ ឈុំ ប្រធានព្រឹទ្ធសភា ដែលកំពុងទទួលរាជានុសិទ្ធិជាប្រមុខរដ្ឋស្តីទី និងលោក ឌិត មន្ទី ប្រធានតុលាការកំពូលផងដែរ ដើម្បីសុំឲ្យអន្តរាគមន៍អំពីរឿងនេះ។
សម្តេច ហ៊ុន សែន មិនវិនិច្ឆ័យឡើយ ថាប្រមុខរដ្ឋស្តីទី និងប្រធានតុលាការកំពូល នឹងដោះស្រាយយ៉ាងដូចម្តេច ចំពោះសំណើរបស់អតីតក្រុមអ្នកប្រឆាំង។ ប៉ុន្តេ សម្តេច សន្និដ្ឋានថា ប្រមុខរដ្ឋស្តីទីនិងប្រធានតុលាការកំពូល ទំនងជាយល់ដូចគ្នាថា នៅប្រទេសកម្ពុជា មិនទាន់មានច្បាប់ណាមួយ ដែលលើកលែងឲ្យបុគ្គល ដែលត្រូវបានកាត់សិទ្ធិនយោបាយនោះទេ។
ក្នុងពិធីសម្ពោធសមិទ្ធផលនៅវត្តឈូកវ៉ា ស្ថិតក្នុងខណ្ឌព្រែកព្នៅ នាព្រឹកថ្ងៃទី៥ ខែមីនា ឆ្នាំ២0១៨ ប្រធានគណបក្សកាន់អំណាចរូបនេះ បានឆ្លើយតបនឹងសំណើរបស់អតីតអ្នកប្រឆាំង យ៉ាងដូច្នេះថា៖«តុលាការ កាត់សិទ្ធិនយោបាយហើយ ហើយពុំទាន់មានច្បាប់ លើកលែងឲ្យទេ។ ខ្ញុំអត់មានសិទ្ធិធ្វើបែបនោះទេ។ វា ខុសពីអ្នកជាប់ពន្ធនាគារ ដែលនាយករដ្ឋមន្ត្រី មានសិទ្ធិអាចលើកលែងទោសឲ្យបាន។ នេះហើយជាលទ្ធផលចុងក្រោយនៃអំពើក្បត់ជាតិ»។
កាលពីថ្ងៃទី១៦ ខែវិច្ឆិកា ឆ្នាំ២0១៧ តុលាការកំពូល បានសម្រេចរំលាយគណបក្សសង្គ្រោះជាតិចោល ព្រមទាំងមិនឲ្យមេដឹកនាំ១១៨នាក់នៃគណបក្សនេះ ធ្វើនយោបាយរយៈពេល៥ឆ្នាំ។ អតីតមេដឹកនាំនៃគណបក្សប្រឆាំងទាំងនោះ ដែលត្រូវដកសិទ្ធិនយោបាយ រាប់ចាប់តាំងពីលោក កឹម សុខា លោក អេង ឆៃអ៊ាង លោក ប៉ុល ហំម លោកស្រី មូរ សុខហួរ លោក សុន ឆ័យ និងលោក យឹម សុវណ្ណ ជាដើម។ តុលាការកំពូល ចោទថា គណបក្សសង្គ្រោះជាតិ លួចឃុបឃិតជាមួយបរទេស ដើម្បីផ្តួលរំលំរដ្ឋាភិបាលកម្ពុជា ដែលជាអំពើក្បត់ជាតិ៕
© រក្សាសិទ្ធិដោយ thmeythmey.com