អន្តរជាតិ
នយោបាយអន្តរជាតិ
ត្រាំ សរសើរការវិវត្តនៃស្ថានការណ៍កូរ៉េ ក្រោយគីម ជុងអ៊ុន បង្ហាញឆន្ទៈចង់ចរចាបោះបង់នុយក្លេអ៊ែរ
× ប្រធានាធិបតីអាមេរិក ដូណាល់ ត្រាំ កោតសរសើរ និងមានសុទិដ្ឋានិយមចំពោះការវិវត្តស្ថានការណ៍ឧបទ្វីបកូរ៉េ ក្រោយលោក គីម ជុងអ៊ុន បង្ហាញឆន្ទៈចង់ចរចាជាមួយអាមេរិកលើការបោះបង់អាវុធនុយក្លេអ៊ែរ។ យ៉ាងណាក៏ដោយ ប្រធានាធិបតីរូបនេះនៅតែមិនទាន់ទុកចិត្ត និងនៅប្រុងប្រយ័ត្នចំពោះការសន្យារបស់របបដឹកនាំក្រុងព្យុងយ៉ាងនៅឡើយ។
ភ្លាមៗក្រោយទទួលដំណឹងថា មេដឹកនាំកូរ៉េខាងជើងចង់ជួបចរចា និងអាចឈានទៅបោះបង់អាវុធនុយក្លេអ៊ែរផង លោក ដូណាល់ ត្រាំ បានសរសេរបង្ហោះតាមគណនី Twitter ផ្លូវការរបស់ខ្លួនដោយស្វាគមន៍ការវិវត្តប្រកបដោយភាពវិជ្ជមាននៃស្ថានការណ៍កូរ៉េនេះ តែមេដឹកនាំរូបនេះនៅមានមន្ទិល និងមិនសូវទុកចិត្តចំពោះឆន្ទៈរបស់កូរ៉េខាងជើងប៉ុន្មានឡើយ។
លោក ដូណាល់ ត្រាំ បានសរសេរដូច្នេះ៖«ភាពប្រសើរឡើងកំពុងត្រូវបានបង្កើតឡើងនៅក្នុងការពិភាក្សាជាមួយកូរ៉េខាងជើង។ អស់រយៈពេលជាច្រើនឆ្នាំមកហើយ ភាគីពាក់ព័ន្ធបានប្រឹងប្រែង អស់ពីកម្លាំងកាយចិត្ត។ ពិភពលោកកំពុងរង់ចាំ និងតាមដានមើលស្ថានការណ៍។ វាប្រហែលជាក្តីសង្ឃឹមមួយដែលខុសពីចិត្ត ប៉ុន្តែអាមេរិកត្រៀមខ្លួនរួចហើយដើម្បីប្រឹងប្រែងតាមដែលអាចធ្វើបាន»។
អាចនិយាយបានថា វាជាសម្តីសរសើរលទ្ធផលនៃជំនួបរវាងប្រេសិតពិសេសរបស់ក្រុងសេអ៊ូលដែលបានជួបជាមួយមេដឹកនាំកំពូលកូរ៉េខាងជើង គីម ជុងអ៊ុន ដែលពេលនោះលោកបានយល់ព្រមជួបជាមួយលោកប្រធានាធិបតីកូរ៉េខាងត្បូង មូន ចេអ៊ីនផងដែរ។ បើតាមលោកប្រមុខសន្តិសុខជាតិ និងជាប្រេសិតទៅជួបមេដឹកនាំកូរ៉េខាងជើងលោក Chung Eui-yong អ្វីដែលសំខាន់មេដឹកនាំក្រុងព្យុងយ៉ាងក៏មាន ឆន្ទៈចង់ចរចាជាមួយអាមេរិក និងត្រៀមបោះបង់ចោលកម្មវិធីនុយក្លេអ៊ែររបស់ខ្លួនដែរក្នុងករណីដែលសន្តិសុខរបស់របបដឹកនាំលោកត្រូវបានធានាត្រឹមត្រូវនោះ។ ក្នុងពេលចរចាជាមួយអាមេរិក កូរ៉េខាងជើងសន្យាមិនបាញ់សាកល្បងអាវុធនុយក្លេអ៊ែរ ឬមីស៊ីលអ្វីនោះឡើយ។
តាមពិតទៅ វាជាលើកដំបូងហើយដែលមេដឹកនាំកំពូលកូរ៉េខាងជើង ជួបជាមួយមន្ត្រីកូរ៉េខាងត្បូង ចាប់តាំងពីការឡើងកាន់អំណាចនៅចុងឆ្នាំ២០១១ មក។ ហើយជំនួបនេះកើតឡើងក្រោយពេលដែលលោក គីម ជុងអ៊ុន បានបញ្ជូនប្អូនស្រីបង្កើតរបស់ខ្លួនទៅចូលរួមក្នុងពិធីបើកកីឡាអូឡាំពិករដូវរងារនៅកូរ៉េខាងត្បូង ហើយលោកស្រីក៏បានអញ្ជើញប្រធានាធិបតីកូរ៉េខាងត្បូងធ្វើទស្សនកិច្ចនៅទឹកដីកូរ៉េខាងជើងផង៕
© រក្សាសិទ្ធិដោយ thmeythmey.com