កីឡាជាតិ
ជាតិ
លីគកំពូល៖ ទ័ពប្រជែងជាមួយភ្នំពេញក្រោន, បឹងកេតប៉ះវេស្ទើន មុនសូលទីឡូអង្គរជួបអាស៊ីអឺរ៉ុប សកម្មភាពក្រុមទ័ពប្រកួតជាមួយក្រុមអង្គរថាយហ្គឺរកាលពីសប្តាហ៍ទី១នៅកីឡដ្ឋានខេត្តសៀមរាប
× ការប្រកួតបាល់ទាត់ក្របខណ្ឌលីគកំពូលកម្ពុជាឈានចូលសប្តាហ៍ទី២ ដោយនៅថ្ងៃសៅរ៍ ទី១០ មីនានេះ មានការប្រកួតចំនួន៣គូ។ ក្នុងនោះក្រុមក្រសួងការពារជាតិ(ទ័ព)ប្រជែងជាមួយក្រុមភ្នំពេញក្រោន នាម៉ោង៦:៣០នាទីនៅពហុកីឡដ្ឋានជាតិ។ រីឯក្រុមបឹងកេតតទល់ជាមួយម្ចាស់ផ្ទះវេស្ទើននៅម៉ោង៣រសៀល មុនសូលទីឡូអង្គរប្រើពហុកីឡដ្ឋានជាតិទទួលក្រុមអាស៊ីអឺរ៉ុបនាម៉ោង៣និង៣០នាទី។
ក្រោយយកឈ្នះក្រុមអង្គរថាយហ្គឺរ ១-០ ក្រុមក្រសួងការពារជាតិ ត្រូវប្រជែងជាមួយក្រុមភ្នំពេញក្រោនដែលយកឈ្នះសូលទីឡូអង្គរ ១-០ ក្នុងសប្តាហ៍ទី១ដូចគ្នា សម្រាប់ការប្រកួតសប្តាហ៍ទី២នៃក្របខណ្ឌលីគកំពូលកម្ពុជា នាម៉ោង៦និង៣០នាទីល្ងាចថ្ងៃទី១០ មីនា នៅពហុកីឡដ្ឋានជាតិ។ ការជួបគ្នារវាងក្រុមទាំងពីរអាចទុកជាជំនួបដ៏ជក់ចិត្ត និងតានតឹងបំផុត ព្រោះក្រុមទាំងពីរសុទ្ធតែត្រូវការ៣ពិន្ទុបន្ថែមដូចគ្នា ដើម្បីប្រជែងយកកំពូលតារាង។
ក្រៅពីជំនួបដ៏ជក់ចិត្តខាងលើ ក្រុមជើងឯកឆ្នាំ២០១៧បឹងកេតដែលយកឈ្នះក្រុមអាស៊ីអឹរ៉ុប ៤-៣ ក្នុងជំនួបបើកឆាក ត្រូវតទល់ជាមួយក្រុមវេស្ទើនភ្នំពេញនៅម៉ោង៣រសៀលនាកីឡដ្ឋានវេស្ទើនភ្នំពេញ។ នាការប្រកួតបើកឆាកនៅពហុកីឡដ្ឋានជាតិ ក្រុមអគ្គស្នងការនគរបាលជាតិបានលត់ក្រុមវេស្ទើនភ្នំពេញមិនឲ្យតដៃរួចក្នុងលទ្ធផល ៦-០។
ជាមួយគ្នានេះក្រុមសូលទីឡូអង្គរដែលបរាជ័យ ១-០ ក្រោមថ្វីជើងភ្នំពេញក្រោនដោយបាល់ពិន័យ១១ម៉ែត្រក្នុងជំនួបបើកឆាក នឹងប្រើពហុកឡដ្ឋានជាតិទទួលស្វាគមន៍ក្រុមអាស៊ីអឺរ៉ុប ដែលចាញ់បឹងកេត ៤-៣ ក្នុងជំនួបបើកឆាកដូចគ្នា នាវេលាម៉ោង៣និង៣០រសៀល។
ជំនួបរវាងក្រុមក្រសួងការពារជាតិជាមួយក្រុមភ្នំពេញក្រោន និងជំនួបរវាងក្រុមសូលទីឡូអង្គរជាមួយក្រុមអាស៊ីអឺរ៉ុប ដែលរៀបចំនៅពហុកីឡដ្ឋានជាតិដូចគ្នា នឹងផ្សាយផ្ទាល់តាមទូរទស្សន៍ BTV៕
Tag:
Cambodian League 2018
ទ័ព
ភ្នំពេញក្រោន
បឹងកេត
© រក្សាសិទ្ធិដោយ thmeythmey.com