តួឯកអប្សរាកញ្ញា ស្រីពេញ ថាខ្លួនមានមោទកភាពខ្លាំងព្រោះចេះរាំរបាំបុរាណ

បទយកការណ៍ / បទសម្ភាសន៍

សិល្បះ

តួឯកអប្សរាកញ្ញា ស្រីពេញ ថាខ្លួនមានមោទកភាពខ្លាំងព្រោះចេះរាំរបាំបុរាណ

11, Mar 2018 , 8:39 pm

រូបភាព

ដោយ: ប៉ូ សាគុន

ភ្នំពេញ៖ កញ្ញា អៀង ស្រីពេញ ជាអ្នករបាំបុរាណមួយរូប ដែលបានចូលរួមលើកតម្កើង និងផ្សព្វផ្សាយរបាំឲ្យពិភពលោកស្គាល់ តាមរយៈការទៅសម្តែងទាំងក្នុង និងក្រៅប្រទេស។ ទើបមានវ័យ២៦ឆ្នាំ ប៉ុន្តែ ស្រីពេញ បានក្លាយជាតួឯក អប្សរា នៅក្នុងរបាំក្បាច់បុរាណ ឬរបាំព្រះរាជទ្រព្យប្រមាណ៤ឆ្នាំមកហើយ។ សម្រាប់ កញ្ញា អៀង ស្រីពេញ នាងពិតជាមានមោទកភាពណាស់ ដែលបានរាំរបាំបុរាណខ្មែរ ឲ្យភ្ញៀវខ្មែរ និងបរទេសមើល និងយល់ថា រូបគេបាន និងលើកមុខមាត់ប្រទេស តាមរយៈរបាំបុរាណនេះ។ មិនត្រឹមតែការបង្ហាញរបាំបុរាណ និងយល់ច្បាស់ពីសិល្បៈនោះទេ ដែលធ្វើឲ្យតួឯកអប្សរារូបនេះ កើតក្តីរំភើប ប៉ុន្តែនាងមានមោទកភាពដែរ ដែលបានកើតជាមនុស្សស្រី ព្រោះមុនចូលសិល្បៈនាងគិតថា កើតជាស្រីពិបាកណាស់។

កញ្ញា អៀង ស្រីពេញ គឺជាអ្នករបាំបុរាណមួយរូប និងជាកូនស្រីពៅរបស់លោក អៀង ស៊ីធុល ដែលអ្នកសិល្បៈបុរាណដ៏ល្បីមួយរូបដែរ។ នាង បានក្លាយជាតួឯកអប្សរានៅក្នុងរបាំក្បាច់ បុរាណខ្មែរ ចាប់តាំងពីឆ្នាំ២០១៤មក។ មុនក្លាយជាតួឯកអប្សរា កញ្ញា ស្រីពេញ ដែលបច្ចុប្បន្នមានអាយុ២៦ឆ្នាំ បានហាត់រៀនរបាំក្បាច់បុរាណមួយរយៈ នៅក្នុងសមាគមរបាំរបស់ឪពុកខ្លួន មុនចូលរៀននៅសាលាវិចិត្រសិល្បៈ នៅអាយុ១១ឆ្នាំ។

កើតក្នុងត្រកូលអ្នកសិល្បៈស្រាប់ ហាក់មិនចម្លែកទេដែល កុមារី ស្រីពេញ មានឧបនិស្ស័យនឹងសិល្បៈ ស្របពេលឪពុកម្តាយ ក៏តែងជំរុញឲ្យខ្លួនចូលហាត់របាំបុរាណនេះទៀតនោះ។ បើតាម កញ្ញា អៀង ស្រីពេញ រូបគេកាន់តែមានទឹកចិត្តពុះកញ្ជ្រោល កាន់តែចូលចិត្តរបាំបុរាណ និងខំប្រឹងហាត់រៀនរហូតបានក្លាយជា តួឯក អប្សរានេះ ព្រោះនាងបានឃើញឪពុកបង្ហាញពីក្តីរំភើប និងមោទកភាព នៅពេលដែលសិល្បករខ្មែរបានទៅសម្ដែងនៅក្រៅប្រទេស។ កញ្ញា ស្រីពេញ បានរម្លឹកថា៖«កាលនៅតូច ពេលដែលប៉ាទៅសម្ដែងសិល្បៈក្រៅប្រទេស ប៉ាមកវិញតែងតែថតវីដេអូពីសកម្មភាពសម្ដែង ហើយប៉ាតែងនិយាយថា គាត់មានមោទកភាពដែលរបាំខ្មែរបានចេញទៅសម្ដែងនៅប្រទេសក្រៅ ហើយគាត់និយាយថា ប្រទេសគេបែបនេះបែបនោះ។ ពេលឮប៉ានិយាយបែបនេះ ខ្ញុំគិតថា ខ្ញុំចង់ទៅស្គាល់ប្រទេសគេដែរ ខ្ញុំចង់ទៅសម្ដែងរបាំនៅស្រុកគេដែរ ខ្ញុំក៏រឹតតែខំរៀនសិល្បៈ»។

មានស្រុកកំណើតនៅខេត្តកំពង់ស្ពឺ តួឯកអប្សរារូបនេះ ឲ្យដឹងថានាង អាចសម្តែងលើឆាកបាន នៅអាយុ១៣ឆ្នាំ ដោយផ្តើមរាំតែរបាំស្រួលៗសម្រាប់កុមារ។ បន្តបន្ទាប់មក ការរាំកាន់តែរីកចម្រើន រហូតមកដល់ជាតួឯកអប្សរា ដូចបច្ចុប្បន្ន ដែលការរាំជាប្រចាំ គឺនៅឆាកសម្ដែងសិល្បៈក្នុងបរិវេណសារមន្ទីរជាតិ និងរាំនៅតាមកម្មវិធីមួយចំនួនដែរ។ ក្រៅពីចេះរាំរបាំក្បាច់បុរាណ ស្រីពេញ ក៏ចេះរាំរបាំផ្សេងៗជាច្រើនទៀត ចេះលេងឧបករណ៍ភ្លេងបុរាណខ្មែរខ្លះៗ និងអាចច្រៀងបានខ្លះដែរ។ ស្រីពេញ ក៏កំពុងរៀនជំនាញទេសចរណ៍បដិសណ្ឋារកិច្ចដែរ។

មកដល់ពេលនេះ កញ្ញា ស្រីពេញ បាននាំយករបាំក្បាច់បុរាណខ្មែរ ទៅសម្តែងបាន៨ប្រទេសហើយ។ ស្រីពេញ បញ្ជាក់ថា រាល់ពេលសម្ដែងម្ដងៗ នាងបានសង្កេតឃើញថា បរទេសចាប់អារម្មណ៍ខ្លាំងចំពោះរបាំខ្មែរ ហើយគេតែងពោលសរសើរថារបាំខ្មែរស្អាត នារីរបាំក៏មានចរិយាទន់ភ្លន់ដែរ។ ស្រីពេញបានបញ្ជាក់ថា នៅពេលដែលនាងមានវ័យចំណាស់ ខ្លួននឹងទៅបង្រៀនទម្រង់សិល្បៈបុរាណ ទៅដល់កូនខ្មែរជំនាន់ក្រោយ ព្រោះនាងពិតជាចង់ឱ្យសិល្បៈខ្មែរ រីកដុះដាលក្នុងផ្នត់គំនិងក្មេងជំនាន់ក្រោយ៕