Arsene Wenger អ្នកចាត់ការទូទៅក្រុម Arsenal បាននិយាយថាលោកចង់ជៀសអោយផុតពីក្រុម Atletico Madrid ក្នុងវគ្គ ១/៤ផ្តាច់ព្រ័ត្រពានរង្វាន់ UEFA Europa League បន្ទាប់ពីយកឈ្នះ AC Milan ៣-១ ក្នុងការប្រកួតជើងទី២ វគ្គ១៦ក្រុមចុងក្រោយនៅរាត្រីថ្ងៃទី១៥ ខែមីនា។ នេះបើយោងតាម BBC។
ខ្សែប្រយុទ្ធ Danny Welbeck បានស៊ុតបាល់បញ្ចូលទី២គ្រាប់ និង Granit Xhaka ១គ្រាប់ជួយ ក្រុមលោក Arsene Wenger វាយបកយកឈ្នះកូនក្រុមរបស់លោក Gennaro Gattuso វិញក្រោយការនាំមុនពីការស៊ុតពីចម្ងាយរបស់ Hakan Calhanoglu ក្នុងលទ្ធផល ៣-១ សម្រាប់ការប្រកួតជើងទី២ពានលំដាប់ទី២អឺរ៉ុបនេះ។ សរុបលទ្ធផលទាំងជើង Arsenal ៥-១ AC Milan។
ក្រោយជ័យជម្នះនេះ អ្នកចាត់ការសញ្ជាតិបារាំងវ័យ៦៨ឆ្នាំបាននិយាយថា៖«យើងពិតជាចង់គេចឲ្យផុតពីក្រុម Atletico Madrid នៅវគ្គ៨ក្រុមចុងក្រោយ»។
ការចាប់ឆ្នោតសម្រាប់វគ្គ ១/៤ ផ្តាច់ព្រ័ត្រដែលមានក្រុមមកពីប្រទេសចំនួន៨ផ្សេងគ្នា នឹងត្រូវធ្វើឡើងនៅថ្ងៃសុក្រវេលាម៉ោង ៧:០០នាទីយប់ [ម៉ោងនៅកម្ពុជា]។ ក្រុមទាំង៨ដែលនឹងត្រូវចាប់ឆ្នោតរើសក្រុមរួមមាន Arsenal (អង់គ្លេស), Lazio (អ៊ីតាលី), Atletico Madrid (អេស្ប៉ាញ), SCKA Moscow (រុស្ស៊ី), Sporting Lisbon (ព័រទុយហ្គាល់), Red Bulls Salzburg (អូទ្រីស), RB Leipzig (អាល្លឺម៉ង់) និង Marseille (បារាំង)៕