ជាតិ
នយោបាយជាតិ
សម្តេច ហ៊ុន សែន ចាប់ដៃជាមួយសមភាគីអូស្ត្រាលី លោក Malcolm Turnbull មុនជំនួបទ្វេភាគីនៅស៊ីដនី។ រូបថត AFP
×![]()
ដោយ: សារព័ត៌មានថ្មីៗ
វត្តមាននៅក្រុងស៊ីដនី មិនទាន់បានមួយថ្ងៃស្រួលបួលផងដែរ សម្តេចនាយករដ្ឋមន្ត្រី ហ៊ុន សែន បាននិយាយប្រាប់ពលរដ្ឋខ្មែរនៅអូស្ត្រាលី ថា រដ្ឋាភិបាលលោក Malcolm Turnbull ផ្តល់ជំនួយ៧៨លានដុល្លារអាមេរិកដល់កម្ពុជា។ ជំនួយនេះ ត្រូវបានលើកឡើងនាជំនួបទ្វេភាគីរវាងប្រមុខរដ្ឋាភិបាលប្រទេសទាំងពីរនៅថ្ងៃទី១៦ ខែមីនា ឆ្នាំ២០១៨ ។
ក្រោយពីបញ្ចប់ជំនួបទ្វេភាគី សម្តេច ហ៊ុន សែន ក៏ត្រូវបានស្វាគមន៍ ដោយប្រជាពលរដ្ឋខ្មែរមួយចំនួន ដែលកំពុងរស់នៅនិងធ្វើការក្នុងប្រទេសអូស្ត្រាលី។ សម្តេច ហ៊ុន សែន បានផ្តល់ដំណឹងនៃការទទួលបានជំនួយនេះ ដល់ពួកគេ នាពេលនោះ។
យ៉ាងណាក៏ដោយ សម្តេច ហ៊ុន សែន ដូចជាមិនបានបញ្ជាក់ឡើយថា ថវិកា៧៨លានដុល្លារនោះ នឹងត្រូវយកមកអភិវឌ្ឍលើវិស័យអ្វីនៅកម្ពុជា។ បើតាមប្រមុខរដ្ឋាភិបាលកម្ពុជា រដ្ឋាភិបាលអូស្ត្រាលី អាចនឹងផ្តល់ជំនួយផ្សេងៗទៀត។
គួររម្លឹកថា សម្តេច ហ៊ុន សែន រួមទាំងគណៈប្រតិភូជាន់ខ្ពស់ បានចាកចេញពីប្រទេសកម្ពុជានៅល្ងាចថ្ងៃទី១៥ ខែមីនា ឆ្នាំ២0១៨ ទៅចូលរួមកិច្ចប្រជុំអាស៊ាន-អូស្ត្រាលី។ កិច្ចប្រជុំនេះ ត្រូវចាប់ផ្តើមពីថ្ងៃទី១៦ ដល់ថ្ងៃទី១៨ ខែមីនា ឆ្នាំ២0១៨៕
Tag:
ហ៊ុន សែន
អូស្ត្រាលី
ជំនួយ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
