ជាតិ
អាជីវករផ្សារច្បារអំពៅដាក់សំណើ៣ចំណុចឲ្យ អភិបាលខណ្ឌជួយក្រោយភ្លើងឆេះផ្សារ
×![]()
ក្រុមអាជីវករដែលមានតូបឆេះក្នុងផ្សារច្បារអំពៅ បានដាក់សំណើរ៣ចំណុច ឲ្យអាជ្ញាធរខណ្ឌជួយ ដើម្បីពន្លឿនការសាងសង់ផ្សារឲ្យបានលឿន។ ខណៈដែលអាជ្ញាធរខណ្ឌច្បារអំពៅថា នៅមិនទាន់អាចកំណត់រយៈពេលឆ្លើយតបបាននៅឡើយ។
អាជីវករផ្សារច្បារអំពៅ ដែលមានតូបឆេះ កាលពីយប់ថ្ងៃទី១៦ ខែមីនា បានស្នើទៅដល់អាជ្ញាធរខណ្ឌច្បារអំពៅ ចំនួន៣ចំនុច នៅក្នុងការប្រជុំស្វែងរកដំណោះស្រាយនៅវត្តច្បារអំពៅនាព្រឹកថ្ងៃទី ១៩ ខែមីនា។ ដំណោះស្រាយដែលប្រជាពលរដ្ឋចង់បានបំផុត ទាំង៣ចំណុចនោះរួមមាន៖ សុំឲ្យខណ្ឌជួយធ្វើដំបូលផ្សាររួមមួយ ហើយមានកម្ពស់ខ្ពស់ សុំឲ្យប្រជាពលរដ្ឋជាអ្នកសាងសងតូបថ្មីដោយខ្លួនឯង និងសុំឲ្យអាជ្ញាធរជួយសំអាត និងសាងសង់ដំបូលផ្សារឲ្យបានលឿនមុនពេលចូលឆ្នាំប្រពៃណីខ្មែរ នាពេលខាងមុខ។
ឆ្លើយតបនឹងការលើកឡើងរបស់ក្រុមអាជីវករ ជារួមនេះរួចមក អភិបាលខណ្ឌច្បារអំពៅ លោក ចេង មុនីរ៉ា បានសន្យារជាមួយក្រុមអាជីវករថា នឹងយកសំណើទាំងនេះ ទៅពិភាក្សាសិន តែលោកនៅមិនទាន់អាចកំណត់រយៈពេលនៃការដោះស្រាយជូនក្រុមអាជីវករបាននៅពេលណាឡើយ។
ក្រៅពីស្នើដល់អាជ្ញាធរឲ្យជួយដោះស្រាយលើការសាងសង់ផ្សារឡើងវិញ ក្រុមអាជីវករដែលឆេះតូប និងឥវ៉ាន់អស់ទាំងស្រុងក៏សុំឲ្យ លោកនាយករដ្ឋមន្ត្រី ហ៊ុន សែន ជួយជាថវិការដល់ពួកគាត់ឲ្យបានយ៉ាងហោចណាស់ ៥០ភាគរយនៃការខូចខាត ដើម្បីមានដើមទុនចាប់ផ្ដើមអាជីវកម្មជាថ្មី។
ផ្សារច្បារអំពៅបានឆាបឆេះនៅយប់ថ្ងៃទី១៥ ខែមីនា និងរលត់ទាំងស្រុងនៅថ្ងៃទី១៦ ខែមីនា។ តាមការសន្និដ្ឋានពីអាជីវករនៅក្នុងផ្សារបានឲ្យដឹងថា តូបដែលឆាបឆេះមានប្រមាណជាង៦០០តូប ដែលក្នុងនោះមានតូបសរុបជាង១,៥០០តូប៕
Tag:
អគ្គិភ័យ
ឆេះផ្សារច្បារអំពៅ
ខណ្ឌច្បារអំពៅ
© រក្សាសិទ្ធិដោយ thmeythmey.com
