អន្តរជាតិ
បោះឆ្នោតប្រធានាធិបតីរុស្ស៊ី៖ ពូទីន សង្ឃឹមឈ្នះខ្ពស់ ព្រោះអវត្តមានគូប្រជែងសំខាន់ លោក វ៉្លាឌីមៀ ពូទីន និងបេក្ខជនផ្សេងទៀត (រូបភាព៖ AFP)
× នៅថ្ងៃទី១៨ ខែមីនាស្អែកនេះ ប្រជាជនរុស្ស៊ីនឹងបោះឆ្នោតជ្រើសរើសប្រធានាធិបតីថ្មីសម្រាប់អាណត្តិ៦ឆ្នាំ។ បេក្ខជន៨នាក់បានចូលរួមប្រកួតប្រជែងក្នុងការបោះឆ្នោតនេះ ដោយប្រធានាធិបតីបច្ចុប្បន្ន វ្ល៉ាឌីមៀ ពូទីន មានសង្ឃឹមខ្ពស់ជាងគេដើម្បីបន្តតំណែងទៀត។ គេមិនឃើញឡើយបេក្ខជនដែលអាចប្រជែងលោក ពូទីន បាន ខណៈអ្នកនយោបាយប្រឆាំងល្បីឈ្មោះ ត្រូវបានហាមឃាត់ចូលរួមក្នុងការបោះឆ្នោតលើកនេះ។
បេក្ខជនចំនួន៧នាក់មានប្រុស៦ ស្រី១ បានឈរឈ្មោះប្រកួតប្រជែងក្នុងការបោះឆ្នោតជ្រើសរើសប្រធានាធិបតីរុស្ស៊ីនៅថ្ងៃទី១៨ ខែមីនា។ ប្រធានាធិបតីបច្ចុប្បន្នលោក វ្ល៉ាឌីមៀ ពូទីន ភាគរយច្រើនក្នុងការបន្តដឹកនាំរុស្ស៊ីរយៈពេល៦ឆ្នាំទៀត ដ្បិតបេក្ខជនផ្សេងទៀតមិនមានសមត្ថភាពគ្រប់គ្រាន់ និងអាចប្រដូចទៅនឹងតួល្ខោនដែលរៀបចំបង្គ្រប់កិច្ចប៉ុណ្ណោះ ខណៈបេក្ខជនប្រឆាំងបែរជាត្រូវរារាំងពីការចូលរួមបោះឆ្នោតលើកនេះទៅវិញ។
បេក្ខជន៧នាក់មានដូចជាលោក Pavel Grudinin មហាសេដ្ឋីវ័យ៥៧ឆ្នាំ, លោកស្រី Ksenia Sobchak អតីតតារាទូរទស្សន៍, លោក Vladimir Zhirinovsky បេក្ខជនប្រធានាធិបតីមិនដែលឈ្នះឆ្នោត, លោក Grigory Yavlinsky ជាអ្នកនយោបាយដែលមាននិន្នាការនយោបាយសេរី, លោក Boris Titov ជាអ្នកជំនួញម្នាក់ដែលមានឈ្មោះបោះសំឡេងគួរសម, លោក Sergei Baburin អតីតអនុប្រធានសភាជាន់ទាប និងលោក Maxim Suraikin ដែលមិនសូវល្បីឈ្មោះ។
តាមពិតទៅ បេក្ខជនទាំងអស់ខាងលើនេះ ក៏ជាអ្នកប្រឆាំងលោក ពូទីន ដែរ តែមិនសូវរិះគន់ចំៗឡើយ។ គេមិនរំពឹងថា បេក្ខជនទាំងនេះអាចផ្ដួលលោក ពូទីន បានទេ។ ដោយឡែក បេក្ខជនម្នាក់ទៀតដែលជឿថា អាចប្រជែងជាមួយលោក ពូទីន គឺលោក Alexei Navalny ។ ប៉ុន្តែគណៈកម្មការកណ្តាលរៀបចំការបោះឆ្នោតរុស្ស៊ីបានបដិសេធសិទ្ធិចូលរួមប្រកួតប្រជែងក្នុងការបោះឆ្នោតរបស់មេដឹកនាំប្រឆាំងរូបនេះកាលពីថ្ងៃទី ២៥ ខែធ្នូ ឆ្នាំ២០១៧ ។
ប្រធានគណៈកម្មការបោះឆ្នោតរុស្ស៊ីបានអះអាងថា ការហាមឃាតឃាត់មេដឹកនាំបក្សប្រឆាំងខាងលើនេះដោយសារតែលោកត្រូវបានកាត់ទោសពាក់ព័ន្ធបទឧក្រិដ្ឋកន្លងមក។ តុលាការរុស្ស៊ីបានរកឃើញថាលោក Navalny ជាប់ពាក់ព័ន្ធនឹងការកេងបន្លំលុយនៅក្រុមហ៊ុនឈើមួយ ហើយតុលាការសម្រេចព្យួរទោសរយៈពេលប្រាំឆ្នាំ។ ប៉ុន្តែលោកបានបដិសេធការចោទប្រកាន់និងអះអាងថាលោកស្អាតស្អំ និងបានសង្កត់ធ្ងន់ថា ការកាត់ទោសនេះជារឿងនយោបាយសុទ្ធសាធ។
ងាកទៅលោក ពូទីន វិញ ក្ដីសង្ឃឹមឈ្នះឆ្នោតលើកនេះមានអត្រាខ្ពស់ណាស់។ សរុបទៅ ទាំងមុន ទាំងក្រោយ លោកនឹងកាន់តំណែងច្រើនជាង ២៤ឆ្នាំបើរាប់ទាំងធ្វើជានាយករដ្ឋមន្ត្រីនិងប្រធានាធិបតីផង។ យ៉ាងណាមិញ លោកអះអាងថា លោកមិនជំរុញឲ្យមានការកែប្រែរដ្ឋធម្មនុញ្ញដើម្បីអនុញ្ញាតឲ្យលោកឈរឈ្មោះជាប្រធានាធិបតីគ្មានពេលកំណត់ឡើយ៕
Tag:
រុស្ស៊ី
វ្ល៉ាឌីមៀ ពូទីន
បោះឆ្នោតប្រធានាធិបតីរុស្ស៊ី
© រក្សាសិទ្ធិដោយ thmeythmey.com