World Cup៖ ម្ចាស់ផ្ទះរុស្ស៊ី រំពឹងបំបែកកំណត់ត្រាចាស់ឆ្នាំ១៩៦៦

កីឡាអន្តរជាតិ

អន្តរជាតិ

World Cup៖ ម្ចាស់ផ្ទះរុស្ស៊ី រំពឹងបំបែកកំណត់ត្រាចាស់ឆ្នាំ១៩៦៦

19, Mar 2018 , 9:00 am

រូបភាព

ខ្សែប្រយុទ្ធរុស្ស៊ី Fedor Smolov អបអរការស៊ុតបាល់បញ្ចូលទីរបស់ខ្លួននា 2017 Confederations Cup លើនូវែលសេឡង់។ រូបថត AFP

ដោយ: ទេព ពិទូរ្យ

ក្រុមកីឡាបាល់ទាត់ជម្រើសជាតិរុស្ស៊ីដែលជាម្ចាស់ផ្ទះនៃការប្រកួតពានរង្វាន់កីឡាបាល់ទាត់ FIFA World Cup លើកទី២១ ស្ថិតក្នុងពូល A ត្រូវជួប អារ៉ាប៊ីសាអូឌីត, អេហ្ស៊ីប និង អ៊ុយរូហ្គាយ។ រុស្ស៊ី [រាប់បញ្ចូលទាំងកាលនៅជាសហភាពសូវៀត] ធ្លាប់បង្ហាញខ្លួន១០លើករួចមកហើយក្នុងព្រឹត្តិការណ៍លំដាប់ពិភពលោកនេះចាប់តាំងពីឆ្នាំ១៩៥៨ មក។

គ្រូបង្វឹក៖ លោក Stanislav Cherchesov (រុស្ស៊ី)

លោក Stanislav Cherchesov ជាអតីតអ្នកចាំទីរបស់ក្រុមជម្រើសជាតិរុស្ស៊ី និងធ្លាប់បង្ហាញខ្លួនសម្រាប់ការប្រកួតបាល់ទាត់ពិភពលោកឆ្នាំ ១៩៩៤ និង ២០០២ ។ អ្នកចាត់ការវ័យ ៥៤ឆ្នាំរូបនេះ បានឡើងដឹកនាំរុស្ស៊ីនៅឆ្នាំ ២០១៦។ មុនពេលមកដឹកនាំក្រុមជម្រើសជាតិ លោក Cherchesov ក៏ធ្លាប់ជាអតីតគ្រូ Dynamo Moscow និង Legia Warsaw ផងដែរ។

កីឡាករឆ្នើម៖ ខ្សែប្រយុទ្ធ Fedor Smolov និង អ្នកចាំទី Igor Akinfeev

Fedor Smolov ដែលបច្ចុប្បន្នប្រកបអាជីពក្នុងក្លិបបាល់ទាត់ FC Krasnodar នៃលីកកំពូលរបស់រុស្ស៊ី ត្រូវបានគេរំពឹងថានឹងអាចរកគ្រាប់បាល់ឲ្យក្រុមជម្រើសជាតិបានក្នុងព្រឹត្តិការណ៍ World Cup ឆ្នាំក្រោយនេះ។

ខ្សែប្រយុទ្ធវ័យ២៧ឆ្នាំនេះ បានស៊ុតបាល់បញ្ចូលទីយ៉ាងអស្ចារ្យនាជំនួយដែលរុស្ស៊ីយកឈ្នះនូវែលសេឡង់ ២-០ ក្នុងការប្រកួតបើកឆាកពាន FIFA Confederations Cup 2017។

ចំណែក អ្នកចាំទី Igor Akinfeev សព្វថ្ងៃលេងឲ្យក្រុម CSKA Moscow។ ក្នុងវ័យ ៣១ឆ្នាំ បេក្ខភាពដែលជួយ CSKA ឈ្នះពាន Russian Premier League ៦សម័យកាលធ្លាប់បង្ហាញខ្លួនឲ្យក្រុមជម្រើសជាតិ ១០០ដង។ ប្រធានក្រុមរូបនេះជាតួអង្គសំខាន់ និងមានឥទ្ធិពលម្នាក់ផងដែរដើម្បីជួយក្រុមម្ចាស់ផ្ទះក្នុងការប្រកួតពានលំដាប់ទី១ពិភពលោក។

ប្រវត្តិក្នុង World Cup៖

នេះជាការបង្ហាញខ្លួនលើកទី ១១ សម្រាប់ក្រុមមកពីទ្វីបអឺរ៉ុប និងជាម្ចាស់ផ្ទះ World Cup លើកទី១នេះ។ ការបង្ហាញខ្លួន១០លើកកន្លងមក រុស្ស៊ីធ្វើបានល្អបំផុតដោយអាចឈានដល់វគ្គពាក់កណ្តាលផ្តាច់ព្រ័ត្រ កាលពីឆ្នាំ១៩៦៦។

កម្មវិធីប្រកួត៖

បន្ទាប់ពីលទ្ធផលចាប់ឆ្នោតរើសពូលរួចរាល់សម្រាប់ព្រឹត្តិការណ៍ពាន់រង្វាន់ពិភពលោក ដែលរៀបចំឡើងនៅវិមានក្រេមឡាំង ក្រុងមូស្គូ ប្រទេសរុស្ស៊ីកាលពីថ្ងៃទី១ ខែធ្នូនេះ ម្ចាស់ផ្ទះរុស្ស៊ី ស្ថិតក្នុងពូល A ត្រូវជួប អេហ្ស៊ីប (អាហ្វ្រិក) អារ៉ាប៊ីសាអូឌីត (អាស៊ី) និងអ៊ុយរូហ្គាយ (អាមេរិកខាងត្បូង)។

-១៤ មិថុនា៖ រុស្ស៊ី vs អារ៉ាប៊ីសាអូឌីត (ម៉ោង១០យប់)

-២០ មិថុនា៖ រុស្ស៊ី vs អេហ្ស៊ីប (ម៉ោង១អាធ្រាត)

-២៥ មិថុនា៖ អ៊ុយរូហ្គាយ vs រុស្ស៊ី (ម៉ោង៩យប់)