អន្តរជាតិ
ចិន៖ ក្បាលម៉ាស៊ីនដឹកនាំប្រទេសថ្មីសម្បូរដោយមនុស្សស្និទ្ធលោក ស៊ី ជិនភីង ឧបនាយករដ្ឋមន្រ្តីទាំងបួនរបស់ចិន (រូបភាព៖ AFP)
× សមាជិកសភាប្រជាជនចិន នៅថ្ងៃទី១៩ ខែមីនា បានបោះឆ្នោតយល់ព្រមលើសមាសភាពនៃរដ្ឋាភិបាលអាណត្តិថ្មី។ សមាជិករដ្ឋាភិបាលខ្លះអាចរក្សាតំណែងរបស់ខ្លួន និងខ្លះទៀតត្រូវបានដំឡើងឋានៈ ឬតំណែងជាដើម។ ជាមួយគ្នានេះ សមាជិករដ្ឋាភិបាល និងប្រធានស្ថាប័នចំណុះជាច្រើន ត្រូវបានផ្លាស់ប្ដូរ និងជំនួសដោយអ្នកថ្មីដែលភាគច្រើនជាមនុស្សមានទំនាក់ទំនងជិតស្និទ្ធជាមួយលោកប្រធានាធិបតី ស៊ី ជិនភីង ។
ក្បាលម៉ាស៊ីនដឹកនាំរដ្ឋចិនថ្មី បានចេញជារូបរាងហើយនៅថ្ងៃទី១៩ ខែមីនា។ សមាជិកសភាប្រជាជនជិតបីពាន់នាក់បានបោះឆ្នោតគាំទ្រលើសមាសភាពរដ្ឋាភិបាលថ្មី ដែលស្នើដោយលោក លី ខឹឈាំង មេដឹកនាំលំដាប់ទីពីររបស់ចិន។ លោក លី ផ្ទាល់ ក៏ទើបត្រូវបានសភាគាំទ្រឲ្យកាន់តំណែងជានាយករដ្ឋមន្ត្រីសម្រាប់អាណត្តិថ្មីកាលពីថ្ងៃទី១៨ ខែមីនា បន្ទាប់ពីត្រូវបានស្នើជាបេក្ខជនដោយលោកប្រធានាធិបតី ស៊ី ជិនភីង ។
បើតាមទីភ្នាក់ងារព័ត៌មាន Xiinhua ក្នុងសមាសភាពថ្មីនេះ ឧបនាយករដ្ឋមន្ត្រីទាំងបួនសុទ្ធ តែ ជា មនុស្សថ្មី គឺលោក ហាន ចឹង សមាជិកទី៧ នៃគណៈកម្មាធិការអចិន្ត្រៃយ៍ការិយាល័យនយោបាយ, លោកស្រី ស៊ុន ឈុនឡាន, លោក ហ៊ូ ឈុនហ័រ និងលោក លីវ ហឺ ។ លោក លីវ ហឺ នេះហើយ គឺ ជា ទីប្រឹក្សាសេដ្ឋកិច្ចរបស់លោក ស៊ី ជិនភីង ។ លោក ស៊ី បានផ្លាស់ប្ដូរក្រុមការងារសេដ្ឋកិច្ចរបស់ខ្លួន ដើម្បីដោះស្រាយបញ្ហាក្នុងស្រុក និងទំនាក់ទំនងពាណិជ្ជកម្មក្រៅប្រទេស ជាពិសេសជាមួយអាមេរិក។
អ្វីគួរឲ្យចាប់អារម្មណ៍នោះ លោក វ៉ាង យី ត្រូវបានដំឡើងឋានៈជាទីប្រឹក្សារដ្ឋ ដែលជាតំណែងខ្ពស់ជាងរដ្ឋមន្ត្រីធម្មតា ហើយនៅតែរក្សាតំណែងរដ្ឋមន្ត្រីការបរទេសដដែល។ លោក វ៉ាង តែងចេញការពារក្រុងប៉េកាំងយ៉ាងខ្លាំងលើឆាកអន្តរជាតិ។ តំណែងរដ្ឋមន្ត្រីការពារជាតិបានទៅលើលោកឧត្តមសេនីយ៍ វៃ ហ្វឹងហឺ ដែលទទួលតំណែងជាទីប្រឹក្សារដ្ឋដែរ។ អ្នកទាំងស្ថិតក្នុងចំណោមទីប្រឹក្សារដ្ឋថ្មីទាំង៥ ដែលស្នើដោយលោកនាយករដ្ឋមន្ត្រី លី ។
ប្រធានាធិបតីចិន ស៊ី ជិនភីងចាប់ដៃនាយករដ្ឋមន្រ្តី លី ខឹឈាំង (រូបភាព៖ Xinhua)
សម្រាប់តំណែងសំខាន់ៗផ្សេងទៀតវិញ ទេសាភិបាលធនាគារប្រជាជនថ្មី គឺលោក យី កាង, តំណែងប្រធានតុលាការកំពូលប្រជាជនបានទៅលោក ចូវ ឈាំង ឯតំណែងអគ្គរដ្ឋអាជ្ញាថ្មីបានទៅលោក ចាង ជុន ។ មន្ត្រីយោធាជាន់ខ្ពស់ពីររូប គឺឧត្តមសេនីយ៍ ស៊ូ ឈីឡាំង និងឧត្តមសេនីយ៍ ចាង យូស្យា ដែលជាអនុប្រធានគណៈកម្មការយោធាមជ្ឈិមបក្ស ក៏ជាប់ឆ្នោតជាអនុប្រធានគណៈកម្មការយោធារដ្ឋដែរ។ លោក ស៊ី ជិនភីង ជាប្រធានគណៈកម្មការទាំងពីរនេះ។
ជាការកត់សម្គាល់ មន្ត្រីទទួលបន្ទុកផ្នែកសេដ្ឋកិច្ច និងការបរទេស ត្រូវបានផ្លាស់ប្ដូរស្ទើរទាំងស្រុង ដែលនេះជាសញ្ញាបង្ហាញពីនយោបាយអាទិភាពរបស់លោក ស៊ី ជិនភីង ក្នុងរយៈពេល៥ឆ្នាំខាងមុខ។ លើការងារសេដ្ឋកិច្ច លោក លីវ ហឺ នឹងដឹកនាំអនុវត្តនយោបាយរបស់លោក ស៊ី ដោះស្រាយបញ្ហាក្នុងស្រុក និងការពារប្រយោជន៍ចិនលើឆាកអន្តរជាតិ។ ឯកិច្ចការការទូតវិញ មន្ត្រីភាគច្រើនត្រូវបានដំឡើងឋានៈ ដែលនេះធ្វើឲ្យពួកគេមានលទ្ធភាពសម្រេចចិត្តបានច្រើនថែមទៀត៕
Tag:
ចិន
ស៊ី ជិនភីង
វ៉ាង យី
© រក្សាសិទ្ធិដោយ thmeythmey.com