ជាតិ
សេដ្ឋកិច្ច
សម្តេច ហ៊ុន សែន ស្នើឲ្យមានការហោះហើរត្រង់ ពីអូស្ត្រាលី មកកាន់កម្ពុជា ជំនួបរវាងសម្តេច ហ៊ុន សែន ប្រមុខរដ្ឋាភិបាលកម្ពុជា និងលោក Jeremy Johnson ប្រធានសភាពាណិជ្ជកម្មអូស្រ្តាលី កាលពីថ្ងៃទី១៦ ខែមីនា ឆ្នាំ២0១៨។ រូបពីទំព័រហ្វេសបុក សម្តេច ហ៊ុន សែន
× សម្តេច ហ៊ុន សែន ប្រមុខរដ្ឋាភិបាលកម្ពុជា បានស្នើឲ្យលោក Jeremy Johnson ប្រធានសភាពាណិជ្ជកម្មអូស្ត្រាលី ជំរុញការតភ្ជាប់ការហោះហើរត្រង់ ពីអូស្ត្រាលីមកកាន់កម្ពុជា ដើម្បីពង្រីកការវិនិយោគ និងទេសចរណ៍ ឲ្យបានកាន់តែច្រើនថែទៀត។ នេះបើតាមការចុះផ្សាយរបស់ទីភ្នាក់ងារសារព័ត៌កម្ពុជា (AKP)។
សម្តេច ហ៊ុន សែន បានលើកឡើងពីសំណើនេះ ទៅកាន់លោក Jeremy Johnson ពេលទៅចូលរួមកិច្ចប្រជុំ អាស៊ាន-អូស្ត្រាលី ក្នុងទីក្រុងស៊ីដនី ប្រទេសអូស្ត្រាលី កាលពីថ្ងៃទី ១៦ ខែមីនា ឆ្នាំ២០១៨។ បើតាម AKP សម្តេច ហ៊ុន សែន បានបញ្ជាក់ថា៖«ប្រទេសយើងទាំងពីរ គួរតែមានអ្វីៗជាច្រើនទៀត ជាពិសេស លើកិច្ចសហប្រតិបត្តិការទ្វេភាគី លើវិស័យពាណិជ្ជកម្ម វិនិយោគ និងទេសចរណ៍»។
ក្នុងជំនួបជាមួយលោក Malcolm Turnbull នាយករដ្ឋមន្ត្រីអូស្ត្រាលី សម្ដេច ហ៊ុន សែន ក៏បានលើកឡើងផងដែរថា ប្រទេសទាំងពីរខិតខំធ្វើយ៉ាងណា ដើម្បីជំរុញទំនាក់ទំនងសេដ្ឋកិច្ច ឲ្យកើនឡើង។ AKP បានឲ្យដឹងថា សម្តេច ហ៊ុន សែន ចង់ឃើញការតភ្ជាប់ការហោះ ហើរផ្ទាល់ពីអូស្ត្រាលីទៅកាន់កម្ពុជា និងពីកម្ពុជាមកអូស្ត្រាលី ដែលអាចជំរុញឲ្យទំនាក់ទំនងរវាងប្រទេសទាំងពីរបានកាន់តែល្អប្រសើរ។ AKP បានស្រង់ប្រសាសន៍របស់ប្រមុខរដ្ឋាភិបាលកម្ពុជា ទៅចុះផ្សាយបែបនេះថា៖«បើយើង អាចមានជើងយន្តហោះផ្ទាល់រវាងកម្ពុជា និងអូស្ត្រាលីនោះ ក្រុមហ៊ុនហោះហើរ នឹងមិនមានការខាងបង់ឡើយ»។
បើតាម AKP លោក Jeremy Johnson បានឆ្លើយតបថា សភាពាណិជ្ជកម្មអូស្ត្រាលី នឹងជំរុញវិស័យទេសចរណ៍និងវិនិយោគ ហើយនៅពេលខាងមុខ លោក នឹងខិតខំធ្វើយ៉ាងណាឱ្យសភាពាណិជ្ជកម្ម ជំរុញការងារនេះឱ្យបានច្រើនថែមទៀត។
បើតាមការអះអាងរបស់សម្តេច ហ៊ុន សែន រដ្ឋាភិបាលអូស្ត្រាលី បានផ្តល់ជំនួយ៧៨លានដុល្លារ ដល់កម្ពុជា។ ការផ្តល់ជំនួយនេះ ធ្វើឡើងក្នុងអំឡុងដែលសម្តេច ហ៊ុន សែន ទៅចូលរួមកិច្ចអាស៊ាន-អូស្ត្រាលី កាលពីថ្ងៃទី១៦ ដល់ថ្ងៃទី១៨ ខែមីនា ឆ្នាំ២0១៨៕
Tag:
អូស្ត្រាលី
កម្ពុជា
© រក្សាសិទ្ធិដោយ thmeythmey.com