អន្តរជាតិ
លោក ឌូទើតេ បបួលសមាជិកហត្ថលេខីផ្សេងទៀតដើរចេញពីតុលាការព្រហ្មទណ្ឌអន្តរជាតិ រូបភាព AFP
× ប្រមុខដឹកនាំកំពូលរបស់ហ្វីលីពីន លោក រ៉ូឌ្រីហ្គោ ឌូទើតេ បានចាប់ផ្តើមយុទ្ធនាការមួយដោយបបួលប្រទេសហត្ថលេខីផ្សេងទៀត នៃលក្ខន្តិកៈក្រុងរ៉ូម ឲ្យដើរចេញពីតុលាការព្រហ្មទណ្ឌអន្តរជាតិ ។ យុទ្ធនាការនេះ ធ្វើឡើងបន្ទាប់ពីរូបលោកផ្ទាល់ បានប្រកាសដកហ្វីលីពីនចេញពីតុលាការអន្តរជាតិមួយនេះ បន្ទាប់ពីមានការបើកការវិនិច្ឆ័យបឋមលើសង្គ្រាមគ្រឿងញៀនរបស់លោក ។
ឆ្លៀតឱកាសនៃការថ្លែងសុន្ទរកថាបិទបញ្ចប់វគ្គយោធា លោក ប្រធានាធិបតី រ៉ូឌ្រីហ្គោ ឌូទើតេ នៅថ្ងៃ១៨ មីនា បានថ្លែងរិះគន់ពីភាពមិនឯករាជ្យ និងតម្លាភាព របស់តុលាការព្រហ្មទណ្ឌអន្តរជាតិ ដែលហៅកាត់ថា ICC ។ លោកប្រធានាធិបតី ក៏ថែមទាំងទទូចឲ្យបណ្តាប្រទេសដទៃផ្សេងទៀត ចូលរួមជាមួយនឹងលោក ដើម្បីបញ្ចប់សមាជិកភាពនៅក្នុងតុលាការនោះទៀតផង ។
« ខ្ញុំ នឹងបញ្ចុះបញ្ចូលគ្រប់គ្នាដែលស្ថិតក្រោមសន្ធិសញ្ញា (លក្ខន្តិកៈក្រុងរ៉ូម) ដើម្បីចាកចេញ ។ វា (លក្ខន្តិកៈ) មិនមែនជាលិខិតូបករណ៍ ដែលបង្កើ់តឡើងដើម្បីគ្រប់គ្នាឡើយ តែគឺជាការរៀបចំដោយសហភាពអឺរ៉ុបប៉ុណ្ណោះ » ។ នេះគឺជាសេចក្តីថ្លែងការណ៍របស់លោកប្រធានាធិបតី ដែលត្រូវបានដកស្រង់ដោយភ្នាក់ងារព័ត៌មាន Reuters ។
គួររម្លឹកផងដែរថា នាសប្តាហ៍មុន លោកប្រធានាធិបតី ឌូទើតេ បានប្រកាសដកហ្វីលីពីន ចេញពីភាគីនៃលក្ខន្តិកៈក្រុងរ៉ូម នៃតុលាការព្រហ្មទណ្ឌអន្តរជាតិ ជាមួយនឹងការចោទប្រកាន់មួយចំនួនថា តុលាការនេះ មានទំនាក់ទំនងសម្ងាត់ជាមួយនឹងក្រុមសិទ្ធិមនុស្សរបស់អង្គការសហប្រជាជាតិ ដែលជាក្រុមលោក អះអាងថា តែងតែនិយាយបំភ្លីពីស្ថានភាពសិទ្ធិមនុស្សរបស់ហ្វីលីពីន ។
លោកប្រធានាធិបតី ថែមទាំងហ៊ាននិយាយថា ក្រុមទាំងពីរ បានឃុបឃឹតគ្នា ប្រើប្រាស់តុលាការអន្តរជាតិ ដើម្បីធ្វើឲ្យខូចឈ្មោះលោកក្នុងឆាកអន្តរជាតិតាមរយៈការចោទប្រកាន់មកលើរូបលោក ពាក់ព័ន្ធសង្គ្រាមគ្រឿងញៀន ដែលរូបលោក តែងពន្យល់ថាជាយុទ្ធនាការធ្វើឲ្យហ្វីលីពីនស្អាតស្អំពីសង្គមងងឹត នោះ ។
អ្វីដែលគួរកត់សម្គាល់នោះ នៅថ្ងៃ១៧ មីនាកន្លងទៅនេះ ប្រធានមហាសន្និបាតតុលាការព្រហ្មទណ្ឌអន្តរជាតិ លោក O-Gon Kwon បានថ្លែងអំពាវនាវឲ្យរដ្ឋាភិបាលហ្វីលីពីន រក្សាសមាជិកភាពរបស់ខ្លួនជាមួយនឹងតុលាការដដែល ខណៈលើកឡើងពីការដើរចេញរបស់ហ្វីលីពីន នឹងធ្វើឲ្យប៉ះពាល់អវិជ្ជមានដល់កិច្ចប្រឹងប្រែងរបស់ភាគីពាក់ព័ន្ធក្នុងការលើកកម្ពស់វិស័យយុត្តិធម៌សម្រាប់មនុស្សជាតិ ។
គិតចាប់ពីការអនុម័តលក្ខន្តិកៈក្រុងរ៉ូម ដែលជាលិខិតូបករណ៍មូលដ្ឋានដើម្បីបង្កើតតុលាការព្រហ្មទណ្ឌអន្តរជាតិនៅឆ្នាំ១៩៩៨ មកទល់ពេលនេះ តុលាការព្រហ្មទណ្ឌអន្តរជាតិមានសមាជិក ឬភាគី សរុបទាំងអស់ ១២៣ ប្រទេស ។ មានតែប្រទេសអាស៊ានពីរប៉ុណ្ណោះ ដែលជាហត្ថលេខីនៃលក្ខន្តិកៈនេះ ដែលក្នុងនោះរួមមានកម្ពុជា និងហ្វីលីពីន ៕
© រក្សាសិទ្ធិដោយ thmeythmey.com