អន្តរជាតិ
នាយករដ្ឋមន្ត្រីម៉ាឡេស៊ី ដាស់តឿនឲ្យប្រយ័ត្នពីចលនារើសសមាជិករបស់ក្រុមភេរវជនពី«រ៉ូហ៊ីងយ៉ា»
× ប្រមុខរដ្ឋាភិបាលម៉ាឡេស៊ី លោក ណាជីប រ៉ាហ្សាក់ បានសម្តែងការព្រួយបារម្ភពីការរីករាលដាលនៃអសន្តិសុខផ្ទៃក្នុងរបស់មីយ៉ាន់ម៉ាមកលើតំបន់ ។ លោក ណាជីប បានព្រមានពីការគំរាមកំហែងរបស់ក្រុមភេរជន ដោយពួកគេ អាចនឹងរើសសមាជិកថ្មីចេញពីក្រុមជនភៀសខ្លួនជនជាតិភាគតិចរ៉ូហ៊ីងយ៉ា ដែលរងគ្រោះពីហិង្សានៅក្នុងប្រទេសមីយ៉ាន់ម៉ា ។
លោកនាយករដ្ឋមន្ត្រី ណាជីប រ៉ាហ្សាក់ នៅថ្ងៃ១៧ មីនា បានថ្លែងក្នុងសន្និសីទតំបន់ក្នុងក្រុងស៊ីដនីពាក់ព័ន្ធនឹងការប្រយុទ្ធប្រឆាំងភេរវកម្មថា ភាពច្របូកច្របល់នៅរដ្ឋ រ៉ាខាន (Rakhine) របស់មីយ៉ាន់ម៉ា គឺជាការគំរាមកំហែងសន្តិសុខមួយមកលើអាស៊ីអាគ្នេយ៍ ។ លោក អះអាងថា វិបត្តិនេះ មិនអាចត្រឹមតែជាបញ្ហានៅក្នុងស្រុកមីយ៉ាន់ម៉ាទៀតឡើយ ។ នេះបើយោងតាមប្រភពព័ត៌មាន Jakarta Post ។
តាមប្រភពព័ត៌មានដដែលនោះ លោកនាយករដ្ឋមន្ត្រី បានបន្តទៀតថា ស្ថានភាពនៅទីនោះ (រដ្ឋរ៉ាខាន) កំពុងតែបង្កើតជាវិបត្តិមួយ ដែលធ្វើឲ្យក្រុមនុស្ស ដែលកំពុងរស់នៅវេទនា និងគ្មានសង្ឃឹមអ្វីក្នុងជីវិត ធ្លាក់ចូលក្នុង អន្ទាក់របស់ក្រុមភេរវជនបាន ។
ដើម្បីជាវិធានទប់ទល់នឹងលទ្ធភាពនេះ នាយករដ្ឋមន្ត្រីជិតផុតអាណត្តិរបស់ម៉ាឡេស៊ី បានសង្កត់ធ្ងន់យ៉ាងដូច្នេះថា៖« យើ់ង ត្រូវតែរឹងមាំ និងពង្រឹងកិច្ចសហប្រតិបត្តិការជាមួយនឹងគ្នា ដ្បិត ការដួលរលំរបស់ក្រុមភេរវជន នៅក្នុងប្រទេសស៊ីរី និងអ៊ីរ៉ាក់ បានធ្វើឲ្យក្រុមនេះ ត្រូវបែកខ្ញែក និងងើបឡើងវិញបាននៅគ្រប់ទីកន្លែង ជាពិសេសនៅក្នុងតំបន់ ដែលកំពុងតែតំបន់ ដែលមានវិបត្តិតែម្តង» ។
គួរជម្រាបផងដែរថា ដោយសារតែវិបត្តិនៃការប៉ះទង្គិចគ្នាប្រដាប់អាវុធរបស់អាជ្ញាធរ និងក្រុមឧទ្ទាម នៅក្នុងរដ្ឋរ៉ាខាន របស់មីយ៉ាន់ម៉ា បានធ្វើជនជាតិភាគតិចម៉ូស្លីមរ៉ូហ៊ីងយ៉ាប្រមាណជាងកន្លះលាននាក់ បានចេញពីទីនោះទៅកាន់ប្រទេសជិតខាង ។
អ្វីគួរកត់សម្គាល់នោះ ដោយសារតែវិបត្តិនេះ ម៉ាឡេស៊ី ជាពិសេសលោកនាយករដ្ឋមន្ត្រី ណាជីបតែម្តង បានប៉ះទង្គិចផ្នែកការទូតជាមួយនឹងរដ្ឋាភិបាលមីយ៉ាន់ម៉ារបស់លោកស្រី អ៊ុងសាន ស៊ូជី ជាច្រើនលើកមកហើយ ។ ម៉ាឡេស៊ី កន្លងមកមានទាំងការប្រមូលផ្តុំដើម្បីប្រឆាំងរបបដឹកនាំរបស់មីយ៉ាន់ម៉ាដែលបង្កើតឲ្យមានវិបត្តិជនភៀសខ្លួន និង ក៏កំពុងតែឈានដល់លទ្ធភាពមួយនៃការកកើតជាក្រុមភេរវជននៅក្នុងតំបន់ផងដែរនោះ ៕
Tag:
ម៉ាឡេស៊ី
រ៉ូហ៊ីងយ៉ា
អាស៊ាន
© រក្សាសិទ្ធិដោយ thmeythmey.com