ជាតិ
សេដ្ឋកិច្ច
ទិដ្ឋភាពព្រះអាទិត្យរះចំកំពូលប្រាសាទអង្គរ បានទាក់ទាញទេសចរច្រើនកុះករ រូបពីក្រសួងទេសចរណ៍
× ខេត្តសៀមរាប៖ ភ្ញៀវទេសចរជាតិ-អន្តរជាតិប្រមាណ ៧៥០០នាក់ បានមកទស្សនាទិដ្ឋភាព និងផ្ដិតរូបយករូបភាព ព្រះអាទិត្យរះចំកំពូលប្រាសាទអង្គរវត្ត ដែលហៅជាភាសាអង់គ្លេសថា Equinox នៅព្រឹកព្រហាមថ្ងៃទី២២ខែមីនា។
បើតាមការជូនដំណឹងរបស់ក្រសួងទេសចរណ៍ បាតុភាព ដែលទើបបានកន្លងផុតនេះ កើតឡើងចន្លោះថ្ងៃទី២០ដល់ថ្ងៃទី២២ ខែមីនា ចន្លោះម៉ោង៥ ទៅម៉ោង៧ព្រឹក។ ភ្ញៀវទេសចរបានមករងចាំទស្សនាទិដ្ឋភាពនេះទាំងបីថ្ងៃនេះយ៉ាងច្រើនកុះករ។
ហើយបាតុភាពនេះបានកើតឡើងនៅថ្ងៃទី២២ខែមីនា នាព្រឹកព្រហាម ដែលបានទាក់ទាញទេសចរប្រមាណ ៧៥០០នាក់ ក្នុងនោះភ្ញៀវអន្តរជាតិមានចំនួន ៣៥០០នាក់។ នេះបើតាមក្រសួងទេសចរណ៍។
បាតុភាពព្រះអាទិត្យរះចំកំពូលប្រាសាទអង្គរ កើតឡើងពីដងជារៀងរាល់ឆ្នាំនៅក្នុងខែមីនា និងខែកញ្ញា។ រីឯថ្ងៃជាក់លាក់ ក្រសួងទេសចរណ៍តែងប្រកាសដល់ទេសចរជាតិ អន្តរជាតិឲ្យបានជ្រាបមុន។
ជាមួយគ្នានេះ ក្រសួងទេសចរណ៍ក៏បានដាក់ចេញកម្មវិធីប្រកួតប្រជែងថតរូបស៊ែលហ្វីជាមួយទិដ្ឋភាពទាំងនេះផងដែរ ដែលនឹងប្រកាសលទ្ធផលនាពេលខាងមុខ។
បើតាមអ្នកជំនាញក្នុងស្រុក ដែលស្រាវជ្រាវឯកសារវិទ្យាសាស្ត្ររបស់បរទេសអំពីបាតុភាពខាងលើនេះ បាតុភាពព្រះអាទិត្យរះចំកំពូលប្រាសាទអង្គរវត្តនេះ គឺជាការគិតគូរយ៉ាងអស្ចារ្យលើផ្នែកស្ថាបត្យកម្ម និងផ្នែកតារាសាស្ត្រ ពោលគឺមិនមែនជារឿងចៃដន្យនោះទេ៕
© រក្សាសិទ្ធិដោយ thmeythmey.com