អន្តរជាតិ
របាយការណ៍៖ ជម្លោះ និងគ្រោះធម្មជាតិ ធ្វើឲ្យប្រជាជនពិភពលោករាប់លាននាក់ ជួបភាពស្រេកឃ្លាន
× ភ្នាក់ងារជំនាញអង្គការសហប្រជាជាតិ បានចេញផ្សាយរបាយការណ៍មួយស្តីពី វិបត្តិចំណីអាហារសកល ។ តាមរបាយការណ៍នោះ មានប្រជាជនរាប់លាននាក់ទូទាំងពិភពលោក បានរស់នៅជាមួយនឹងភាពស្រេកឃ្លាន ដ្បិតមជ្ឈដ្ឋានរស់នៅរបស់ពួកគេ ត្រូវរងគ្រោះដោយសារតែជម្លោះ និងគ្រោះធម្មជាតិ ។
ភ្នាក់ងារជំនាញចំណីអាហារនិងកសិកម្មរបស់អង្គការសហប្រជាជាតិ រួមជាមួយនឹងសហភាពអឺរ៉ុប នៅថ្ងៃ២២ មីនា បានចេញផ្សាយរបាយការណ៍សកលស្តីពីវិបត្តិចំណីអាហារ ដោយបានរកឃើញថា តម្រូវការចំណីអាហារជាបន្ទាន់ បានកើនឡើង ដោយសារតែមូលហេតុចម្បងមួយចំនួនដូចជា សង្គ្រាម ឬជម្លោះ បំរែបំរួលអាកាសធាតុ និងការឡើងថ្លៃលើសលប់នៃថ្លៃចំណីអាហារ ។
បើតាមការចុះផ្សាយរបស់មជ្ឈមណ្ឌមណ្ឌលព័ត៌មានអង្គការសហប្រជាជាតិ របាយការណ៍នោះ បានអះអះអាងថា សង្គ្រាម ឬជម្លោះ គឺជាហេតុផលចម្បងគេបង្អស់ ដែលធ្វើឲ្យមានអសន្តិសុខស្បៀង ដែលក្នុងនោះ ភាគច្រើនកើតឡើងនៅក្នុងតំបន់អាហ្វ្រិក និងមជ្ឈិមបូព៌ា ។ វិបត្តិនៅមីយ៉ាន់ម៉ា ក៏រាប់បញ្ចូលនៅក្នុងរបាយការណ៍ផង ។
ជុំវិញបញ្ហានេះ នាយកប្រតិបត្តិរបស់កម្មវិធីស្បៀងអាហារពិភពលោក លោក David Beasley ក៏បានលើកឡើងផងដែរថា ការប្រយុទ្ធប្រឆាំងគ្នា ត្រូវតែបញ្ឈប់ ហើយ ពិពភលោក ក៏ត្រូវតែចូលរួមទាំងអស់គ្នាដើម្បីដោះស្រាយវិបត្តិ ដែលលោក ហ៊ានអះអាងថា វិបត្តិទាំងនោះ ភាគច្រើន កើតឡើងនៅនឹងភ្នែកតែម្តងនោះ ។
លោកនាយកប្រតិបត្តិការដដែលនោះ បន្តទៀតថា ផលលំបាក ដែលបណ្តាលមកពីការប្រយុទ្ធគ្នា និងការផ្លាស់ប្តូរអាកាសធាតុ បានធ្វើឲ្យប្រជាជនរាប់លាននាក់ត្រូវរស់ជាមួយនឹងភាពស្រេកឃ្លាន និងវេទនាជាទីបំផុត ។
តាមរយៈរបាយការណ៍នោះ លោកនាយកប្រតិបត្តិកម្មវិធីចំណីអាហារពិភពលោក បានផ្ញើសារដាស់តឿនដល់មេដឹកនាំពិភពលោក យ៉ាងដូច្នេះថា៖« របាយការណ៍ចំណីអាហារ មិនត្រឹមតែបង្ហាញឲ្យយើងឃើញពីវិបត្តិសព្វថ្ងៃប៉ុណ្ណោះទេ តែ វាក៏បានបង្ហាញឲ្យយើងដឹងថា ប្រសិនយើងរួមគ្នាជាមួយនឹង ឆន្ទៈនយោបាយ និងបច្ចេកវិទ្យាបច្ចុប្បន្ន យើង អាចធ្វើឲ្យពិភពលោក កាន់តែមានសន្តិភាព ស្ថិរភាព ហើយ ទីកន្លែងដែលធ្លាប់តែមានពោរពេញទៅដោយភាពស្រកឃ្លាន នឹងត្រូវក្លាយជារឿងមួយក្នុងអតីតកាលប៉ុណ្ណោះ» ៕
© រក្សាសិទ្ធិដោយ thmeythmey.com