កីឡាអន្តរជាតិ
អន្តរជាតិ
Zlatan Ibrahimovic ក្លាយជាកីឡាកររបស់ Los Angeles Galaxy
× ខ្សែប្រយុទ្ធស៊ុយអែត Zlatan Ibrahimovic បានចុះកិច្ចសន្យាលេងឲ្យក្លិប Los Angeles Galaxy នៃក្របខណ្ឌ Major League Soccer របស់អាមេរិក។ Galaxy បានលើកឡើងទាក់ទងនឹង Ibrahimovic ថា ជាកីឡាករដែលមានជ័យជម្នះច្រើនបំផុត។
Ibrahimovic បានផ្លាស់ពី Paris Saint German ទៅកាន់ទឹកដី Old Trafford តាំងពីការឡើងដឹកនាំរបស់លោក Jose Mourinho កាលពីរដូវកាលមុនជាមួយនឹងការបង្ហាញខ្លួន ៥៣ប្រកួត និងស៊ុតបញ្ចូលទី២៩គ្រាប់។
ប៉ុន្តែសម្រាប់រដូវកាល ២០១៧-២០១៨ នេះ Ibrahimovic លេងឲ្យក្រុមរហស្សនាមបិសាចក្រហម បានតែ៧ប្រកួតប៉ុណ្ណោះ ដ្បិតបញ្ហារបួសរ៉ាំរ៉ៃខ្លាំងពេក។ ដោយសារមិនសូវបានបង្ហាញខ្លួន និងសូម្បីតែជាកីឡាករបម្រុងក៏គ្មានដែរនោះ អតីតសមាជិក Inter Milan, Barcelona និង AC Milan រូបនេះ សម្រេចចាកចេញមុនបញ្ចប់កិច្ចសន្យា ដែលនឹងត្រូវផុតកំណត់នៅចុងបញ្ចប់រដូវកាលនេះ។
«វាដល់ពេលហើយដើម្បីផ្លាស់ប្តូរ បន្ទាប់ពីរដូវកាលដ៏អស្ចារ្យជាមួយ Manchester United»។ នេះជាការរៀបរាប់របស់ Ibrahimovic នៅលើបណ្តាញសង្គមហ្វេសប៊ុករបស់ខ្លួន។
Galaxy ធ្លាប់មានកីឡាករដ៏លេចធ្លោម្នាក់ គឺ David Beckham ហើយបច្ចុប្បន្នអតីតកីឡាករជម្រើសជាតិអង់គ្លេស Ashley Cole ជាប្រធានក្រុម៕
© រក្សាសិទ្ធិដោយ thmeythmey.com